Milimu yaBaapostoli
10 KuKkesariya kwakali umwi mwaalumi wakali kutegwa Kkoneliyasi wakali mupati wamasoja* wakabunga kaku-Itali.* 2 Mwaalumi ooyu wakalilipedelede muzintu zyabukombi alubo kayoowa Leza abamung’anda yakwe boonse. Wakali kupa zipo zyiingi zyalweetelelo alubo wakali kukomba nkombyo zyakukombelezya kuli Leza chiindi choonse. 3 Bumwi buzuba kuma 3 sikati,* wakayibona kabotu-kabotu ngilozi yaLeza muchilengaano, kayiza kulinguwe kayiti: “Kkoneliyasi!” 4 Kkoneliyasi wakayilangisisya kayoowede, mpawo wakati: “Niinzi Mwaami?” Mpawo yakati kulinguwe: “Nkombyo zyako azipo zyalweetelelo zyasika kuli Leza alubo ulaziyeeya. 5 Lino tuma bantu kuJopa kuti bakayite mwaalumi uutegwa Simoni, ooyo wiitwa kuti Petro. 6 Mwaalumi ooyu mweenzu kung’anda yaSimoni sikusuka zikumba, ulaang’anda iili kumbali aalwizi.” 7 Mbuyakeenda biyo ngilozi yakali kwaambuula aanguwe, wakayita babelesi bakwe babili amusoja uuyoowa Leza aakati kababelesi bakwe. 8 Wakababuzya zintu zyoonse eezi mpawo wakabatuma kuJopa.
9 Mubuzuba bwakatobela nibakali mulweendo lwabo, kabali baba aafwiifwi kuti basike mumuunzi, Petro wakatanta mung’anda yamujulu kuma 12 sikati* kuti akakombe. 10 Pesi wakaba aanzala mpati alubo wakayanda kulya. Nibakachili kujika, wakabona chilengaano. 11 Muchilengaano, wakabona julu kalijulikide mpawo chimwi chintu chili mbuli mulembo mupati chakaselusigwa aanyika kachijiswi kumabazu aane. 12 Muchintu eecho, mwakali banyama bamisyobo yoonse, bali aamawulu aane, abayavula aanyika, abayuni bakujulu. 13 Mpawo jwi lyakati kulinguwe: “Petro, buka ujaye ulye!” 14 Pesi Petro wakati: “Peepe Mwaami, tandinaba aabuzuba ndalya chintu chitazumizigwi aamulawu achitasalali pe.” 15 Mpawo jwi eelyo lyakaambuulaawe kachibili kaliti: “Leka kwaamba kuti zintu zyasalazigwa aaLeza tazisalali pe.” 16 Eezi zyakachitika kachitatu mpawo aachiindi eecho, chintu eecho chakatolwa kujulu.
17 Petro kachigambide kuti chilengaano nchaakabona chaambaanzi, baalumi bakatumidwe aaKkoneliyasi bakasika babuzya kwakabede ng’anda yaSimoni kabayimvwi aageedi. 18 Bakayita mwining’anda mpawo bakamubuzya kuti, ulaamweenzu na uutegwa Simoni, ooyo wiitwa kuti Petro. 19 Petro naakachili kuyeeyesesya atala achilengaano eechi, muuya wakati: “Bona! Kuli baalumi batatu balikukuyanduula. 20 Nyampuka, useluke mpawo wiinkaabo, utayeeyi tubili pe nkaambo ndime ndabatuma.” 21 Petro wakaseluka waya kubaalumi aabo mpawo wakati kulimbabo: “Muntu ngumuli kuyanduula ndime. Kujana ndamugwasyaanzi?” 22 Bakati kulinguwe: “Kkoneliyasi mupati wamasoja, mwaalumi uululeme alubo uuyoowa Leza, ulaampuwo mbotu muchisi choonse chamaJuda, wakapegwa malayilile aLeza kabelesya ngilozi iisalala kuti azookwiite kuti uze kung’anda yakwe kuchitila kuti azoomvwe nzutamubuzye.” 23 Nkinkaako, wakati banjile mung’anda alubo bakakkala kabali beenzu bakwe.
