Mikka
6 Amumvwe kaka, nzyalikwaamba Jehova.
Amunyampuke mwaambe kaambo kanu kunembo lyazilundu,
Atulundu atumvwe jwi lyanu.
2 Inywe nimalundu, amumvwe kaambo kaJehova,
Inywe nintalisyo zisimide zyanyika,
Nkaambo Jehova uli aakaambo abantu bakwe,
Uzoobeteka ma-Israyeli kati:
3 “Inywe nibantu bangu, ndakamubisizyaanzi?
Kuli nzindakachita na zyakapa kuti mukatale?
Amwaambe.
4 Nkaambo ndakamugwisya munyika ya-Ijipita,
Ndakamunununa mung’anda yabuzike,
Ndakatuma Mozesi a-Aroni aMiriyemu kuti bamuzulwide.
5 Ikaka nibantu bangu, amuyeeye nzyaakali kuyanda kuchita Mwaami Bbalakki waMowabbu,
Ambaakamusandula Bbalamu mwana waBbewori
—Eezyo zyakachitika kuzwa kuShitimu kusika kuGiligali—
Kuchitila kuti muzibe milimu yaJehova iiluleme.”
6 Ndizoozaanzi kunembo lyaJehova?
Ndinoolaanzi ninditazoofugame kunembo lyaLeza uuli kujulu?
Ndizooze aazipo zitentwa kazikkwene na kunembo lyakwe,
Abana bang’ombe bali aamunyaka uumwi?
7 Jehova ubotelwa aazyuulu zyabagutu na,
Atulonga twamafuta tuli makumi aazyuulu?
Ndipe mwanaangu wakusaanguna na akaambo kakubukila kwangu,
Muchelo wamubili wangu akaambo kachibi changu?
8 Iwe numuntu, Leza wakubuzya chintu chibotu.
Niinzi Jehova nchayanda* kulinduwe?
Nchayanda biyo nchakuti uchite zintu ziluleme, uyandisye kusyomeka,*
Akuti weende kulibombya aLeza wako!
9 Jwi lyaJehova lilikoompolola mumuunzi,
Aabo bali aabusongo bugwasya bazooliyoowa zina lyako.
Amuswiilile kaponda ayooyo wakakasala.
10 Kuchili bunoti bwakajanwa munzila yakutasyomeka na mung’anda yamubi
Achipimyo cha-efa* chitakkwene chisesemya?
11 Nga ndilaba muntu uusalala* na kuti kandili aazikkelo zitaluleme,
Achikwama chili aamabwe aakupimya aakweena bantu?
12 Nkaambo baalumi banotede bamumuunzi ooyo bayandisya kulwana,
Alubo bantu bakkala mumo baambuula manwa,
Lulimi lwabo luleena.
13 “Nkinkaako, ndizookuuma ube aachilonda,
Ndipe kuti ube tongo akaambo kazibi zyako.
14 Uzoolya, pesi tuzookkuti pe,
Uzoosyaala kulaanzala.
Zintu nzutazoogwisye, tuzookonzyi pe kuzikwabilila nutazooyendaazyo,
Alubo nzutazooyinkaazyo, ndizoozinyonyoona aapanga.
15 Uzoobyala mbuto, pesi tuzootebuli pe.
Uzoolyatuuka ma-olifa, pesi tuzoowabelesyi pe mafuta aayo,
Uzoopanga wayini mpya, pesi tuzooyinywi pe wayini eeyo.
16 Nkaambo mubamba milawu ya-Omiri amilimu yoonse yamung’anda ya-Ahabbu,
Alubo mweenda kamutobela lulayo lwabo.
Nkinkaako, ndizoopa kuti mube chintu chigambya
Akuti bantu bakkala mumuunzi ooyo babe chintu chisibilwa mulozi,
Muzoosampawulwa aabantu.”