Kulonga
29 “Nzezi nzweelede kuzoochita kuti ubasalazye kuti bandibelekele kabali bapayizi: Uzoobweze pule wang’ombe uuchili muniini, bagutu babili babotu, 2 zinkwa zitakwe bumena, zinkwa zyalawundi zili aakadonko aakati zitakwe bumena ziswaanizidwe aamafuta azinkwa zipapalete zitakwe bumena zinanidwe mafuta. Zinkwa eezi uzijike aafulawa mbotu yawiiti. 3 Uzibikke mubbasikiti mpawo uzaazyo aamwi ang’ombe abagutu babili.
4 “Weelede kuzooyeta Aroni abana bakwe kumanjililo aatente lyakuswaanganina mpawo ubasanzye. 5 Ubweze zigogo, uzwaatike Aroni chigogo chilamfu, jansi lyakabaki kabupayizi litakwe maboko, kabaki kabupayizi, kagogo kakukaango mpawo umwaange bbanti lyakabaki kabupayizi muchibuno. 6 Weelede kumuzwaatika ngwaani kumutwe mpawo ubikke chitondeezyo chisalala aalinjiyo 7 alubo ubweze mafuta aakunanika umutile aamutwe, umunanike.
8 “Weete bana bakwe aafwiifwi, ubazwaatike zigogo zilamfu. 9 Waange Aroni abana bakwe mabbanti aamulembo mpawo ubazwaatike zyakuzwaata kumutwe mpawo bupayizi bulaba bwabo kusikila kukabe kutamani. Eezi nzizyo nzweelede kuchita nubikka Aroni abana bakwe kuti babeleke kabali bapayizi.
10 “Weelede kweeta pule wang’ombe kunembo lyatente lyakuswaanganina mpawo Aroni abana bakwe balabikka maboko aabo aamutwe wapule ooyo. 11 Ujaye ng’ombe eeyo kunembo lyaJehova kumanjililo aatente lyakuswaanganina. 12 Udompe limwi ganzi lyang’ombe eeyo amunwe wako, ulinane aameja aachipayililo mpawo limwi lyoonse litasyaale ulitile aansi aachipayililo. 13 Ubweze mafuta woonse aavumbide mala, mafuta aali aachini, nsa zibili amafuta aazyo mpawo uzitente kuchitila kuti zisuke busi aachipayililo. 14 Pesi nyama yang’ombe eeyo, chikumba chayo amafumba aayo weelede kuzitenta aanze aakkeempu. Eechi nchipayizyo chazibi.
15 “Mpawo ubweze mugutu uumwi. Aroni abana bakwe beelede kubikka maboko aabo aamutwe wamugutu ooyo. 16 Ujaye mugutu ooyo mpawo ubweze ganzi lyawo ulisansiile kumabazu woonse aachipayililo. 17 Unenge mugutu ooyo muzipanzi alubo usanzye mala aawo ansumba zyawo mpawo uzibambe kabotu amutwe wawo. 18 Weelede kutenta mugutu ooyo woonse kuchitila kuti usuke busi aachipayililo. Nchipo chitentwa chipegwa Jehova, mbweema bununkilila.* Eechi nchipo chitentwa mumulilo chipegwa Jehova.
19 “Mpawo ubweze umwi mugutu, Aroni abana bakwe beelede kubikka maboko aabo aamutwe wamugutu ooyo. 20 Ujaye mugutu ooyo mpawo ubweze ganzi lyawo ulinane kukutwi kwachilisyo kwa-Aroni akwabana bakwe akuzyaala zyakumaboko aabo aakuchilisyo azyakumawulu aabo aachilisyo alubo usansiile ganzi kumabazu woonse aachipayililo. 21 Mpawo ubweze limwi ganzi lili aachipayililo aamwi mafuta aakunanika, uzisanse aazigogo zya-Aroni azyabana bakwe, kuchitila kuti basalale kuswaanizya azigogo zyabo.
22 “Mpawo ubweze mafuta aamugutu, mafuta aali kumuchila, mafuta aavumbide mala, mafuta aali aachini, nsa zibili amafuta aazyo amweendo wachilisyo, nkaambo mugutu ooyu ngwakubabikka kuti babe bapayizi. 23 Ubweze chinkwa chibulungusene achinkwa chalawundi chili aakadonko aakati chili aamafuta achinkwa chipapalete chili mubbasikiti lyazinkwa zitakwe bumena lili kunembo lyaJehova. 24 Zyoonse weelede kuzibikka mumaboko aa-Aroni abana bakwe. Mpawo uziyumbe ooku akooku kuti zibe chipo chakuyumba kunembo lyaJehova. 25 Uzibweze mumaboko aabo mpawo uzitente aachipayililo, aajulu aachipo chitentwa kuti zibe bweema bununkilila* kunembo lyaJehova. Eechi nchipo chitentwa mumulilo chipegwa Jehova.
