Chiyubunuzyo chaJohane
13 Alubo yakayimikila* aaseele lyamulwizi.
Mpawo ndakabona munyama wakali kuzwa mulwizi, wakali aameja aali kkumi, amitwe iili musanu ayibili alubo meja aakwe akali aangowani zyabwaami zili* kkumi, pesi mitwe yakwe yakali aamazina aakusampula. 2 Munyama ngundakabona wakali mbuli siluwe, pesi mawulu aakwe akali mbuli aamunyama uutegwa bbeya, alubo mulomo wakwe wakali mbuli wamulavu. Mpawo nzoka eeyo mpati iiyoosya, yakapa munyama ooyu manguzu aayo achuuno chayo chabwaami abweendelezi bupati.
3 Ndakabona kuti umwi wamitwe yakwe wakali wayaswa zyakuyanda kufwa, pesi chilonda eecho chakapona, alubo bantu boonse baanyika bakali kutobela munyama ooyo kabamweemuzya. 4 Alubo bakakomba nzoka eeyo mpati nkaambo yakapa munyama manguzu aayo, alubo bakakomba munyama kabati: “Ngwani uuli mbuli munyama ooyu, alubo ngwani uukonzya kulwana aanguwe?” 5 Munyama ooyo wakapegwa mulomo wakwaambuula zintu zipati amajwi akusampula, alubo wakapegwa manguzu aakweendelezya kwamyeezi iili 42. 6 Mpawo wakajula mulomo wakwe akusampula Leza azina lyakwe andawu yakwe yakukkala, kuswaanizya abaabo bakkala kujulu. 7 Munyama ooyo wakazumizigwa kulwana basalali akuti abazunde, alubo wakapegwa manguzu aakweendelezya misyobo yoonse abantu boonse amilaka yoonse azisi zyoonse. 8 Alubo bantu boonse bakkala aanyika bazoowukomba. Kuzwa kumatalikilo aanyika, mazina aabo taalembedwe pe mubbuku lyakupeta lyabuumi lyaMwanaambelele ooyo wakajayigwa.
9 Kuti muntu kali aamatwi, amvwe. 10 Kuti umwi muntu keelede kutolwa kubuzike, uzooyinka kubuzike. Kuti umwi wajaya aapanga,* weelede kujayigwa aapanga. Aawa mpaayandikana kuti basalali balisimye akuti babe aalusyomo.
11 Mpawo ndakabona umwi munyama kalikuzwa munyika alubo wakali aameja aabili, aali mbuli aamwanaambelele, pesi munyama ooyu wakasaanguna kwaambuula mbuli nzoka. 12 Alubo ubelesya manguzu woonse aamunyama wakusaanguna kunembo lyakwe. Alubo upa kuti nyika abantu bakkala mulinjiyo bakombe munyama wakusaanguna, ooyo wakali aachilonda chibi chakapona. 13 Alubo uchita zitondeezyo zipati, nikuba kulosya mulilo aanyika kunembo lyabantu kawuzwa kujulu.
14 Alubo weena bantu bakkala aanyika, akaambo kazitondeezyo nzwaakazumizigwa kuti uchite kunembo lyamunyama, alubo ubuzya aabo bakkala aanyika kuti bapange chifanikisyo chamunyama wakayasidwe aapanga, mpawo wakazoopona. 15 Alubo wakazumizigwa kuti upe muuya wabuumi kuchifanikisyo chamunyama, kuchitila kuti chaambuule akupa kuti aabo boonse bakaka kukomba chifanikisyo chamunyama, bajayigwe.
16 Alubo umanikizya bantu boonse—bapati abaniini, banotede abafwaba, baangunukide abazike—kuti babikkwe chitondeezyo kukuboko kwachilisyo naakuti aankumu zyabo, 17 akuti kutabi muntu uula naakuti uuzya, kunze kwamuntu uuli aachitondeezyo, nkukwaamba zina lyamunyama naakuti namba yazina lyamunyama ooyo. 18 Aawa mpaayandikana busongo: Ooyo uuli aamaanu, abale namba yamunyama nkaambo ninamba yamuntu, namba eeyo ngu 666.