Lwabili kuBakkorinte
4 Nkinkaako, mbukunga tuli aamulimu ooyu ngutwakapegwa akaambo kaluzyalo ndutwakatondeezegwa, tatuleki pe. 2 Pesi twakazikaka zintu zipa bweeme zichitwa chakusisikizya alubo tatucheendi munzila yalweeno katulikubisya jwi lyaLeza, pesi kwiinda mukupa kuti kasimpe kazibinkane, twaba chikozyano chibotu mumyoyo* yabantu boonse, kunembo lyaLeza. 3 Kuti kachili choonzyo kuti makani mabotu ngitukambawuka alivumbidwe amulembo, nkukwaamba kuti alivumbidwe kuli baabo balikunyonyoonwa, 4 batasyomi, aabo leza wabwiime bwazintu oobuno* mbaawofwaazya mizeezo, kuchitila kuti mumuni wabulemu bwamakani mabotu aali atala aKkristu, ooyo uulimuchikozyano chaLeza utabamunikili pe. 5 Nkaambo tatuli kukambawuka atala andiswe pe, pesi tulikukambawuka atala aJesu Kkristu kuti Mwaami, akuti tulibazike banu akaambo kaJesu. 6 Nkaambo Leza nguwe wakaamba kuti: “Mumuni awumweke mumudima,” alubo wakamunika myoyo yesu kuchitila kuti imweke aabulemu bwaluzibo lwaLeza kabelesya kumeso kwaKkristu.
7 Nikuba oobo, tuli aabunoti oobu muzibelesyo zyabulongo,* kuchitila kuti manguzu aayinda manguzu eesu abe aaLeza, kutali eesu pe. 8 Tulasyanikizigwa munzila zyoonse pesi tatumanikide zyakuti tatukonzyi pe kweenda, tulibulide kuti tulachita biyeni, pesi tazyaambi kuti taakwe nzila yakuzwaayo* pe, 9 tulapenzegwa, pesi tatulekelezegwi pe, tulazintilwa aansi pesi tatunyonyooki pe. 10 Chiindi choonse tulalisimya mumibili yesu kumapenzi aapa kuti tujayigwe aali mbuli ngaakaswaana Jesu, kuchitila kuti buumi bwaJesu buboneke mumibili yesu. 11 Nkaambo iswe nitupona, tukkala katulangene aalufu akaambo kaJesu, kuchitila kuti buumi bwaJesu buboneke mumibili yesu iifwa. 12 Nkinkaako, lufu lulikubeleka mulindiswe, pesi kulindinywe mbuumi.
13 Mbukunga iswe tuli aamuuya walusyomo uukozyenie ayooyo uulembedwe atala anguwo kuti: “Ndakatondeezya lusyomo nkinkaako ndakaambuula,” andiswe tutondeezya lusyomo nkinkaako tulaambuula, 14 nkaambo tulizi kuti Ooyo wakabusya Jesu, uzootubusya aamwi aJesu alubo uzootutola kulinguwe katulaamwi andinywe. 15 Nkaambo zintu zyoonse eezi zilikuchitika akaambo kandinywe, kuchitila kuti luzyalo lupati lwiingi, luyungizye kuvula nkaambo bantu biingi balikulumba Leza alubo eezi zyapa kuti alemekwe.
16 Nkinkaako tatuleki pe, pesi nikuba kuti muntu ngutubede aanze ulikunyonyooka, pesi muntu ngutubede mukati ulikubusilizigwa buzuba-abuzuba. 17 Nkaambo nikuba kuti mapenzi ngachiindi chifwiifwi alubo mawuba, apa kuti tube aabulemu bupati loko buli kuvula alubo butamani, 18 nitwiinkilila kunembo kulanga zintu zitaboneki kutali zintu ziboneka. Nkaambo zintu ziboneka nzyachiindi chifwiifwi, pesi zintu zitaboneki tazimani pe.