Chiyubunuzyo chaJohane
14 Mpawo nindakalanga, ndakabona Mwanaambelele kayimvwi aaChilundu chaZiyoni, kalaamwi abali 144 000, balembedwe zina lyakwe azina lyaWisi aankumu zyabo. 2 Ndakamvwa musindo wakali kuzwa kujulu, wakali mbuli musindo wakuvuuma kwamaanzi miingi alubo wakali mbuli musindo wakudilima kupati, alubo musindo ngundakamvwa wakali mbuli wabasikwiimba bakali kwiimba kumwi kabali kuuma tuntimbwa twabo. 3 Alubo bakali kwiimba lwiimbo lwakali kumvwikka mbuli lwiimbo lupya kunembo lyachuuno chabwaami, akunembo lyazilenge zyuumi zine, abaalu, alubo taakwe wakakonzya kuluziba pe lwiimbo oolo, kunze kwabali 144 000, aabo bakali bawulwa kuzwa aanyika. 4 Aaba mbimbabo bakatalibisya aabanakazi, kwaamba choonzyo, mbaanakalindu. Aaba mbimbabo bayinkilila kunembo kutobela Mwanaambelele kufumbwa nkwaya. Aaba bakawulwa kuzwa aakati kabantu kabali michelo yakusaanguna kuli Leza akuMwanaambelele, 5 alubo taakwe lweeno lwakajanika munkanwa lyabo, tabakwe bubi pe.
6 Alubo ndakabona imwi ngilozi kayiwuluka mumulenga-lenga* alubo yakali aamakani mabotu aatamani aakwaambilizya kuli baabo bakkala aanyika kuzisi zyoonse akumisyobo yoonse akumilaka yoonse akubantu boonse. 7 Ngilozi eeyo yakali kuti ajwi pati: “Amuyoowe Leza, mumupe bulemu nkaambo awa yakubetekwa aanguwe yasika, nkinkaako, amukombe Ooyo wakalenga julu anyika alwizi atusawu twamaanzi.”
8 Imwi ngilozi yachibili yakatobela kayiti: “Wawa! Bbabbiloni Mupati wawa, ooyo wakapa kuti zisi zyoonse zinywe wayini yachiyandisyo chakwe chakuchita bwaamu!”*
9 Imwi ngilozi yachitatu yakazitobela kayiti ajwi pati: “Kuti muntu wakomba munyama achifanikisyo chawo akutambula chitondeezyo aankumu yakwe naakuti kukuboko kwakwe, 10 uzoonywa wayini yabukali bwaLeza iitazootilwe kayitaswaanizidwe aachimwi chintu pe munkomeki yabukali bwakwe, alubo uzoopenzegwa aamulilo asalufa kunembo lyangilozi zisalala akunembo lyaMwanaambelele. 11 Busi bwakupenzegwa kwabo bulawuntumuka kusikila kukabe kutamani, alubo sikati amansiku tabapumuni pe, aabo bakomba munyama achifanikisyo chawo, kuswaanizya amuntu woonse uutambula chitondeezyo chazina lyamunyama. 12 Aawa mpaayandikana kuti basalali balisimye, aabo babamba milawu yaLeza abajisilidi kulusyomo lwaJesu.”
13 Alubo ndakamvwa jwi kuzwa kujulu kaliti, “Lemba kuti: Balabotelwa bafwide, aabo bafwa kabajisini aamwi aMwaami kuzwa kuchiindi eechino kaziya kunembo. Kwaamba choonzyo, muuya waamba kuti, abapumune kuzwa kumilimu yabo, nkaambo zintu nzibakachita zyeendaamwi ambabo.”
14 Mpawo nindakalanga, ndakabona joba lituba alubo ooyo wakakkede aajoba eelyo wakali mbuli mwanaamuntu, wakali angowani yabwaami yangolida* kumutwe asikela libosya mukuboko kwakwe.
15 Imwi ngilozi yakazwa mundawu iisalala yatempele kayilikoompolola ajwi pati kuli yooyo wakakkede aajoba, kayiti: “Njizya sikela lyako utebule, nkaambo awa yakutebula yasika, nkaambo zilyo zyanyika zyabizwa zyoonse.” 16 Mpawo ooyo wakakkede aajoba wakanjizya sikela lyakwe munyika, mpawo nyika yakatebulwa.
17 Alubo, imwi ngilozi yakazwa mundawu iisalala yatempele iili kujulu, anjiyo yakali aasikela libosya.
18 Alubo imwi ngilozi yakazwa aachipayililo, alubo yakali aamanguzu akweendelezya mulilo. Mpawo yakoompolola ajwi pati kuli yooyo wakajisi sikela libosya, kayiti: “Njizya sikela lyako unenge zikama zyamusaansa waanyika nkaambo masaansa aawo abizwa.” 19 Ngilozi eeyo yakanjizya sikela lyayo munyika, mpawo yakanenga musaansa waanyika, alubo yakawuwaalila muchikandilo chawayini chipati chakunyema kwaLeza. 20 Chikandilo chawayini chakalyatuukwa-lyatuukwa aanze aamuunzi, mpawo ganzi lyakazwa muchikandilo eecho lyakatanta lyasika mumatomu aamabbiza, alubo lyakeenda kwamusinzo uulampa makkilomita aali 296.*