26 “Mpawo ubweze kaango kamugutu wabelesegwa kubikka Aroni abana bakwe kuti babe bapayizi, ukayumbe ooku akooku kakali chipo chiyumbwa kunembo lyaJehova, mpawo kalaba kako. 27 Usalazye kaango kachipo chiyumbwa amweendo wachipanzi chisalala chakayumbwa chakazwa kumugutu wakubabikka kuti babe bapayizi, ooyo wakapegwa akaambo ka-Aroni abana bakwe. 28 Zipanzi eezi zyeelede kuba zya-Aroni abana bakwe alubo mulawu ooyu weelede kutobelwa aama-Israyeli kukabe kutamani, nkaambo nzipanzi zisalala. Zilaba zipanzi zisalala zitapegwe aama-Israyeli. Nzipanzi zisalala kuli Jehova nzibeelede kupa kuzwa kuzipayizyo zyabo zyalumvwanano.
29 “Zigogo zya-Aroni zisalala zizoobelesegwa aabana bakwe batazootobele kunanikwa akubikkwa kuba bapayizi. 30 Umwi wabana bakwe uutazoobe mupayizi mundawu yakwe alubo uutazooze kutente lyakuswaanganina kuti azoobeleke mundawu iisalala, weelede kuzizwaata kwamazuba aali musanu aabili.
31 “Weelede kubweza nyama yamugutu wakubabikka kuti babe bapayizi mpawo wiijike mundawu iisalala. 32 Aroni abana bakwe beelede kulya nyama yamugutu ooyo azinkwa zili mubbasikiti kumanjililo aatente lyakuswaanganina. 33 Beelede kulya zintu zyabelesegwa kumaninsya milandu, kuti babikkwe kuba bapayizi akuti basalazigwe. Pesi muntu uutazumizigwi* teelede kuzilya pe nkaambo zilasalala. 34 Kufumbwa nyama yachipayizyo chakubikka bapayizi achinkwa chitasyaale kusikila kuseeni, weelede kuzitenta mumulilo. Tazyeelede kuligwa pe nkaambo zilasalala.
35 “Eezi nzizyo nzweelede kuzoochita kuli Aroni abana bakwe kweendelana azintu zyoonse nzindakulayilila. Weelede kutola mazuba aali musanu aabili kubabikka kuti babe bapayizi. 36 Weelede kupa ng’ombe buzuba abuzuba kuti ibe chipayizyo chachibi chakumaninsya milandu yabo alubo weelede kusalazya chipayililo kuzwa kuchibi kwiinda mukupa chipo chakumaninsya milandu. Weelede kuchinanika kuti uchisalazye. 37 Weelede kusalazya chipayililo kuzibi kwamazuba aali musanu aabili, weelede kuchisalazya kuchitila kuti chisalalisye. Kufumbwa uuchiguma weelede kuti kasalala.
38 “Nzezi nzweelede kupa aachipayililo: Upe bagutu babili buzuba abuzuba bali aamunyaka uumwi. 39 Upayizye mugutu uumwi kuseeni mpawo umwi umupayizye goko.* 40 Weelede kupa mugutu wakusaanguna aamwi achipanzi chakkumi cha-efa* yafulawa mbotu iiswaanizidwe aachipanzi chane chahini* yamafuta mabotu achipanzi chane chahini yachipayizyo chinywigwa chawayini. 41 Weelede kupa mugutu wabili goko* aamwi azipo zyazilyo azipo zinywigwa zili mbuli zyapegwa kuseeni. Weelede kuzipa kuti zibe bweema bununkilila.* Eechi nchipo chitentwa mumulilo chipegwa Jehova. 42 Cheelede kuba chipo chitentwa chiindi choonse mumazyalani aanu woonse kumanjililo aatente lyakuswaanganina kunembo lyaJehova, ooko nkundiyoolitondeezya kuti ndaambuule andinywe.
43 “Ndizoolitondeezya kuma-Israyeli aandawu eeyi alubo ndizooyisalazya abulemu bwangu. 44 Ndizoolisalazya tente lyakuswaanganina achipayililo alubo Aroni abana bakwe ndizoobasalazya kuti bandibelekele kabali bapayizi. 45 Ndizookkala aakati kama-Israyeli ndibe Leza wabo. 46 Bazooziba choonzyo kuti ndime Jehova Leza wabo ooyo wakabagwisya munyika ya-Ijipita, kuchitila kuti ndikkale aakati kabo. Ndime Jehova Leza wabo.