KuBafilipi
3 Chamamanino bakombima, amwiinkilile kunembo kubotelwa muMwaami. Takundikataazyi pe kumulembela zintu zikozyenie nkaambo zigwasya ndinywe.
2 Amuchenjelele bankala, amuchenjelele bantu bapa kuti kube zintu zichisa bamwi, amuchenjelele aabo banenga nyama. 3 Nkaambo iswe ndiswe nituli aakupalulwa kwachoonzyo, iswe nitulikuchita mulimu uusalala kwiinda mumuuya waLeza akulidunda muli Kkristu Jesu alubo nitutasyomi zintu zyanyama, 4 nikuba oobo, ime ndili aatwaambo tupa kuti ndisyome zintu zyanyama kwiinda bantu boonse.
Kuti kakuli muntu uuyeeya kuti uli aatwaambo tupa kuti alisyome kunyama, ime biya ndilamwiinda, nkaambo 5 ndakapalulwa mubuzuba bwachi 8, ndili wamuchisi cha-Israyeli, wamusyobo waBbenjamini, muHebberu wakazyalwa aamaHebberu. Kumakani aamulawu ndili muFarisi, 6 kumakani aabusungu ndakapenzya mbungano, kumakani aabululami buyeeme aamulawu ndakatondeezya kuti tandikwe mulandu pe. 7 Nikuba oobo, zintu nzindakali kubona kuti zilayandikana, ndaabuzibona kuti nzyabuyo* akaambo kaKkristu. 8 Mukuyungizya, zintu zyoonse ndizibona kuti nzyabuyo akaambo kaluzibo lusumpukide lwaKkristu Jesu Mwaami wangu. Akaambo kakwe, ndazumina kusweekelwa aazintu zyoonse alubo ndizibona mbuli mulwi wadoti* kuchitila kuti ndijane Kkristu 9 akuti ndijanike kandijisini aamwi anguwe, kutali akaambo kabululami bwangu bweetwa akaambo kakutobela Mulawu pe, pesi akaambo kabululami bubawo kwiinda mukuba aalusyomo muli Kkristu, bululami buzwa kuli Leza buyeeme aalusyomo. 10 Makanze aangu ngakuti ndimuzibe akuti ndizibe manguzu aakubusigwa kwakwe akuti nditole lubazu mumapenzi aakwe akuti ndilipede kufwa lufu luli mbuli lwakwe, 11 kuchitila kuti, kuti kazikonzeka andime ndikajanike mukubusigwa kwabafu kwakumasaangunino.
12 Tazyaambi kuti ndabujana kale bulumbu naakuti ndachitwa kuti ndimaninine, pesi ndilikulwisya kuti amwi ulabona andime ndachijana eecho Kkristu Jesu nchaakandisalila.* 13 Bakombima, tandiliboni mbuli kuti ndabujana kale bulumbu, pesi chintu chimwi nchindili aachoonzyo atala anchicho nchakuti: Ndilikuluba zintu zyamusule alubo ndilikusompokela zintu zili kunembo. 14 Ndilikulwisya changuzu kuti ndikajane bulumbu bwakwiitwa kwakujulu aLeza kwiinda muli Kkristu Jesu. 15 Nkinkaako, aabo bakomena aakati kesu, ababe aamuzeezo ooyu, pesi kuti kamuli aawumwi muzeezo mukaambo kali koonse, Leza uzoomuyubunwida muzeezo uuli kabotu. 16 Nikuba oobo, kweendelana ambutwakomena, atwiinkilile kunembo kweenda bweelede munzila njiyeeyi.
17 Bakombima, moonse amunditobelezye alubo amubalangisisye aabo balikweenda kweendelana achikozyano nchitwakamusiila. 18 Nkaambo mbiingi balikweenda mbuli basinkondonyina bachisamu chakupenzezya* chaKkristu. Ndakali kwaambuula atala ambabo chiindi chiingi, pesi lino ndaabwaambuula atala ambabo kandilila. 19 Mamanino aabo ndunyonyooko, leza wabo ndida lyabo, bulemu bwabo mbweeme bwabo, alubo mizeezo yabo ilaazintu zyanyika. 20 Pesi busichisi bwesu buli kujulu alubo tulikumulangilila aachiyandisyo chipati mufutuli wesu uuzwa nkuko, Mwaami Jesu Kkristu, 21 ooyo uutazoochinche mibili yesu iitakwe ambiibede kuti ibe mbuli mubili wakwe* uuli aabulemu, kwiinda mukubelesya manguzu aakwe mapati aapa kuti abombye zintu zyoonse kulinguwe.