Kulonga
30 “Weelede kupanga chipayililo chamukoka chakutentela tununkilizyo. 2 Cheelede kuba aamabazu aane aayelene. Cheelede kulampa kkiyubbiti* iimwi, busasa bwacho bube kkiyubbiti iimwi mpawo kuya mujulu chilampe makkiyubbiti aabili, meja aacho ayelede kujatana aacho. 3 Weelede kuchizilulula aangolida iisalalisya aajulu amumabazu aacho woonse ameja aacho alubo weelede kupanga mumpimpito wangolida uuchizyunguluka. 4 Ubikke maring’i aabili aangolida munsi aamumpimpito kubbazu limwi alimwi lyamabazu aabili aalangene mutazoonjizigwe tusamu tutazoobelesegwe kuchinyampula. 5 Upange tusamu twamukoka utuzilulule aangolida. 6 Uchibikke kunembo lyakketeni lili aafwiifwi abbokesi lyaBukamboni kunembo lyachivunisyo chabbokesi lyaBukamboni, aawo mpunditalitondeezye kulinduwe.
7 “Aroni weelede kutenta tununkilizyo aali nchicho, kuchitila kuti tusuke busi nabamba malambe kuseeni buzuba abuzuba. 8 Aroni weelede kututenta lubo tununkilizyo goko* chiindi nalayita malambe. Eechi nchipo chatununkilizyo cheelede kukkala kachipegwa kunembo lyaJehova mumazyalani aanu woonse. 9 Mutatenti tununkilizyo tutazumizigwi nichiba chipo chitentwa nichiba chipo chazilyo naakuti kutila chipo chinywigwa aali nchicho. 10 Aroni weelede kusalazya chipayililo kuzwa kuzibi kwiinda mukulamba limwi ganzi lyachipayizyo chazibi chakumaninsya milandu aameja aacho. Weelede kuchita oobo kamwi amunyaka mumazyalani aanu woonse kabelesya limwi ganzi lyachipayizyo chazibi chakumaninsya milandu. Nchipayililo chisalalisya kuli Jehova.”
11 Jehova wakati kuli Mozesi: 12 “Nimubala ma-Israyeli, muntu umwi awumwi weelede kupa chinunuzyo chabuumi bwakwe kuli Jehova, kuchitila kuti batasikilwi aachipenzyo nibali kubalwa. 13 Nzezi nzibeelede kupa bantu boonse batabalwe: hafu yashekeli,* nkukwaamba shekeli lyamundawu iisalala.* Magera aali makumi aabili* ayelene aashekeli limwi. Hafu yashekeli yeelede kupegwa Jehova. 14 Muntu woonse uutabalwe uuli aaminyaka iili 20 kaziya kunembo, weelede kugwisya chipo chaJehova. 15 Banotede tabeelede kupa zyiingi pe alubo bafwaba tabeelede kupa Jehova zili aansi aahafu yashekeli* kuti banunune buumi bwabo. 16 Weelede kubweza mali yansiliva yakunununa buumi, kuti ibelesegwe kumilimu yatente lyakuswaanganina, kuchitila kuti ma-Israyeli bayeeyegwe aJehova akuti banunune buumi bwabo.”
17 Jehova wakayinkilila kunembo kubuzya Mozesi kuti: 18 “Upange bbavu lyakkopa lyakusambila achikkalilo chalyo, ulibikke aakati katente lyakuswaanganina achipayililo, mpawo utile maanzi mulindilyo. 19 Aroni abana bakwe beelede kusamba kumaboko akumawulu mpawaawo. 20 Nibanjila mutente lyakuswaanganina naakuti nibaya kuchipayililo kuti bakabeleke akupa zipo zitentwa kuli Jehova, beelede kusamba kuti batafwi. 21 Beelede kusamba kumaboko akumawulu kuti batafwi, ooyu mulawu ngwayelede kutobela Aroni abana bakwe mumazyalani aabo woonse.”
22 Jehova wakayinkilila kunembo kubuzya Mozesi kuti: 23 “Ubweze zintu zinunkilila: mure iilema mashekeli aali 500, sinamoni iinunkilila iilema mashekeli aali 250 akkalamasi iinunkilila iilema mashekkeli aali 250 24 amakkasiya aalema mashekeli aali 500, uzipime kubelesya shekeli lyamundawu iisalala* aamwi ahini* yamafuta aama-olifa. 25 Mpawo uziswaanizye kabotu-kabotu* kuti upange mafuta aakunanika aasalala. Aaya mafuta aakunanika aasalala.
26 “Waabelesye kunanika tente lyakuswaanganina abbokesi lyaBukamboni 27 kuswaanizya atebbulu azibelesyo zyalyo achibikkilo chamalambe azibelesyo zyacho achipayililo chatununkilizyo 28 achipayililo chazipo zitentwa azibelesyo zyacho abbavu achikkalilo chalyo. 29 Weelede kuzisalazya kuti zibe zintu zisalalisya. Kufumbwa uuziguma weelede kuti kasalala. 30 Weelede kunanika Aroni abana bakwe, kuchitila kuti bandibelekele kabali bapayizi.
31 “Weelede kubuzya ma-Israyeli kuti, ‘Aaya ayelede kuba mafuta aakunanika aasalala kulindime mumazyalani aanu woonse. 32 Taayelede kunanwa aamubili wamuntu pe alubo mutapangi kufumbwa chintu chili aazintu zibelesegwa kwaapanga. Alasalala. Ayelede kukkala kaasalala mumeso aanu. 33 Kufumbwa muntu uupanga mafuta aali mbuli ngawo alubo waananika aamuntu uutazumizigwi* weelede kujayigwa.’”
34 Mpawo Jehova wakati kuli Mozesi: “Bweza zipanzi zyeelene zyazintu eezi: malosi aasitakite, onikka, galibbanamu iinunkilila atununkilizyo tutuba. 35 Ubelesye zintu eezi kupanga tununkilizyo. Uziswaanizye kabotu-kabotu* alubo uzibikke munyo, zitabi aadoti alubo kazisalala. 36 Mpawo utwe zimwi kuti zibe musuunsu ukazibikke kunembo lyabbokesi lyaBukamboni mutente lyakukombela aawo mpunditalitondeezye kulinduwe. Zyeelede kusalalisya kulindinywe. 37 Utalipangili tununkilizyo kubelesya zintu zyakabelesegwa kupanga tununkilizyo ootu. Mweelede kutubona kuti tulasalala kuli Jehova. 38 Kufumbwa muntu uutupanga kuti amvwe kununkilila kwato, weelede kujayigwa kuzwa kubantu bakwe.”