Makani mabotu aakalembwa aaMateyo
22 Jesu wakaambuula lubo ambabo kabelesya zikozyanisyo. Wakati: 2 “Bwaami bwakujulu bulakonzya kukozyanisigwa aamwaami wakabambila mwanaakwe pobwe lyamuchado. 3 Mpawo wakatuma bazike bakwe kuti bakayite bantu bakatambidwe kupobwe lyamuchado, pesi bantu aabo teebakayanda pe kusika. 4 Alubo, wakatuma bamwi bazike kati: ‘Amukabuzye aabo batambidwe kuti: “Amubone! Ndabamba chakulya changu, ndajaya ng’ombe abanyama baneneede alubo zyoonse zyaba kabotu. Amuze kupobwe lyamuchado.”’ 5 Pesi, teebakaba aandaba pe. Umwi wakaya kumuunda wakwe, umwi wakaya kubbizinesi yakwe, 6 pesi bamwi boonse, bakajata bazike bakwe, babafubaazya mpawo babajaya.
7 “Mwaami wakanyema loko mpawo wakatuma masoja aakwe mpawo akajaya bajayi aabo akutenta muunzi wabo. 8 Mpawo mwaami wakabuzya bazike bakwe kuti, ‘Pobwe lyamuchado lyaba kabotu pesi aabo bakatambidwe teebakali kweelela pe. 9 Nkinkaako, amwiinke kumigwagwa iizwa mumuunzi, mutambe kufumbwa muntu ngumutaswaane kuti aze kupobwe lyamuchado.’ 10 Nkinkaako, bazike aabo bakayinka kumigwagwa mpawo bakabunganizya bantu boonse mbibakajana, babi ababotu alubo ng’anda iichitilwa mapobwe aamuchado, yakazula bantu bakali kulya.*
11 “Mwaami naakanjila kuti azoolange-lange beenzu, wakabona umwi mwaalumi wakatazweete chigogo chamuchado. 12 Nkinkaako, wakati kulinguwe: ‘Mweenzuma, ani wanjila biyeni oomuno kutakwe chigogo chamuchado?’ Mwaalumi ooyo wakabula lyakwaamba. 13 Mpawo mwaami wakabuzya babelesi bakwe kuti, ‘Amumwaange maboko amawulu, mumuwaalile aanze mumudima. Ooko nkuko nkwatazoolilile akulumina ntwinyo.’
14 “Nkaambo mbiingi batambidwe pesi mbache basalidwe.”
15 Mpawo baFarisi bakayinka alubo bakazwa aamuzeezo wakuti bamuche amajwi aakwe. 16 Nkinkaako, bakatuma basikwiiya babo kulinguwe kabalaamwi abatobeli baHerodi kabati: “Muyiisi, tulizi kuti waamba simpe akuti uyiisya nzila yaLeza mukasimpe akuti tuyandi kubotezya bantu, nkaambo tulangi mbubaboneka aanze. 17 Lino tubuzye, uyeeyaanzi? Zilazumizigwa na amulawu* kubbadala mutelo kuli Kkesari, naakuti pe?” 18 Pesi Jesu kazi bubi bwabo, wakati: “Nibasikuupa-wupa, nkamboonzi nimulikundisunka? 19 Amunditondeezye mali yamutelo.” Mpawo bakamupa dinari. 20 Wakati kulimbabo: “Chifanikisyo eechi amajwi aaya nzizyani?” 21 Bakati: “NzizyaKkesari.” Mpawo wakati kulimbabo: “Zintu zyaKkesari amuzipe Kkesari, pesi zintu zyaLeza amuzipe Leza.” 22 Nibakamvwa oobo, bakagamba mpawo bakeenda bamusiya.
23 Mubuzuba mbuboobo, baSadusi, aabo baamba kuti taakwe kubusigwa kwabantu bafwide, bakasika mpawo bakamubuzya kuti: 24 “Muyiisi, Mozesi wakati: ‘Kuti mwaalumi wafwa katakwe bana, mwanikaakwe weelede kukwata mwanakazi wakwe mpawo azyalile mukulanaakwe bana.’ 25 Aakati kesu, kwakali bana bachaalumi bali musanu ababili bakazyedwe aamwi. Wakusaanguna wakakwata pesi wakafwa katakwe mwana pe, mpawo mwanakazi wakwe wakakwatwa aamwanikaakwe. 26 Eezi nzizyo zyakachitika kuli wachibili awachitatu, kusikila nibakamana boonse kabali musanu ababili. 27 Kumamanino, anguwe mwanakazi ooyo wakazoofwa. 28 Nkinkaako, bafwide baakubusigwa, mwanakazi ooyo uzooba wani? Nkaambo boonse bakalimukwete.”
29 Jesu wakabasandula kuti: “Mulisweekede, nkaambo tamwaazi pe Magwalo naaba manguzu aaLeza, 30 nkaambo bafwide baakubusigwa, baalumi tabazookwati pe alubo banakazi tabazookwatwi pe, pesi banooli mbuli ngilozi zili kujulu. 31 Kumakani aali atala akubusigwa kwabantu bafwide, teemwakabala na nzimwakabuzigwa aaLeza, ooyo wakati: 32 ‘Ndime Leza wa-Abbrahamu aLeza wa-Izakka aLeza waJakkobo’? NguLeza wabawumi kutali wabafwide pe.” 33 Makamu aabantu naakamvwa makani aaya, akagamba loko akaambo kakuyiisya kwakwe.
34 BaFarisi nibakamvwa kuti wawumuzya baSadusi, bakajatana baza kabali kabunga kamwi. 35 Mpawo umwi wabo wakazi Mulawu, wakamusunka kwiinda mukubuzya kuti: 36 “Muyiisi, nguuli mulawu mupati kwiinda yoonse iili muMulawu?” 37 Wakati kulinguwe: “‘Weelede kuyanda Jehova* Leza wako amoyo wako woonse, abuumi bwako boonse amizeezo yako yoonse.’ 38 Ooyu ngumulawu mupati kwiinda yoonse alubo nguwo wakusaanguna. 39 Wachibili uukozyenie aanguwo, ngooyu: ‘Weelede kuyanda simayakilane wako mbuli mbuliyanda.’ 40 Aamilawu eeyi iibili, mpaayakilidwe Mulawu woonse aBapolofita.”
41 BaFarisi nibakachili aamwi, Jesu wakababuzya kuti: 42 “Muyeeyaanzi atala aKkristu? Mwanaani?” Bakati kulinguwe: “Mwana waDavida.” 43 Mpawo wakababuzya kuti: “Kuti kakuli oobo, nkamboonzi Davida kazulwidwa aamuuya naakamwiita kuti Mwaami, chiindi naakati, 44 ‘Jehova* wakati kuMwaami wangu: “Kkala kukuboko kwangu kwachilisyo kusikila ndibikke basinkondonyokwe kunsi aamawulu aako”’? 45 Kuti Davida kamwiita kuti Mwaami, ani mwanaakwe biyeni?” 46 Taakwe wakakonzya kumusandula niliba jwi alubo kuzwa mubuzuba oobo kaziya kunembo, taakwe wakeezya lubo kumubuzya umwi mubuzyo.