KuMahebberu
3 Nkinkaako, nibakombima basalala, nibasikutola lubazu mukwiitwa kwakujulu,* amuyeeye Jesu mwaapostoli amupayizi mupati ooyo ngutuzumina. 2 Wakali kusyomeka kuli Yooyo wakamusala, mbuli mbaakali kusyomeka Mozesi mung’anda yoonse yaLeza. 3 Nkaambo ubonwa* kuti uli aabulemu bupati kwiinda Mozesi, mbukunga ooyo uuyaka ng’anda uli aabulemu bupati kwiinda ng’anda lwayo. 4 Nichoonzyo kuti ng’anda imwi ayimwi kuli wakayiyaka, pesi ooyo wakayaka zintu zyoonse nguLeza. 5 Mozesi wakali kusyomeka kali mubelesi mung’anda yoonse yaLeza. Nzyaakachita bwakali bukamboni bwazintu zyakali kuzoowambwa kunembo, 6 pesi Kkristu wakali kusyomeka mbuli mwana mung’anda yaLeza. Kwaamba choonzyo, iswe tuli ng’anda Yakwe kuti twakakatila kulwaangunuko lwakwaambuula ndutulaalo akubulangilizi mbutulidundaabo kusikila kumamanino.
7 Nkinkaako, mbuli mbuuwamba muuya uusalala kuti, “Sunu kuti mwaswiilila jwi lyakwe, 8 mutayumyi myoyo yanu pe mbuli kuchiindi eechiya nibakandinyemya loko, mbuli mubuzuba nibakandisunka munkanda, 9 ooko masianyookulu nkubakandisunka, nikuba kuti bakali babona milimu yangu kwaminyaka iili 40. 10 Nchilyakandisesemya zyalani eeli, mpawo ndakati: ‘Bakkala kabaleya mumyoyo yabo, alubo tabanaziziba pe nzila zyangu.’ 11 Nkinkaako, ndakakonka kandinyemede kuti: ‘Tabakanjili pe mukupumuna kwangu.’”
12 Amuchenjele bakombima, kuti aakati kanu kutabi muntu uuba aamoyo mubi uutakwe lusyomo kwiinda mukuzwa kuli Leza uupona, 13 pesi amwiinkilile kunembo kusungwaazyania buzuba abuzuba, kufumbwa kakuchaambwa kuti “Sunu,” kuchitila kuti kutabi naaba uumwi aakati kanu uuba aamoyo muyumu akaambo kakweenwa aamanguzu aachibi. 14 Nkaambo tuba basikutola lubazu aamwi aKkristu, kuti biyo twakakatila kusikila kumamanino kulusyomo ndutwakalaalo kumasaangunino. 15 Mbuli mbukwakaambwa kuti, “Sunu kuti mwaswiilila jwi lyakwe, mutayumyi myoyo yanu pe mbuli kuchiindi eechiya nibakandinyemya loko.”
16 Nkaambo mbaani bakamvwa pesi bamunyemya loko? Teeboonse na bakazwa mu-Ijipita kabazulwidwa aaMozesi? 17 Mukuyungizya, mbaani bakasesemya Leza kwaminyaka iili 40? Teebaabo bakabisya na, bakafwida munkanda? 18 Alubo nkuuli bani nkwaakakonka kuti tabakanjili pe mukupumuna kwakwe? Teekuli baabo bakataswiilila na? 19 Nkinkaako, twabona kuti teebakanjila pe akaambo kakubula lusyomo.