KuBa-efeso
2 Mukuyungizya, Leza wakapa kuti mube bawumi nikuba kuti mwakalifwide mumilandu yanu amuzibi zyanu, 2 oomo mumwakali kweenda aali chimwi chiindi, kweendelana abwiime bwazintu bwanyika* eeyi alubo kweendelana amweendelezi wamanguzu aamoya, nkukwaamba muuya uulikubeleka lino mubana bataswiilili. 3 Kwaamba choonzyo, aali chimwi chiindi andiswe toonse twakali aakati kabo, katupona kweendelana azintu ziyandwa aanyama yesu, katuchita zintu ziyandwa aamibili yesu amizeezo yesu, alubo twakazyedwe katuli bana babukali mbuli bamwi boonse. 4 Pesi mbukunga Leza uli aaluzyalo lupati,* alubo akaambo kaluyando lwakwe lupati ndwaakatuyandaalo, 5 wakapa kuti tube bawumi aamwi aKkristu, nikuba kuti twakalifwide muzibi zyesu, pesi kwiinda muluzyalo lwakwe lupati, mwafutulwa. 6 Mukuyungizya, wakatubusyaamwi anguwe akupa kuti tukkalaamwi anguwe mundawu zyakujulu katujisini aaKkristu Jesu, 7 kuchitila kuti mubwiime bwazintu buza,* atutondeezye mbubuli bwiingi bunoti bwaluzyalo lwakwe lupati, abubotu bwakwe kwiinda muli Kkristu Jesu.
8 Kwiinda muluzyalo lupati oolu, mwakafutulwa akaambo kalusyomo, alubo eezi teezyakaba akaambo kakuti kuli nzimwakachita, pesi nchipo chaLeza. 9 Kufutulwa ooku takuzwi kumilimu pe, kuchitila kuti kutabi muntu uuba aakaambo kapa kuti alidunde. 10 Tuli milimu yamaboko aaLeza alubo twakalengwa katujisini aaKkristu Jesu, kuti tuchite milimu mibotu Leza njaakasala kakuchili chiindi kuti tweende mulinjiyo.
11 Nkinkaako, amuyeeye kuti aali chimwi chiindi, inywe nibantu bazisi kunyama, ndinywe mwakali kwiitwa kuti “batapalwidwe” abaabo “bapalwidwe” aamaboko aabantu. 12 Aachiindi eecho, teemwakalikwe Kkristu pe, mwakalaanzaanisidwe kuchisi cha-Israyeli, mwakali beenzu kuzizuminano zyachisyomezyo alubo nimwakachili munyika, teemwakalikwe bulangilizi pe alubo teemwakalikwe Leza pe. 13 Pesi lino kamujisini aaKkristu Jesu, inywe nimwakali kule loko aLeza, mwaba aafwiifwi anguwe kwiinda muganzi lyaKkristu. 14 Nkaambo we nduumuno lwesu, ooyo wakapa kuti nkamu zibili zijatane alubo nguwe wakadilisya muduli wakali kuzyaanzaanisya. 15 Kwiinda mumubili wakwe, wakagwisya kutamvwanana kwakaliwo, nkukwaamba Mulawu wakali aamalayilile amilawu, kuchitila kuti ape kuti nkamu eezi zibili zijisini aamwi anguwe zibe muntu uumwi mupya akuti kube luumuno, 16 alubo wakapa kuti nkamu eezi zibili zimvwanane lubo buzwide aLeza mumubili uumwi, kwiinda muchisamu chakupenzezya* nkaambo wakali wakunyonyoona kale kutamvwanana ooku, kwiinda mulinguwe. 17 Alubo wakasika, waambilizya makani mabotu aaluumuno kulindinywe nimwakali kule aLeza, aluumuno kuli baabo bakali aafwiifwi aLeza, 18 nkaambo kwiinda mulinguwe, iswe nituli nkamu zibili tulaangunukide kusika kuli Taata kwiinda mumuuya uumwi.
19 Nkinkaako, tamuchili beenzu pe naakuti bamuzwakule, pesi mwaba basichisinyina babasalali abantu bamung’anda yaLeza, 20 alubo mwakayakilwa aantalisyo yabaapostoli abapolofita, kakuli Kkristu Jesu lwakwe, ndibbwe lyaakkona lyantalisyo. 21 Ng’anda yoonse ilijisini mulinguwe, kayiswaanizidwe kabotu-kabotu alubo ilikukomena kuti ibe tempele lisalala lyaJehova.* 22 Andinywe mbukunga mujisini aamwi anguwe, mulikuyakwaamwi kuti mube ndawu njakkala Leza, kwiinda mumuuya.