KuBagalatiya
2 Mpawo nikwakayinda minyaka iili 14, ndakatanta lubo kandiya kuJerusalema kandilaamwi aBbanabbasi aTito. 2 Ndakatanta kandiya nkuko, akaambo kachiyubunuzyo alubo ndakababuzya makani mabotu ngindilikukambawuka aakati kazisi. Eezi ndakazichita chakusisikizya, pesi kunembo lyabaalumi balemekwa loko, kuchitila kuti zibe aantanganana kuti tandilikuchijaanina chintu chitawo pe naakuti teendakachijaanina chintu chitawo pe. 3 Nikuba oobo, naaba Tito ooyo wakali aandime, taakasungilizigwa kuti apalulwe pe, nikuba kuti wakali muGrikki. 4 Pesi kaambo aaka kakabuka akaambo kabakombima bakubeja, aabo bakeetwa chuumunizi mpawo basobelela kuti bazoolange-lange lwaangunuko ndutubotelwa katujisini aKkristu Jesu, kuchitila kuti batutole kubuzike chakumaninina. 5 Nikuba oobo, teetwakazumina pe kulibombya kulimbabo nikuba kwachiindi chifwiifwi,* kuchitila kuti kasimpe kamakani mabotu kayinkilile kunembo kakali aandinywe.
6 Pesi baalumi aabo bakali kubonekaanga balayandikana, baalumi balemekwa, taakwe chintu chipya nchibakandiyiisya pe. Kufumbwa kuti bakali bani, taakwe ambubabede pe kulindime, nkaambo Leza talangi mbaboneka muntu aanze. 7 Pesi nibakabona kuti ndakapedwe mulimu wakukambawuka makani mabotu kubantu batapalwidwe, mbuli Petro mbaakapedwe mulimu wakukambawuka makani mabotu kubantu bapalwidwe— 8 nkaambo ooyo wakapa Petro manguzu aabwaapostoli kubantu bapalwidwe, ngunguwe wakandipa manguzu andime kubantu bazisi— 9 alubo nibakabona luzyalo lupati ndundakatondeezedwe, Jakkobo, Kkefasi* aJohane, aabo bakali kubonwa kuti misemu* mumbungano, bakajata kuboko kwachilisyo kwaBbanabbasi akwangu kabalikutondeezya kuti tulaamwi, kuchitila kuti twiinke kubantu bazisi pesi bo bayinke kubantu bapalwidwe. 10 Nchibakatukumbila biyo nchakuti katuyeeya bantu bafwaba. Eezi biya nzizyo nzindilikusungwaalila kuchita.
11 Nikuba oobo, Kkefasi* naakaza ku-Antiyokkiya, ndakamululamika* katulangene nkaambo zyakali aantanganana kuti wakali kubisya. 12 Nkaambo kabatanasika bamwi baalumi bakali kuzwa kuli Jakkobo, wakali kulya abantu bazisi, pesi nibakasika wakaleka kulya aambabo, mpawo wakalitantamuna akaambo kakuyoowa kabunga kabantu bakapalwidwe. 13 Bamwi maJuda boonse ambabo bakaliswaanizya mukuupa-wupa ooku, zyakuti naaba Bbanabbasi wakabatobela mukuupa-wupa kwabo. 14 Pesi nindakabona kuti teebakali kweenda kweendelana akasimpe kamakani mabotu, ndakabuzya Kkefasi* kunembo lyabo boonse kuti: “Kuti iwe, numuJuda kuli kupona mbuli bantu bazisi kutali mbuli maJuda, nkamboonzi nulikusungilizya bantu bazisi kuti bapone kweendelana achiyanza chamaJuda?”
15 Iswe nitwakazyalwa katuli maJuda alubo nitutali basizibi bazwa kuli zimwi zisi, 16 tuzi kuti muntu waambwa kuti uliluleme kwiinda mukuba aalusyomo muli Jesu Kkristu kupela, kutali kwiinda mumilimu yamulawu. Nkinkaako, twabikka lusyomo lwesu muli Kkristu Jesu, kuchitila kuti twaambwe kuti tuliluleme kwiinda mukuba aalusyomo muli Kkristu, kutali kwiinda mumilimu yamulawu, nkaambo taakwe uutazoowambwe kuti uliluleme kwiinda mumilimu yamulawu. 17 Kuti kwajanika kuti andiswe tuli basizibi kakuli tuyanda kwaambwa kuti tuliluleme kwiinda muli Kkristu, zyaamba kuti Kkristu mubelesi wachibi na? Teembubo pe. 18 Kuti kandilikuziyaka lubo zintu nzindakamwaya, nkukwaamba kuti ndili sikusotoka mulawu. 19 Nkaambo kwiinda mumulawu ndakafwa kumulawu, kuchitila kuti ndibe muumi kuli Leza. 20 Ndiligankaminidwe aachisamu aamwi aKkristu. Takuchili ndime pe uulikupona pesi nguKkristu uulikupona aamwi andime. Kwaamba choonzyo, buumi mbundaabupona lino munyama, ndili kubupona kwiinda mukuba aalusyomo muMwana waLeza, ooyo wakandiyanda akupa buumi bwakwe akaambo kandime. 21 Tandilukaki* pe luzyalo lupati lwaLeza, nkaambo kuti bululami kabujanwa kwiinda mukutobela mulawu, nkukwaamba kuti Kkristu taakwe nchaakafwida pe.