KuBagalatiya
6 Bakombima, nikuba kuti umwi muntu waleya katazi, inywe nimuli aazyeelelo zyamuuya, amweezye kumululamika amoyo uubombede, pesi amulichenjelele andinywe nkaambo ulabona mwasunkwa. 2 Amwiinkilile kunembo kunyampuzyania mikuli iilema. Kuti mwachita oobo, nga mulikuzuzikizya mulawu waKkristu. 3 Nkaambo kuti muntu wabonaanga ulayandikana, kakuli taakwe ambabede, ulikulyeena. 4 Pesi umwi awumwi alange-lange nzyachita mpawo ulaba aakaambo katape kuti abotelwe we lwakwe, kutali kwiinda mukulyeezyanisya aawumwi muntu pe. 5 Nkaambo umwi awumwi uzoonyampula mukuli wakwe.
6 Mukuyungizya, muntu woonse uulikuyiisigwa jwi,* aabile muntu uulikumuyiisya* zintu zyakwe zyoonse zibotu.
7 Muteenwi pe. Leza tafubaazigwi pe. Nkaambo kufumbwa chintu nchabyala muntu, nchicho nchatazootebule. 8 Nkaambo ooyo uubyala kweendelana anyama, uzootebula kubola kuzwa kunyama yakwe, pesi ooyo uubyala kweendelana amuuya, uzootebula buumi butamani kuzwa kumuuya. 9 Nkinkaako, tutaleki pe kuchita zintu zibotu, nkaambo muchiindi cheelede tuzootebula kuti teetwakatala.* 10 Nkinkaako, kufumbwa katuli aamweenya, atubachitile zintu zibotu bantu boonse, kapati babbululu besu mulusyomo.
11 Amubone mbaali mapati mabbii ngindamulembela akuboko kwangu.
12 Aabo boonse bayanda kubonwa kuti mbabotu kubantu, mbabo balikumusungilizya kuti mupalulwe, kuchitila kuti batapenzegwi akaambo kachisamu chakupenzezya* chaKkristu. 13 Nkaambo nibaba aabo balikupalulwa tabawubambi pe Mulawu, pesi bayanda kuti mupalulwe kuchitila kuti babe aakaambo katape kuti balidunde akaambo kandinywe. 14 Pesi tandikoolidunda aachimwi chintu pe kunze kwachisamu chakupenzezya* chaMwaami wesu Jesu Kkristu. Kwiinda mulinguwe, ime ndibona kuti nyika yakajayigwa* alubo nyika indibona kuti andime ndakajayigwa. 15 Nkaambo kupalulwa naakuti kutapalulwa taakwe ambukubede pe, pesi kuba chilenge chipya nkuko kuyandikana. 16 Aabo boonse beenda bweelede kweendelana amulawu ooyu wakulijata, luumuno aluzyalo azibe aalimbabo, nkukwaamba Israyeli waLeza.
17 Kuzwa lino, kutachizoobi muntu uundikataazya lubo pe, nkaambo mubili wangu ulaamabata aatondeezya kuti ndili muzike waJesu.
18 Bakombima, luzyalo lupati lwaMwaami wesu Jesu Kkristu alube aandinywe akaambo kabuntu bubotu mbumutondeezya.* Ameni.