Lwakusaanguna Luya Kuli Timoti
3 Makani aaya alasyomeka: Kuti mwaalumi kayanda kuba mulangizi, uyanda mulimu mubotu. 2 Nkinkaako, mulangizi weelede kuba muntu uutakwe chintu nchasolwaacho pe, mulumi uuli aamwanakazi uumwi, uulinyona muzintu nzyachita, uuli aamizeezo iilikabotu,* uubambikene, uutambula beenzu, uuyiisya kabotu, 3 kutali mukolwi, kutali sikulwana,* pesi uumvwisisisya, uutayandi zyakukazyania, uutayandisyi mali, 4 uubazulwida* kabotu bamung’anda yakwe, uuli aabana balibombya batawubaansyi zintu 5 (nkaambo kuti muntu katakonzyi kuzulwida* bamumpuli yakwe, uliilangania biyeni mbungano yaLeza?), 6 kutali wakasanduka lino-lino, nkaambo ulabona walisumpula mpawo wajana lubeta lwakapegwa Dyabbulosi. 7 Mukuyungizya, weelede kuba aampuwo mbotu kuzwa kubantu bakunze, kuchitila kuti atasampulwi mpawo atachegwi mukakole kaDyabbulosi.
8 Babelesi bambungano, ambabo beelede kuba bantu batawubaansyi zintu, kutali baambuula zintu zibili zisiyene,* kutali banywa wayini nyingi, kutali batangazu bayanda kujana zintu munzila yakutasyomeka, 9 pesi bajisilidi kunsiswa iisalala yalusyomo amoyo uutabapi mulandu.*
10 Alubo amubeezye saansi, mubone kuti baleelela na, mpawo muzoobaleke kuti babeleke kabali babelesi, mbukunga taakwe nchibasolwaacho pe.
11 Ambabo banakazi, beelede kuba bantu batawubaansyi zintu, batabejelezyi bamwi, balinyona muzintu nzibachita, basyomeka muzintu zyoonse.
12 Mubelesi wambungano weelede kuba mulumi uuli aamwanakazi uumwi, uubeendelezya kabotu bana bakwe abamung’anda yakwe. 13 Nkaambo baalumi babeleka kabotu balikulijanina mpuwo mbotu alwaangunuko lupati lwakwaambuula atala alusyomo luli muli Kkristu Jesu.
14 Ndilikukulembela zintu eezi nikuba kuti ndilangilila kuza kulinduwe lino-lino, 15 kuchitila kuti, kuti ndanonoka, uzibe mbweelede kulijata mung’anda yaLeza, iili njimbungano yaLeza uupona, musemu* antalisyo yakasimpe. 16 Kwaamba choonzyo, iyandikana loko nsiswa iisalala iili atala akuyoowa Leza ooku, yakuti: ‘Wakayubununwa mumubili wanyama, wakaambwa kuti uliluleme mumuuya, wakaboneka kungilozi, wakakambawukwa aakati kazisi, wakasyomwa munyika, wakatambulwa mubulemu kujulu.’