KuBagalatiya
4 Lino ndaamba kuti, kufumbwa kuti sikukona kachili mwana, tasiyene pe amuzike nikuba kuti mwaami wazintu zyoonse, 2 pesi nga uchili mumaboko aabantu bamulelede abalangizi, kusikila buzoosike buzuba wisi mbwaakasala kakuchili chiindi. 3 Munzila iikozyenie, andiswe nitwakachili bana, twakali bazike bazintu zyakusaanguna zyanyika. 4 Pesi nichakasika chiindi chibikkidwe, Leza wakatuma Mwanaakwe, ooyo wakazyalwa aamwanakazi alubo wakali aansi aamulawu, 5 kuti aangunune aabo bali aansi aamulawu kwiinda mukubawula, kuchitila kuti atutambule mbuli bana bakwe.
6 Mbukunga lino muli bana, Leza watuma muuya waMwanaakwe mumyoyo yesu alubo muuya ooyo uloompolola kawuti: “Abba,* Taata!” 7 Nkinkaako, iwe tawuchili muzike pe, pesi waba mwana. Kuti kuli mwana, nkukwaamba kuti ulisikukona kwiinda muli Leza.
8 Nikuba oobo, kamutanamuziba pe Leza, mwakali bazike kuli baabo batali baleza pe. 9 Pesi lino, mbukunga mwasika aakuziba Leza, naakuti ndaambe kuti, mwasika aakuzibwa aaLeza, nkamboonzi nimulikubweeda lubo kuzintu zyakusaanguna zitakwe manguzu alubo zitagwasyi kuti mube bazike bazyo? 10 Mulikwaabamba kabotu-kabotu mazuba, myeezi, ziindi aminyaka. 11 Ndilikataazikene akaambo kandinywe, kuti amwi ndakasaanisya chiindi changu aalindinywe.
12 Bakombima ndakombelela, amube mbuli ndime nkaambo andime ndakali mbuli ndinywe. Taakwe chintu nchimwakandibisizya pe. 13 Pesi mulizi kuti ndakajana mweenya wakuti ndaambilizye makani mabotu kulindinywe kakusaanguna, akaambo kakuchiswa nkundakachita. 14 Nikuba kuti kuchiswa kwangu lyakali sunko kulindinywe, teemwakandisesemwa pe naakuti kundinyanya,* pesi mwakanditambula mbuli ngilozi yaLeza, mbuli Kkristu Jesu. 15 Kubotelwa ookuya nkumwakali aako, kwakaya kuli? Nkaambo kwaamba choonzyo, ndilikupa bukamboni kuti kaansinga zyakali kuchita, nikuli mwakagwisya meso aanu akundipa. 16 Lino ndaba sinkondonyokwe na akaambo kakuti ndamubuzya choonzyo? 17 Baalumi aaba balikusungwaalila kuti mube kubbazu lyabo, kutali aamakanze mabotu. Bayanda kumugwisya kulindime kuchitila kuti musungwaalile kubatobela. 18 Nikuba oobo, zilikabotu kuti chiindi choonse muntu asungwaalile kuti mube kubbazu lyakwe, akaambo kamakanze mabotu kutali chiindi nindili aandinywe kupela, 19 inywe nibana bangu, nimwapa kuti ndimyongwe mbuli mbamyongwa mwanakazi uuyanda kutumbuka, kusikila Kkristu abumbwe mulindinywe. 20 Ndilombozya kuti kaansinga ndilaandinywe lino, kuti ndaambuule aandinywe muliimwi nzila, nkaambo ndiligambide akaambo kandinywe.
21 Inywe nimuyanda kuba aansi aamulawu, amundibuzye, Tamuzi na kuti Mulawu utyeni? 22 Muchikozyano, kulilembedwe kuti Abbrahamu wakali aabana babili, umwi wakali wamubelesi musimbi mpawo umwi wakali wamwanakazi waangunukide, 23 pesi mwana wamubelesi musimbi wakazyalwa mbuli mbubazyalwa bana boonse alubo mwana wamwanakazi waangunukide wakazyalwa kwiinda muchisyomezyo. 24 Zintu eezi zyakachitika nchikozyanisyo, nkaambo banakazi aaba bayiminina zizuminano zibili. Chimwi nchakuChilundu chaSinayi chizyala bana babuzike alubo nguHagari. 25 Hagari wiiminina Sinayi, chilundu chili mu-Arabbiya alubo weendelana aaJerusalema yasunu nkaambo we ulimubuzike abana bakwe. 26 Pesi Jerusalema wakujulu ulaangunukide alubo mbiibaama.
27 Nkaambo kulilembedwe kuti: “Botelwa nungomwa numwanakazi uutazyali, lizya mimpululu akukondwa numwanakazi uutaazi pe machise aakutumbuka, nkaambo bana bamwanakazi uusiidwe, mbiingi loko kwiinda bamwanakazi ulaamulumi.” 28 Nkinkaako bakombima, inywe muli bana bachisyomezyo mbuli mbaakabede Izakka. 29 Pesi mbuli mbukwakabede kuchiindi eecho, kuti ooyo wakazyalwa mbuli mbubazyalwa bana boonse, wakasaanguna kupenzya ooyo wakazyalwa kwiinda mumuuya, mbukwaba akulindinywe lino. 30 Nikuba oobo, lugwalo lutyeni? Lwaamba kuti: “Mutande mubelesi musimbi amwanaakwe, nkaambo tazichiti pe kuti mwana wamubelesi musimbi abe sikukonaamwi amwana wamwanakazi waangunukide.” 31 Nkinkaako bakombima, iswe tatuli bana bamubelesi musimbi pe, pesi tuli bana bamwanakazi waangunukide.