Habbakkukki
3 Nkombyo yamupolofita Habbakkukki yalwiimbo lwakulila:
2 O Jehova, ndawumvwa mulumbe uuli atala anduwe.
Yandigambya milimu yako, O Jehova.
Aakati kaminyaka,* ibusilizye lubo milimu yako!
Aakati kaminyaka,* chita kuti izibinkane.
Utalubi kutufwida luzyalo muchiindi chamapenzi.
3 Leza wakazwa kuTemani,
Uusalala wakazwa kuChilundu chaParani. (Sela)*
Bupati bwakwe bwakavumba majulu;
Nyika yakazula kulumbayizigwa kwakwe.
4 Kumweka kwakwe kwakali mbuli mumuni.
Mitungazuba iibili yakali kumweka kayizwa mujaanza lyakwe,
Ooko manguzu aakwe nkwaakasisidwe.
5 Malwazi akali kunembo lyakwe,
Alubo kupya mubili kwakali kutobela kumawulu aakwe.
6 Wakayimikila nji wazungaania nyika.
Naakalanga, wakapa kuti zisi zisotooke.
Zilundu zitamani zyakapwayigwa,
Atulundu twachiindi twakakotama.
Nzila zyachiindi nzizyakwe.
7 Ndakabona mapenzi mumatente aaKkushi.
Milembo yamatente aachisi chaMidiyani yakazungaana.
8 Wanyemena milonga na, O Jehova,
Kunyema kwako kwavutukila milonga na?
Naakuti bukali bwako bwabukila lwizi na?
Nkaambo wakatanta aamabbiza aako;
Ngolo zyako zyankondo zyakazunda.*
9 Daantambwa lyako lyavumbuka, lilikulindila kubelesegwa.
Nkoli zyapegwa* mulimu kwiinda muchikonke.* (Sela)
Upambula nyika kubelesya milonga.
10 Zilundu zyakaminingana akaambo kamachise nizyakakubona.
Mvula mpati yakakukulula.
Maanzi miingi akavuuma.
Akatambika maboko kujulu.
11 Zuba amweezi zyakayimikila kujulu nkuzibede.
Tunta twako twakeenda mbuli mumuni.
Kumweka kwasumu lyakwe kwakali mbuli kalabi.
12 Wakayinda munyika kulutide.
Wakalyatuuka zisi kunyemede loko.
13 Wakayinka kuti ukafutule bantu bako, kuti ukavune munanike wako.
Wakanyonyoona muzulwidi* wang’anda yababi.
Yakanyonyoonwa kuzwa kuntalisyo kusika kukaluli.* (Sela)
14 Wakayasa mitwe yamasooja aakwe kubelesya zilwanisyo zyakwe*
Chiindi nibakandivuumukila kuti bandimwaye.
Bakali kubotelwa kunyonyoona ooyo uuli mumapenzi mundawu iisisikene.
15 Wakayinda mulwizi amabbiza aako,
Wakayinda mumaanzi miingi aabbobboma.
16 Nindakamvwa, ndakakankama;*
Nindakamvwa musindo, milomo yangu yakabwibwima.
Zifuwa zyangu zyakabola;
Mawulu aangu akali kukankama.
Pesi ndakalindila buzuba bwamapenzi kanduumwide,
Nkaambo buzoosikila bantu batulwana.
17 Nikuba kuti mukuyu teewafulula,
Amumisaansa kamutakwe michelo;
Nikuba kuti mi-olifa teeyazyala,
Amumyuunda kamutakwe chakulya;
Nikuba kuti tanga lyambelele lyabulika mubbondo,
Ang’ombe zyabulika muchaata;
18 Pesi ime ndinoobotelwa muli Jehova;
Ndinookondwa muli Leza walufutuko lwangu.
19 Mwaami Singuzuzyoonse Jehova ninguzu zyangu;
Uzoopa kuti mawulu aangu abe mbuli aansya
Akupa kuti ndeende mundawu zili aajulu.
Kumweendelezi wanyimbo; lweelede kwiimbwa aachibelesyo changu chantambo chakwiimbya.