Lwabili kuBakkorinte
12 Ndeelede kulidunda. Nikuba kuti takugwasyi pe, pesi lino ndilaambuula atala azilengaano zigambya azintu nzindakayubunwidwa aaMwaami. 2 Kuli umwi mwaalumi ngundizi uujisini aaKkristu. Mwaalumi ooyo, wakavupwidwa kujulu lyatatu minyaka iili 14 yayinda. Tandizi kuti eezi zyakachitika kali aamubili wanyama na, naakuti pe, Leza nguwe uuzi. 3 Kwaamba choonzyo, mwaalumi ooyu ndilimuzi pesi kuti wakali aamubili wanyama na naakuti pe, tandizi pe, Leza nguwe uuzi. 4 Mwaalumi ooyu wakavupwidwa kuparadayizi alubo wakamvwa majwi aataambiki pe alubo aatazumizigwi pe kwaambwa aamuntu. 5 Ndilalidunda akaambo kamwaalumi ooyu, pesi ime tandikoolidunda pe kunze kwakuti ndilidunde akaambo kakubula manguzu kwangu. 6 Nkaambo, nikuba kuti ndayanda kulidunda, tandikooba mufuba-fuba pe nkaambo ndinooli ndilikwaamba choonzyo. Pesi tandikoochita oobo pe, kuchitila kuti kutabi muntu uundilumbayizya loko kwiinda nzyaabona aalindime naakuti nzyaamvwa kulindime, 7 akaambo kakuti ndakatambula zilengaano zili boobu zigambya loko.
Kuti nditalisumpuli zyiindilide, ndakapegwa muumvwa munyama, ngilozi yaSaatani, kuti yiinkilile kunembo kunduuma, kuchitila kuti nditalisumpuli zyiindilide. 8 Kwaziindi zitatu, ndakakombelezya Mwaami kuti agwisye muumvwa ooyu mulindime. 9 Pesi wakati kulindime: “Luzyalo lwangu lupati lulikkwene aalinduwe, nkaambo manguzu aangu alikuchitwa kuti amaninine mukubula manguzu kwako.” Nkinkaako, chibotezya nchakuti, ndilalidunda akaambo kakubula manguzu kwangu, kuchitila kuti manguzu aaKkristu akkale kaandivumbide mbuli tente. 10 Nkinkaako, ndilabotelwa mukubula manguzu, mukutukilwa, mukubula zintu ziyandikana, mukupenzegwa amubuyumu-yumu akaambo kaKkristu. Nkaambo chiindi ninditakwe manguzu, mpimpawo mpundili aamanguzu.
11 Ndaba mufuba-fuba. Ndinywe mwapa kuti ndibe oobo, nkaambo inywe mwakeelede kundilumbayizya. Nkaambo, nikuba kuti taakwe ambundibede, baapostoli banu bagambya taakwe chintu nichiba chimwi nchibakandiindaacho pe. 12 Kwaamba choonzyo, zitondeezyo zyakuti ndili mwaapostoli zyakaboneka aakati kanu kwiinda mukulisimya kupati, alubo zyakaboneka kwiinda muzitondeezyo azigambyo amumilimu mipati. 13 Kuli zimwi zilongezyo zyakajanwa aazimwi mbungano na, nzimwakatajana inywe, kunze kwakuti teendakamulemezya pe? Amundilekelele kukubisya ooku.
14 Amubone! Kaba kachitatu lino kandilikulibambila kuza kulindinywe alubo tandizoomulemezyi pe. Nkaambo tandiyandi zintu zyanu pe, pesi ndiyanda ndinywe biya, nkaambo bana tabalangililwi kuti babambilile bazyali babo bunoti, pesi bazyali mbabo beelede kuchita oobo kubana babo. 15 Ime ndizoopa zyoonse nzindilaazyo kandibotelwa alubo ndizoolipeda chakumaninina akaambo kandinywe. Kuti kandimuyandisya oobu, ime ndeelede kuyandwa mbichaani na? 16 Pesi, teendakamulemezya pe. Nikuba oobo, inywe mwaamba kuti “ndichenjede loko” akuti “ndakamweena.” 17 Kuli nindakabweza zintu zyanu na, kwiinda mubantu mbindakatuma kulindinywe? 18 Ndakasungwaazya Tito kuti aze kulindinywe kali aawumwi mukombima. Tito taakwe naakabweza zintu zyanu pe, teembubo na? Twakali aamuzeezo uumwi, teembubo na? Twakeenda mumukondo uumwi, teembubo na?
19 Chiindi choonse eechi, mulikubonaanga tulikulisandwida kulindinywe kuti tatukwe mulandu na? Tulikwaamba makani aaya kunembo lyaLeza katujisini aaKkristu. Pesi nibayandwa, tulikuchita zintu zyoonse eezi kuti tumuyake. 20 Nkaambo ndiyoowela kuti, amwi nindasika kulindinywe, tandizoomujani mbuli mbundilangilila pe, andinywe tamuzoondiboni mbuli mbumulangilila pe, pesi amwi ndilajana kakuli kulwana, bbivwe, kunyemezyania, kukazyania, kuvwiya, kulisumpula amanyongwe. 21 Amwi nindazoosika lubo, Leza wangu uzoopa kuti ndibe aabweeme kunembo lyanu mpawo ndizoolile akaambo kabantu biingi bakabisya chiindi, batasandukide mukutasalala kwabo amukuchita bwaamu* amichito iitondwa* njibakachita.