Petro Wakusaanguna
1 Ndime Petro, mwaapostoli waJesu Kkristu, ndilikumulembela inywe nimukkala kwachiindi chifwiifwi, nimumwayikide muPonto, muGalatiya, muKkapadokkiya, mu-Asiya amuBbituniya, inywe nimusalidwe 2 kweendelana anzyaakazi kale Leza Taata, akusalazigwa aamuuya, amakanze aakuti muswiilile akuti musansiilwe ganzi lyaJesu Kkristu:
Luzyalo lupati aluumuno aziyungizigwe kulindinywe.
3 Atembawulwe Leza aTaata waMwaami wesu Jesu Kkristu, nkaambo kweendelana alweetelelo lwakwe lupati, wakatupa kuzyalwa kupya kubulangilizi bupona, kwiinda mukubusigwa kwaJesu Kkristu kuzwa kubafu, 4 kuti tujane lukono lutaboli, lusalala alubo lutajujuki. Lukono oolu mulilubambilidwe kujulu, 5 inywe nimukwabililidwe aamanguzu aaLeza, kwiinda mulusyomo akaambo kalufutuko lubambilidwe kuyubununwa kuchiindi chamamanino. 6 Akaambo kazintu eezi, mulikubotelwa loko nikuba kuti kuchiindi eechino chifwiifwi muliikuswaana mapenzi aasiyene-siyene, 7 kuchitila kuti lusyomo lwanu lwakasunkwa, oolo luyandikana loko kwiinda ngolida iinyonyooka nikuba kuti ilayinzigwa mumulilo,* lupe kuti mulumbayizigwe akulemekwa akupegwa bulemu aakuyubununwa Jesu Kkristu. 8 Nikuba kuti teemwakamubona pe, mulamuyanda. Nikuba kuti lino tamumubwene pe, mulikutondeezya lusyomo mulinguwe alubo mulikubotelwa loko akukondwa kutapandululiki alubo kugambya, 9 chiindi nimujana bulumbu bwalusyomo lwanu, nkukwaamba lufutuko lwanu.
10 Bapolofita bakapolofita atala aluzyalo lupati lwakabambilidwe ndinywe, bakabuzisisya akuyanduulisisya kabotu-kabotu atala alufutuko oolu. 11 Bakaliswini kuyanduulisisya kuti bazibe kuti nchiichili chiindi muuya wakali mulimbabo nchwaakali kwaamba atala aKkristu, nwaakali kupa bukamboni kakuchili chiindi atala amapenzi aakabambilidwe Kkristu alubo atala abulemu bwakali kuzootobela. 12 Bakayubunwidwa kuti bakali kuchita mulimu uugwasya ndinywe, kutali mbabo, atala azintu zyaambilizigwa lino kulindinywe abaabo bakaambilizya makani mabotu kulindinywe, kwiinda mumuuya uusalala wakatumwa kuzwa kujulu. Ngilozi zilaachiyandisyo chakubona zintu eezi.
13 Nkinkaako, amulibambile mizeezo yanu kuti ichite mulimu. Amukkale kamuyeeya kabotu chiindi choonse, amubikke bulangilizi bwanu kuluzyalo lupati ndumutazoopegwe aakuyubununwa Jesu Kkristu. 14 Mbuli bana baswiilila, amuleke kubumbwa aachiyandisyo* nchimwakalaacho mukutaziba kwanu, 15 pesi mbuli Ooyo Uusalala wakamwiita, amusalale mukulijata kwanu koonse, 16 nkaambo kulilembedwe kuti: “Mweelede kusalala, nkaambo ime ndilasalala.”
17 Alubo kuti kamulikwiita Taata uubeteka katasaluuli pe kweendelana amulimu wawumwi-awumwi, amulijate munzila iitondeezya kuti mulamuyoowa, chiindi nimukkede kwachiindi chifwiifwi. 18 Nkaambo mulizi kuti mwakaangununwa* kuzwa kubuumi bwanu bwabuyo mbumwakapegwa aamasianyookulu,* kutali aazintu zinyonyooka zili mbuli nsiliva naakuti ngolida. 19 Pesi mwakaangununwa aaganzi liyandikana lyaKkristu, lili mbuli lyamwanaambelele uutakwe bubi akabata. 20 Nichoonzyo kuti wakalizibinkene kale nyika kayitanabawo, pesi wakazooyubununwa kumamanino aaziindi akaambo kandinywe. 21 Kwiinda mulinguwe, musyoma muli Leza, ooyo wakamubusya kuzwa kubafu akumupa bulemu, kuchitila kuti lusyomo lwanu abulangilizi bwanu zibe muli Leza.
22 Mbukunga lino mwalisalazya kwiinda mukuswiilila kasimpe aluyando lwabuzyalwanyokwe lutali lwakuupa-wupa, amuyandane loko kazizwa aansi aamoyo. 23 Nkaambo mwakapegwa kuzyalwa kupya, kutali aambuto iibola pe, pesi ambuto iitaboli,* kwiinda mujwi lyaLeza uupona alubo uutamani. 24 Nkaambo “nyama* yoonse ili mbuli masokwe alubo bulemu bwayo buli mbuli duba lyamulusaka. Masokwe alanyana alubo duba lilaloka, 25 pesi jwi lyaJehova* linooliwo kukabe kutamani.” Alubo “jwi” eeli, makani mabotu aakaambilizigwa kulindinywe.