Mubuzuba bwakatobela, wakanyampuka wayinkaabo mpawo bamwi bakombinyina bamuJopa bakayinkaamwi anguwe. 24 Mpawo mubuzuba bwakatobela, wakanjila muKkesariya. Kkoneliyasi wakali kubalindila alubo wakatambide babbululu bakwe abeenzinyina. 25 Petro naakanjila, Kkoneliyasi wakamutambula mpawo wakawida kumawulu aakwe mpawo wakamufugamina.* 26 Pesi Petro wakamubusya kati: “Nyampuka, andime ndili muntu biyo mbuli nduwe.” 27 Naakali kwaambuula aanguwe, wakanjila mung’anda mpawo wakabona bantu biingi bakabungene. 28 Mpawo wakati kulimbabo: “Muzizi kabotu kuti tazili mumulawu pe kuti muJuda aliswaanizye naakuti aswene aafwiifwi amuntu wawumwi musyobo, pesi Leza wanditondeezya kuti taakwe muntu ngundeelede kwaamba kuti tasalali pe. 29 Nkinkaako, teendakakaka pe nibakandiita kuti ndize ookuno. Lino amundibuzye, mwandiitilaanzi?”
30 Mpawo Kkoneliyasi wakati: “Mazuba aane aayinda, kuti katubala kuzwa ku-awa eeyi, ndakali kukomba mung’anda yangu kuma 3 sikati,* mpawo aachiindi eecho, umwi mwaalumi wakazweete zigogo zing’ayima wakayimikila kunembo lyangu, 31 mpawo wakati: ‘Kkoneliyasi, nkombyo yako yamvwigwa alubo Leza waziyeeya zipo zyako zyalweetelelo. 32 Nkinkaako, tuma bantu kuJopa kuti bakayite Simoni, ooyo wiitwa kuti Petro. Mwaalumi ooyu, mweenzu mung’anda yaSimoni sikusuka zikumba uukkala kumbali aalwizi.’ 33 Mpawo aachiindi nchicheecho, ndakatuma bantu kuti bazookwiite. Wachita kabotu wasika. Lino twabungana toonse kunembo lyaLeza, kuti tumvwe zintu zyoonse nzwaakalayililwa aaJehova* kuti waambe.”
34 Mpawo Petro wakasaanguna kwaambuula. Wakati: “Lino ndamvwisisisya choonzyo kuti Leza tasaluuli pe, 35 pesi muzisi zyoonse kufumbwa muntu uumuyoowa akuchita chintu chilikabotu, ulatambulika kulinguwe. 36 Leza wakatuma jwi kubana ba-Israyeli kuti akaambilizye makani mabotu aaluumuno kulimbabo kwiinda muli Jesu Kkristu, Mwaami waboonse. 37 Muliizi nkani yakali kwaambuulwa muJudiya yoonse kusaangunina kuGalili, Johane kali wamaninsya kukambawuka atala akubbabbatizigwa. 38 Nkani eeyi ili atala aJesu wakuNazareta, Leza mbaakamunanika muuya uusalala amanguzu, ambaakeenda munyika eeyo kalikuchita zintu zibotu akuponia bantu boonse bakali kudyaamininwa aaDyabbulosi nkaambo Leza wakali aanguwe. 39 Iswe tuli bakamboni bazintu zyoonse nzyaakachita munyika yamaJuda amuJerusalema. Nikuba oobo, bakamujaya kwiinda mukumugankamina* aachisamu.* 40 Mpawo Leza wakamubusya mubuzuba bwachitatu alubo wakapa kuti alitondeezye,* 41 kutali kubantu boonse pe, pesi kuli bakamboni mbaakasalide Leza kakuchili chiindi, kulindiswe nitwakalyaawe akunywaawe naakabuka kuzwa kubafu. 42 Alubo wakatulayilila kuti tukambawuke kubantu akuti tupe bukamboni buzwide bwakuti ooyu ngunguwe wakasalwa aaLeza kuti abe mubetesi wabawumi abafwide. 43 Bapolofita boonse balikupa bukamboni atala anguwe, bwakuti muntu woonse uumusyoma ulalekelelwa zibi kwiinda muzina lyakwe.”
44 Petro kachaambuula atala amakani aaya, muuya uusalala wakabasikila boonse bakali kuswiilila jwi. 45 Basyomi boonse bakapalwidwe bakazide aaPetro bakagamba nkaambo chipo chitabbadalwi chamuuya uusalala chakali kutilwa nikuba kubantu bazisi. 46 Nkaambo bakabamvwa kabaambuula imwi milaka* kabalikulumbayizya Leza. Mpawo Petro wakati: 47 “Mpali na uunga ulakasya bantu aaba kuti babbabbatizigwe aamaanzi, mbukunga ambabo batambula muuya uusalala mbuli ndiswe?” 48 Mpawo Petro wakalayilila kuti babbabbatizigwe muzina lyaJesu Kkristu. Alubo bakamukumbila kuti akkale aambabo kwamazuba.