KuBafilipi
2 Nkinkaako, kufumbwa kusungwaazyania nkumulaako muli Kkristu, kufumbwa kuumbulizyania nkumulaako muluyando, kufumbwa kumvwanana nkumulaako mumuuya,* kufumbwa luyando aluzyalo nzimulaazyo, 2 amupe kuti kukondwa kwangu kuzule kwiinda mukuba aamuzeezo uumwi aluyando lukozyenie, kamujisini chakumaninina alubo kamuyeeya chintu chimwi. 3 Mutachiti kufumbwa chintu kamulikukazyania naakuti kamulikulisumpula, pesi amulibombye akubona bamwi kuti balamwiinda, 4 kamutayeeyi nzimuyanda kupela, pesi kamuyeeya nzibayanda bamwi.
5 Amube aamuzeezo ooyu ngwaakali aawo Kkristu Jesu, 6 ooyo, nikuba kuti wakali muchiimo chaLeza, pesi taakwe naakayeeya kubweza bweendelezi, nkukwaamba kuti, kuti ayelane aaLeza. 7 Taakachita oobo pe, pesi wakasiya zintu zyoonse nzyaakalaazyo, walibikka muchiimo chamuzike mpawo wakaba muntu.* 8 Kuyungizya aali zeezi, naakasika kali muntu, wakalibombya alubo wakaswiilila kusikila kulufu, lufu aachisamu chakupenzezya.* 9 Akaambo kakaambo aaka, Leza wakamusumpula akumupa chuuno chili aajulu loko, azina lisumpukide kwiinda mazina woonse, 10 kuchitila kuti, kwiinda muzina lyaJesu, mazwi woonse afugame—aabaabo bali kujulu, bali aanyika abali munyika— 11 akuti bantu boonse bazumine aantanganana kuti Jesu Kkristu Mwaami, kuchitila kuti Leza Taata apegwe bulemu.
12 Nkinkaako nibayandwa, mbuli mbumwali kuswiilila chiindi choonse, kutali nindali aandinywe kupela, pesi kapati lino ninditawo pe, amwiinkilile kunembo kubelekela lufutuko lwanu akuyoowa akuzazama kupati. 13 Nkaambo Leza nguwe uumupa manguzu akupa kuti mube aachiyandisyo amanguzu aakuchita zintu, akaambo kakuyanda kwakwe. 14 Amwiinkilile kunembo kuchita zintu zyoonse kamutang’ung’uni pe alubo kamutakazyani pe, 15 kuchitila kuti mube bana baLeza batakwe mulandu, basalala alubo batakwe bubi, aakati kazyalani eeli lipambanikide alubo lipilingene, oomo mumuli kumweka mbuli mimuni munyika, 16 kamujisilidi changuzu kujwi lyabuumi. Mpawo ndilaba aakaambo kapa kuti ndibotelwe mubuzuba bwaKkristu, nkaambo ndinoozi kuti teendakachijaanina zitawo pe naakuti kubelekela zitawo pe. 17 Pesi, nikuba kuti ndilikutilwa mbuli chipo chinywigwa aachipayizyo akumulimu uusalala,* eezyo lusyomo lwanu nzilwapa kuti muchite, ndilabotelwa alubo ndilakondwa andinywe moonse. 18 Munzila iikozyenie, andinywe mweelede kubotelwa akukondwaamwi andime.
19 Ndilikulangilila kuti, kuti kakuli kuyanda kwaMwaami Jesu, nditume Timoti kulindinywe lino-lino, kuchitila kuti ndisungwaazigwe nindazoomvwa makani aali atala andinywe. 20 Nkaambo tandikwe umwi muntu uuli mbuli nguwe uutazootondeezye kuti ulaandaba loko azintu zimukataazya. 21 Nkaambo bamwi boonse balikuyanduula zintu nzibayanda, kutali eezyo ziyandwa aaJesu Kkristu. 22 Pesi inywe mulizi kuti wakapa bukamboni atala anguwe lwakwe kuti, mbuli mwana uubelekaamwi awisi, wakabeleka aandime kuti tusumpule makani mabotu. 23 Nkinkaako, nguwe ngundilangilila kutuma nindazoobona kuti zintu zilandeendela biyeni. 24 Kwaamba choonzyo, ndili aalusyomo muMwaami kuti andime ndilasika lino-lino.
25 Pesi kwalino, ndabona kakweelela kuti nditume Epafrodito kulindinywe, mukombima, mubelesima, musojama amutumwa wanu ngumwakatuma kuti azoondigwasilizye muzintu nzindiyanda, 26 mbukunga ulaachiyandisyo chakumubona moonse alubo uluuside nkaambo mwakamvwa kuti wakalichisidwe. 27 Kwaamba choonzyo, wakachiswa zyakuti wakali waamba kufwa, pesi Leza wakamufwida luzyalo, kutali nguwe kupela, pesi andime wakandifwida luzyalo, kuchitila kuti nditabi akuusa kutobelene. 28 Nkinkaako, ndilikumutuma chakufwambaana, kuchitila kuti nimutazoomubone, mubotelwe lubo akuti andime nditakataazikani loko. 29 Nkinkaako, amumutambule mbuli mbumubatambula bamwi muMwaami akukondwa koonse alubo amwiinkilile kunembo kulemeka bantu bali boobu. 30 Nkaambo wakasifwe akaambo kamulimu waKkristu,* kalikubikka buumi bwakwe mungozi kuti andigwasye mumilimu iisiyene-siyene nkaambo inywe tamulikokuno pe.