KuBaroma
15 Nikuba oobo, iswe nitusimide tweelede kugwasya aabo batakwe manguzu, tutachiti zitubotezya. 2 Umwi awumwi wesu abotezye muntu ngwayakilenaawe kwiinda mukumuchitila zintu zibotu, kuti amuyake. 3 Nkaambo naaba Kkristu taakalibotezya pe, pesi mbuli mbukulembedwe kuti: “Masampu aabaabo balikukusampula aza aalindime.” 4 Nkaambo zintu zyoonse zyakalembwa chiindi, zyakalembelwa kuti tuyiisigwe, kuchitila kuti kwiinda mukulisimya aluumbulizyo luzwa muMagwalo, tube aabulangilizi. 5 Leza uupa kuti mulisimye alubo uumupa luumbulizyo, ape kuti mube aamizeezo iili mbuli njaakalaayo Kkristu Jesu, 6 kuchitila kuti kamulaamwi, mulumbayizye Leza Wisi waMwaami wesu Jesu Kkristu ajwi limwi.
7 Nkinkaako, amutambulane mbuli mbaakamutambula Kkristu, kuchitila kuti Leza alemekwe. 8 Nkaambo ndimubuzya kuti, Kkristu wakaba mubelesi wabaabo bapalwidwe kuchitila kuti atondeezye kuti Leza waamba choonzyo akuti zisyomezyo nzyaakaamba kumasianyinakulu nzyachoonzyo, 9 akuti zisi zilumbayizye Leza akaambo kaluzyalo lwakwe. Mbuli mbukulembedwe kuti: “Ndizookuzumina aantanganana aakati kazisi alubo ndizooyimbila zina lyako ntembawuzyo.” 10 Alubo waamba kuti: “Amubotelwe nizisi, kuswaanizya abantu bakwe.” 11 Alubo waamba kuti: “Amutembawule Jehova* nizisi zyoonse alubo bantu boonse abamutembawule.” 12 Alubo Isaya waamba kuti: “Kuzooba muyanda waJese, ooyo uutazoobuke kuti ayendelezye zisi. Zisi zyoonse zizoolangilila kulinguwe.” 13 Leza ooyo uupa bulangilizi, amuzuzye aakukondwa koonse aluumuno kwiinda mukumusyoma, kuchitila kuti muzuzigwe* aabulangilizi kwiinda mumanguzu aamuuya uusalala.
14 Ndili aachoonzyo atala andinywe bakombima, kuti muzwide bubotu aluzibo loonse akuti mulakonzya kuyiisyania.* 15 Nikuba oobo, ndakamulembela tumwi twaambo kanditamusisili biya pe, kuchitila kuti ndimuyeezye lubo akaambo kaluzyalo lupati ndundakapegwa aaLeza, 16 kuti ndibe mubelesi waKkristu Jesu kuzisi. Ndilikuchita mulimu uusalala wakwaambilizya makani mabotu aaLeza, kuchitila kuti zisi eezi zibe chipayizyo chitambulika, chakasalazigwa aamuuya uusalala.
17 Nkinkaako, ndili aakaambo kapa kuti ndibotelwe muli Kkristu Jesu akaambo kazintu zili atala aLeza. 18 Nkaambo tandikoowambuula atala azimwi zintu, kunze kwazintu zyakachitwa aaKkristu kwiinda mulindime, kuchitila kuti zisi ziswiilile kwiinda mumajwi aangu amichito yangu, 19 kwiinda mumanguzu aazitondeezyo azigambyo alubo kwiinda mumanguzu aamuuya waLeza, zyakuti kuzwa kuJerusalema kuyoosika kuchilawu cha-Ilirikko, ndaakambawuka chakumaninina makani mabotu aali atala aKkristu. 20 Munzila eeyi, ndakasala kuti nditaambilizyi makani mabotu kundawu zina lyaKkristu nkulyakali lyazibinkana kale, kuchitila kuti nditayaki aajulu aantalisyo yawumwi muntu, 21 pesi mbuli mbukulembedwe kuti: “Aabo batanamvwa atala anguwe, bazoobona, alubo aabo batanamvwa, bazoomvwisisisya.”
22 Eezi nzizyo zyakali kupa kuti kwaziindi zyiingi, ndisinkilwe kuza kulindinywe. 23 Pesi muzilikiti eezi, tandichikwe ndawu iitanakambawukwa pe alubo kwaminyaka myiingi, ndali aachiyandisyo chakuza kulindinywe. 24 Nkinkaako, nindazooya kuSpeyini, ndilangilila kuzoomubona alubo nindazookkala aandinywe kwamazuba, muzoondisindikile kwakasinzo-sinzo. 25 Pesi lino ndaamba kuya kuJerusalema kuti ndikagwasye basalali. 26 Nkaambo aabo bali kuMakkedoniya abali ku-Akkaya, babotelwa kupa zintu nzibalaazyo kuchitila kuti zikaakugwasye bafwaba aakati kabasalali bali kuJerusalema. 27 Nichoonzyo, bakachita oobo kababotelwa nkaambo kwaamba choonzyo, bakali aachikwelete kulimbabo. Nkaambo kuti kakuli kuti bakombinyina bakuJerusalema bakabagwasya muzintu zyabukombi, nkukwaamba kuti ambabo beelede kubagwasya muzintu zyakumubili. 28 Nkinkaako, kuti ndamaninsya mulimu ooyu akuzisisya kabotu zipo eezi,* ndizooyinda kulindinywe kandiya kuSpeyini. 29 Alubo ndilizi kuti nindazoosika kulindinywe, ndizoosika aachilongezyo chikkwene chizwa kuli Kkristu.
30 Lino bakombima ndilikumusungwaazya kwiinda muMwaami wesu Jesu Kkristu alubo kwiinda muluyando lwamuuya, kuti musungwaale aamwi andime kundikombela kuli Leza, 31 kuchitila kuti ndivunwe kubantu batasyomi bali muJudiya akuti mulimu wangu wakugwasya aabo bali kuJerusalema ukatambulike kubasalali, 32 kuchitila kuti, kwiinda mukuyanda kwaLeza, ndizoosike kulindinywe kandikondwa, mpawo tuzoosungwaazyanie. 33 Leza uupa luumuno abe aandinywe moonse. Ameni.