Makani Aakalembwa aaJohane
13 Pobwe lyaPasika kalitanasika, Jesu wakalizi kuti chiindi chakwe chakali chasika chakuti azwe munyika eeyi aye kuli Taata. Alubo akaambo kakuti wakali wabayanda bakwe bakali munyika, wakabayanda kusikila kumamanino. 2 Nibakali kulya chilalilo, Dyabbulosi wakali wazibikka kale mumoyo waJudasi Isikkariyoti mwana waSimoni kuti amuuzye. 3 Nkinkaako, Jesu kazi kuti Wisi wakali wabikka zintu zyoonse mumaboko aakwe akuti wakazwa kuli Leza akuti wakali kuzoobweeda kuli Leza, 4 wakanyampuka nibakali kulya chilalilo, mpawo wakabikka zigogo zyakwe zyaajulu kumbali. Alubo wakabweza mulembo wawusunga muchibuno. 5 Nkinkaako, wakatila maanzi mukadishi, wasaanguna kubasanzya kumawulu basikwiiya bakwe mpawo wakabapukuta kabelesya mulembo ngwaakalisungide muchibuno. 6 Mpawo wakasika aali Simoni Petro. Petro wakati kulinguwe: “Mwaami, uyanda kundisanzya kumawulu na?” 7 Mpawo Jesu wakamusandula kuti: “Nzindilikuchita tukoozimvwisisisya pe lino, pesi uzoozimvwisisisya nizyayinda zintu eezi.” 8 Petro wakati kulinguwe: “Tazichiti pe kuti undisanzye kumawulu.” Mpawo Jesu wakati kulinguwe: “Kuti ndileke kukusanzya, nkukwaamba kuti tatulaamwi pe.” 9 Simoni Petro wakati kulinguwe: “Mwaami, utandisanzyi kumawulu kupela, pesi ndisanzye akumaboko akumutwe.” 10 Mpawo Jesu wakati kulinguwe: “Kufumbwa muntu wasamba aamubili, uyandikana kusamba kumawulu kupela nkaambo mubili wakwe woonse ulasalala. Inywe mulasalala, pesi teemoonse pe.” 11 Zyakapa kuti aambe kuti: “Teemoonse pe nimusalala,” nkuti wakalimuzi muntu wakali kuyanda kumuuzya.
12 Naakamaninsya kubasanzya kumawulu, akuzwaata zigogo zyakwe zyaajulu, wakaakukkala lubo aatebbulu mpawo wakababuzya kuti: “Mwazimvwisisisya na nzindachita kulindinywe? 13 Mundaamba kuti ‘Muyiisi’ akuti ‘Mwaami.’ Nimundaamba oobo, nga mulikwaamba choonzyo nkaambo mbundibede choonzyo. 14 Nkinkaako, kuti ime ndiMwaami aMuyiisi ndamusanzya kumawulu, nkukwaamba kuti andinywe mweelede kusanzyania kumawulu. 15 Nkaambo ndamusiila chikozyano, mbuli mbundachita kulindinywe, andinywe mweelede kuchita mbuboobo. 16 Kwaamba choonzyo, ndimubuzya simpe kuti, muzike teemupati pe kuli simalelaakwe, asikutumwa teemupati pe kuli yooyo wakamutuma. 17 Kuti kamuzizi zintu eezi, mulabotelwa kuti kamuzichita. 18 Tandilikwaambuula atala andinywe moonse pe, ndilibazi mbindakasala. Pesi eezi zyakaba oobo, kuchitila kuti luzuzikizigwe lugwalo luti: ‘Ooyo wakali kulya chinkwa changu, wandibukila.’* 19 Kuzwa lino, ndilikumubuzya zintu eezi kazitanachitika, kuchitila kuti zyaakuchitika, musyome kuti ndime nguwe. 20 Kwaamba choonzyo, ndimubuzya simpe kuti, kufumbwa muntu uutambula muntu ngundituma, wanditambula andime alubo kufumbwa muntu uunditambula, wamutambula aYooyo wakandituma.”
21 Jesu naakazwa kwaamba zintu eezi, wakapengaana mumoyo* alubo wakapa bukamboni kati: “Kwaamba choonzyo, ndimubuzya simpe kuti, umwi wanu uzoonduuzya.” 22 Mpawo basikwiiya bakasaanguna kulangana, nkaambo teebakamuzi pe ngwaakali kwaamba. 23 Umwi wabasikwiiya, ooyo Jesu ngwaakali kuyanda loko, wakalikkede aafwiifwi aJesu.* 24 Mpawo Simoni Petro wakagunia mutwe kuli sikwiiya ooyo mpawo wakati kulinguwe: “Tubuzye, ngwani ngwalikwaamba?” 25 Sikwiiya ooyo wakaseyama aakaango kaJesu mpawo wakati kulinguwe: “Mwaami, ngwani?” 26 Jesu wakasandula kuti: “Ngooyo ngunditape kankwa nkinditasunse.” Naakakasunsa, wakakapa Judasi mwana waSimoni Isikkariyoti. 27 Judasi naakakatambula, Saatani wakanjila mulinguwe. Mpawo Jesu wakati kulinguwe: “Nzulikuchita, zichite chakufwambaana.” 28 Nikuba oobo, taakwe naaba uumwi kubantu bakakkede aatebbulu wakaziba kuti nkamboonzi naakamubuzya zintu eezi. 29 Bamwi bakayeeya kuti, mbukunga Judasi nguwe wakali kukkala aabbokesi lyamali, amwi Jesu wakali kwaamba kuti: “Wula zintu nzituyanda kubelesya kupobwe,” naakuti wakeelede kupa zimwi zintu kubantu bafwaba. 30 Nkinkaako, naakakatambula kankwa, wakazwa chakufwambaana. Aachiindi eechi kwakali mansiku.
31 Judasi naakazwa, Jesu wakati: “Lino Mwanaamuntu walemekwa alubo Leza walemekwa kwiinda mulinguwe. 32 Leza lwakwe uzoopa kuti alemekwe alubo ulapa kuti alemekwe chakufwambaana. 33 Nibana bangu, ndinooli aandinywe kwachiindi chifwiifwi. Muzoondiyanduula alubo mbuli mbundakabuzya maJuda kuti, ‘Nkundilikuya tamukonzyi pe kukusika,’ lino ndaabubuzya ndinywe. 34 Ndilikumupa mulawu mupya wakuti muyandane. Mbuli mbundakamuyanda, andinywe amuyandane. 35 Bantu boonse bazooziba kuti muli basikwiiya bangu, kuti kamuli aaluyando aakati kanu.”
36 Simoni Petro wakati kulinguwe: “Mwaami, uyanda kuya kuli?” Mpawo Jesu wakamusandula kuti: “Nkundilikuya tukonzyi pe kunditobela lino pesi uzoonditobela mukuya kwachiindi.” 37 Petro wakati kulinguwe: “Mwaami, nkamboonzi ninditakonzyi kukutobela lino? Ndizoopa buumi bwangu akaambo kanduwe.” 38 Mpawo Jesu wakati: “Ulaachoonzyo na kuti uzoopa buumi bwako akaambo kandime? Kwaamba choonzyo, ndikubuzya simpe kuti, mukombwe tawukookokolika pe kutanandikaka tutatu.”