Kulonga
40 Mpawo Jehova wakati kuli Mozesi: 2 “Mubuzuba bwakusaanguna bwamweezi wakusaanguna, wiimikizye tente lyakukombela, nkukwaamba tente lyakuswaanganina. 3 Ubikke bbokesi lyaBukamboni mukati mpawo ulijale aakketeni. 4 Unjizye tebbulu mpawo zintu zyalyo uzibikke kabotu-kabotu alubo unjizye chibikkilo chamalambe ulayite malambe aacho. 5 Mpawo ubikke chipayililo changolida chakutentela tununkilizyo kunembo lyabbokesi lyaBukamboni mpawo ubikke kketeni kumanjililo aatente lyakukombela.
6 “Ubikke chipayililo chazipo zitentwa kunembo aamanjililo aatente lyakukombela, nkukwaamba tente lyakuswaanganina, 7 ubikke bbavu aakati katente lyakuswaanganina achipayililo mpawo utile maanzi mulindilyo. 8 Wiimikizye lubuwa lulizyunguluka mpawo ubikke kketeni kumanjililo aalubuwa oolo. 9 Nwaamaninsya, ubweze mafuta aakunanika unanike tente lyakukombela azintu zyoonse zili muli ndilyo. Ulisalazye azibelesyo zyalyo zyoonse kuchitila kuti libe chintu chisalala. 10 Unanike chipayililo chazipo zitentwa azibelesyo zyacho zyoonse uchisalazye kuchitila kuti chibe chipayililo chisalalisya. 11 Unanike bbavu achikkalilo chalyo ulisalazye.
12 “Mpawo weete Aroni abana bakwe aafwiifwi amanjililo aatente lyakuswaanganina ubasanzye aamaanzi. 13 Uzwaatike Aroni zigogo zisalala alubo umunanike akumusalazya mpawo ulandibelekela kali mupayizi. 14 Nwaamaninsya, weete bana bakwe aafwiifwi ubazwaatike zigogo zilamfu. 15 Weelede kubananika mbuli mbutananike wisi, kuchitila kuti bandibelekele kabali bapayizi alubo kunanikwa kwabo kulapa kuti bupayizi bukkale kabuli bwabo mumazyalani aabo.”
16 Mozesi wakachita kweendelana azintu zyoonse Jehova nzyaakamulayilila. Wakachita mbuboobo.
17 Tente lyakukombela lyakayimikizigwa mumweezi wakusaanguna mumunyaka wachibili mubuzuba bwakusaanguna. 18 Mozesi naakayimikizya tente lyakukombela, wakabikka zikkazikizyo zyalyo aansi, mpawo wayimikizya mafulemu aalyo akusekka mbalo zyalyo alubo wakayimikizya mapila aalyo. 19 Wakavumba mafulemu aatente lyakukombela kabelesya mulembo watente mpawo wakabikka chivumbyo aajulu aawo, mbuli Jehova mbaakalayilila Mozesi.
20 Naakamaninsya kuchita zintu eezi, wakabweza mabwe aaBukamboni akwaabikka muBbokesi mpawo wakanjizya tusamu aaBbokesi eelyo alubo wakabikka chivunisyo aajulu aalyo. 21 Mpawo wakanjizya Bbokesi mutente lyakukombela wabikka kketeni aandawu yalyo kuti lisite bbokesi lyaBukamboni mbuli Jehova mbaakayilila Mozesi.
22 Wakanjizya tebbulu mutente lyakuswaanganina kubbazu lyakunyika lyatente lyakukombela kunembo lyakketeni, 23 mpawo zinkwa wakazibikka kabotu-kabotu aalindilyo kunembo lyaJehova mbuli Jehova mbaakalayilila Mozesi.
24 Wakabikka chibikkilo chamalambe mutente lyakuswaanganina kunembo lyatebbulu kumusanza kwatente lyakukombela. 25 Wakalayita malambe kunembo lyaJehova, mbuli Jehova mbaakalayilila Mozesi.
26 Mpawo wakabikka chipayililo changolida mutente lyakuswaanganina kunembo lyakketeni, 27 kuchitila kuti tununkilizyo tusuke busi aali nchicho, mbuli Jehova mbaakalayilila Mozesi.
28 Mpawo wakabikka kketeni lyakumanjililo aatente lyakukombela aandawu yalyo.
29 Wakabikka chipayililo chazipo zitentwa kumanjililo aatente lyakukombela, nkukwaamba tente lyakuswaanganina kuchitila kuti ape chipo chitentwa achipo chazilyo aali nchicho, mbuli Jehova mbaakalayilila Mozesi.
30 Wakabikka bbavu aakati katente lyakuswaanganina achipayililo, mpawo wakatila maanzi aakusamba mulindilyo. 31 Mozesi a-Aroni abana bakwe bakasamba kumaboko akumawulu aali ndilyo. 32 Kufumbwa nibakali kunjila mutente lyakuswaanganina naakuti kuya kuchipayililo, bakali kusamba aali ndilyo mbuli Jehova mbaakalayilila Mozesi.
33 Kumamanino, Mozesi wakayimikizya lubuwa luzyunguluka tente lyakukombela achipayililo alubo wakabikka kketeni kumanjililo aalubuwa.
Nkinkaako, Mozesi wakawumaninsya mulimu. 34 Mpawo joba lyakavumba tente lyakuswaanganina alubo bulemu bwaJehova bwakazula mutente lyakukombela. 35 Mozesi taakakonzya pe kunjila mutente lyakuswaanganina, nkaambo joba lyakachili aali ndilyo alubo bulemu bwaJehova bwakazula mutente lyakukombela.
36 Mulweendo lwabo loonse, joba nilyakali kunyampuka kuzwa aatente lyakukombela, ma-Israyeli bakali kunyampuka akweenda. 37 Pesi kuti teelyanyampuka, teebakali kweenda pe kusikila mubuzuba nilinyampuka. 38 Nkaambo joba lyaJehova lyakali aajulu aatente lyakukombela sikati, mpawo mulilo wakali aajulu aatente mansiku alubo ma-Israyeli boonse bakali kuzibona mulweendo lwabo loonse.