Babetesi
14 Mpawo Samisoni wakakunuka waya kuTimina. KuTimina ooko, wakabona mwanakazi muFilisiti.* 2 Wakaakubuzya wisi abanyina kuti: “Kuli mwanakazi ngundabona muFilisiti kuTimina, ndiyanda kuti mukandibwezele nguwe azoobe mwanakazi wangu.” 3 Pesi wisi abanyina bakamubuzya kuti: “Ani wabonaanzi kuyanduula musimbi aakati kababbululu besu, aakati kabantu besu. Nga uyookwata mwanakazi aakati kamaFilisiti batapalwidwe na?” Pesi Samisoni wakabuzya wisi kuti: “Amukandeetele nguwe nkaambo nguwe ngundayanda.”* 4 Wisi abanyina teebakazi pe kuti eezi zyakazwa kuli Jehova, nkaambo wakali kuyanduula mweenya wakulwana maFilisiti, mbukunga maFilisiti mbabo bakali kweendelezya ma-Israyeli aachiindi eecho.
5 Samisoni wakakunuka awisi abanyina baya kuTimina. Naakasika kumyuunda yamisaansa yakuTimina, mulavu* wakasika kulinguwe kawuza buvuluma. 6 Muuya waJehova wakamupa manguzu, mpawo wakawukwamuna muzipanzi zibili mbuli muntu mbakwamuna mpongo iichili niini muzipanzi zibili amaboko. Pesi nzyaakachita, taakazibuzya wisi naakuti banyina. 7 Mpawo wakakunuka waakwaambuula aamwanakazi ooyo. Mwanakazi ooyo wakachili kuyandwa aSamisoni.
8 Nikwakayinda chiindi, Samisoni wakayinka kuti akabweze mwanakazi wakwe kuti amutole kulimbabo. Wakaleya kuti akalange mulavu ngwaakajaya, mumulavu ooyo mwakali nzuki zyiingi loko abuchi. 9 Nkinkaako, wakakokolola buchi amaboko aakwe, mpawo wakeenda kayabubulya. Naakaba aamwi awisi abanyina, wakabapa bumwi buchi kuti balye. Pesi taakababuzya kuti buchi oobo wakali wabukokolola mumulavu uufwide.
10 Wisi wakakunuka waya kumwanakazi ooyo, mpawo Samisoni wakachita pobwe nkukooko, nkaambo mbubo mbubakali kuchita balombe muchiindi eecho. 11 Nibakamubona bakamweetela basikusindikizya bachaalumi bali 30 kuti bamusindikile. 12 Mpawo Samisoni wakababuzya kuti: “Amuleke ndimulabikile kalabiko. Kuti mukonzye kukasandula mumazuba aali musanu aabili aapobwe, ndilamupa zigogo zyamulembo mubotu zili 30 azimwi zigogo zili 30. 13 Pesi kuti mukachilwe kundisandula, mulandipa zigogo zili 30 zyamulembo mubotu azimwi zili 30.” Bakati: “Tubuzye kalabiko kako. Tuyanda kukamvwa.” 14 Nkinkaako, wakati kulimbabo:
“Muli sikulya mwakazwa chakulya,
Muli singuzu mwakazwa zinono.”
Kwamazuba aatatu bakakachilwa kukasandula kalabiko kakwe. 15 Mubuzuba bwachine, bakabuzya mwanakazi waSamisoni kuti: “Kombelezya mulumaako, kuchitila kuti atubuzye nzikaamba kalabiko kakwe. Watachita oobo, iwe abamung’anda yawuso tulamutenta mumulilo. Mwakatutamba kuti muzootunyange zintu zyesu na?” 16 Nkinkaako, mwanakazi waSamisoni wakamulilila kati: “Ulandizonda; tundiyandi biya pe. Bantu bangu wakababuzya kalabiko, pesi tundibuzizye pe nzikaamba.” Mpawo wakamusandula kuti: “Ndilakubuzizyaanzi kakuli naba ndeende abaama tandibabuzizye pe, ndilakubuzizya muli kali biya?” 17 Pesi wakaliswini kumulilila mumazuba aakasyaala aapobwe lyamazuba aali musanu aabili. Kumamanino, wakamubuzya mubuzuba bwamusanu aabili, nkaambo wakali wamukataazya. Mpawo mwanakazi ooyo wakabuzya bantu bakulimbabo nzikaamba kalabiko aako. 18 Nkinkaako, mubuzuba bwamusanu aabili, zuba kalitanabbila,* baalumi bamumuunzi bakabuzya Samisoni kuti:
“Niinzi chinona kwiinda buchi,
Niinzi chili aanguzu kwiinda mulavu?”
Mpawo wakababuzya kuti:
“Kaansinga teemwalimya ng’ombe yangu mpwizi,
Teemwalikunooziziba pe nzikaamba kalabiko kangu.”
19 Mpawo muuya waJehova wakamupa manguzu, wakakunuka waya ku-Ashikkeloni waakujaya baalumi bali 30, mpawo wakabweza zigogo zyabo wazipa bantu bakapandulula nzikaamba kalabiko kakwe. Wakabweeda kung’anda yawisi kanyemede loko.
20 Mpawo mwanakazi waSamisoni wakapegwa kuli umwi wabasikumusindikila bakasindikide Samisoni.