Kuli Filimoni
1 Ndime Pawulu, musungwa akaambo kaKkristu Jesu, kandilaamwi aTimoti mukombima, ndilikukulembela Filimoni numubelesima uuyandwa, 2 amuchizi wesu Apiya, a-Akkipasi musojama, ambungano iili mung’anda yako:
3 Amube aaluzyalo lupati aluumuno kuzwa kuli Leza Taateesu aMwaami Jesu Kkristu.
4 Ndilamulumba Leza wangu chiindi choonse nindikwaamba munkombyo zyangu, 5 nkaambo ndikkala kandimvwa atala alusyomo lwako aluyando ndulaalo muMwaami Jesu akubasalali boonse. 6 Ndikombela kuti lusyomo ndulaalo andubalaalo bakombinyokwe, lukugwasye kubona zintu zyoonse zibotu nzitulaazyo kwiinda muli Kkristu. 7 Mukombima, ndakakondwa loko akuumbulizigwa nindakamvwa atala aluyando lwako nkaambo wakabusilizya myoyo yabasalali.
8 Akaambo kakaambo aaka, nikuba kuti ndili aalwaangunuko lupati lwakwaambuula muli Kkristu, lwakuti ndikubuzye nzweelede kuchita, 9 ndasala kuti ndikukombelezye muluyando, mbukunga ulibwene kuti ndime Pawulu munene, lino waba musungwa akaambo kaKkristu Jesu. 10 Ndilikukukombelezya akaambo kamwanaangu Onesimo, ngundakaba wisi nindakali mujele. 11 Chiindi, taakali kugwasya pe kulinduwe, pesi lino waabugwasya loko kulinduwe akulindime. 12 Ndilikumubweedezya kulinduwe, nikuba kuti ulaamoyo.*
13 Ndalikuyanda kuti akkale aandime ookuno, kuchitila kuti anjile aandawu yako, kuti andigwasye imwi milimu nindili mujele akaambo kamakani mabotu. 14 Pesi tandiyandi kuchita chintu kutandizumizizye pe, kuchitila kuti mulimu wako mubotu, uuchite chakuliyandila kutali chakumanikizigwa pe. 15 Amwi eezi nzizyo zyakapa kuti achije kwachiindi chifwiifwi,* kuchitila kuti aakuboola, ukabe aanguwe kukabe kutamani, 16 katachili muzike pe, pesi kali wayinda aakuba muzike, kali waba mukombima uuyandwa, kapati kulindime, pesi anduwe uzooyindilila kumuyanda, kunyama amuMwaami. 17 Nkinkaako, kuti kandili mweenzinyokwe, ndikumbila kuti umutambule kabotu mbuli mbuwali kunoonditambula. 18 Mukuyungizya, kuti kakuli wakakubisizya naakuti kali aachikwelete kulinduwe, ndizoochibbadala. 19 Ime ndiPawulu ndilikulemba akuboko kwangu: Ndizoochibbadala, pesi utalubi kuti anduwe ulaachikwelete chabuumi bwako kulindime. 20 Mukombima, ndikumbila kuti undigwasye kumakani aaya muMwaami; busilizya moyo wangu muli Kkristu.
21 Ndili aachoonzyo chakuti uzoozichita nzindaamba, nchindakulembela lugwalo oolu, nkaambo ndilizi kuti uzoochita zyiinda nzindaamba. 22 Pesi kuyungizya aali zeezi, ndibambile ndawu yakukkala, nkaambo ndilangilila kuti, kwiinda munkombyo zyanu, ndizoobweedezegwa kulindinywe.*
23 Epafra muzikema ngundisungidwaawe muli Kkristu Jesu, ulikukujuzya, 24 kuswaanizya ababelesima Makko, Aristakko, Demasi, aLukka.
25 Luzyalo lupati lwaMwaami Jesu Kkristu, alube aandinywe akaambo kabuntu bubotu mbumutondeezya.*