Lwakusaanguna kuBatesalonikka

1 Ndime Pawulu, kandilaamwi aSilvano* aTimoti, ndilikumulembela nimbungano yabantu bakuTesalonikka iijisini aamwi aLeza Taata aMwaami Jesu Kkristu:

Amube aaluzyalo lupati aluumuno.

2 Chiindi choonse tulamulumba Leza nitumwaamba moonse munkombyo zyesu, 3 nkaambo tukkala katuyeeya milimu yanu yalusyomo, milimu yanu yaluyando akulisimya kwanu akaambo kabulangilizi bwanu muMwaami wesu Jesu Kkristu kunembo lyaLeza wesu aTaata. 4 Nkaambo tulizi nibakombima bayandwa aaLeza, kuti nguwe wakamusala, 5 nkaambo makani mabotu ngitukambawuka, taakasika kulindinywe amajwi kupela, pesi akasika aamanguzu alubo amuuya uusalala alubo katuli aachoonzyo chikkwene, mbuli mbumuzi kuti twakaba bantu bali biyeni aakati kanu akaambo kandinywe. 6 Mwakatobelezya chikozyano chesu achaMwaami, nkaambo mwakatambula jwi kamukondwa akaambo kamuuya uusalala, nikuba kuti mwakali kuswaana mapenzi miingi, 7 zyakuti mwakaba chikozyano kubasyomi boonse kuMakkedoniya aku-Akkaya.

8 Kwaamba choonzyo, jwi lyaJehova* lizwa kulindinywe, teelyamvwigwa kuMakkedoniya aku-Akkaya kupela, pesi alusyomo lwanu muli Leza lwazula mundawu zyoonse, zyakuti tatuchikwe zyakwaamba pe. 9 Nkaambo bakkala kabaambuula atala ambutwakabonana aandinywe kakusaanguna, ambumwakasandukila kuli Leza kamusiya zibumbwa zyanu kuti mubelekele Leza wakasimpe uupona, 10 akuti mulindile Mwanaakwe kuzwa kujulu, ngwaakabusya kuzwa kubafu, nkukwaamba Jesu, ooyo uutuvuna kubukali bulikuza.