Detoronomi
32 “Amundipe kutwi nimajulu ndaambuule,
Nyika ayimvwe majwi aamulomo wangu.
2 Njiisyo yangu ilawa mbuli mvula;
Majwi aangu alawa mbuli lume,*
Mbuli lunywaanywa luwida aamasokwe
Mbuli mvula mpati iiwida zimena.
3 Nkaambo ndizoowambilizya zina lyaJehova.
Ndizoowamba bupati bwaLeza wesu!
4 NdiBbwe, milimu yakwe ilimaninide,
Nkaambo nzila zyakwe zyoonse zililuleme.
NguLeza uusyomeka uutachiti zitaluleme;
Uliluleme.
5 Mbabo bakabisya.
Tabachili bana bakwe pe, mbabo bapambanikide.
Ndizyalani lipambanikide, lipilingene!
6 Mbumweelede kumuchitila na Jehova,
Inywe nibantu bafuba-fuba batakwe busongo?
TeenguuWuso na wakapa kuti mubewo,
Ooyo wakamulenga akumukkazikizya?
7 Yeeya mazuba aachiindi;
Aminyaka yamazyalani aakayinda.
Buzya wuso ulakubuzya;
Abaalu bako balakubuzya.
8 Sijulu Lyamajulu naakazipa lukono lwazyo zisi,
Naakaanzaanisya bana ba-Adamu* kuzwa kuli umwi awumwi,
Bantu wakababikkila mugaano
Akaambo kakuvula kwabana ba-Israyeli.
9 Nkaambo chaabilo chaJehova mbantu bakwe;
Jakkobo ndukono lwakwe.
10 Wakamujana munkanda
Muchimpayuma chitakwe chintu, chili aamisindo iiyoosya.
Wakamufukatila, wakamulangania,
Wakamukwabilila mbuli mboni yaliso lyakwe.
11 Mbuli gumbe mbuliyiisya bana balyo kuuluka,
Kalibabama aajulu aabana balyo,
Lilavungulula mababa aalyo akubabweza,
Aminimba yalyo lilababweza,
12 Jehova alikke wakali kumuzulwida;*
Taakwe leza mweenzu wakali aanguwe.
13 Wakapa kuti ayendelezye ndawu zisumpukide zyaanyika,
Kuchitila kuti alye zilyo zyanyika.
Wakamusanina aabuchi bwamubbwe pati
Amafuta aamubbwe jumu,
14 Amafuta aang’ombe amalili aambelele ampongo,
Aamwi ambelele zineneede,
Abagutu bakuBbashani abapule bampongo,
Awiiti mbotu;
Alubo wakanywa wayini yamusinza wamasaansa.
15 Jeshuruni* naakaneneya, wakabbompa simalelo wakwe.
Waneneya, wafuta, waba aamafuta
Wakasiya Leza ooyo wakamulenga,
Wakanyansya Bbwe lyalufutuko lwakwe.
16 Bakapa kuti alutile akaambo kabaleza beenzu;
Bakamunyemya akaambo kazintu zisesemya.
17 Bakali kupayizya kumadimoni, kutali kuli Leza,
Bakali kupayizya kuli baleza mbibakatazi pe,
Baleza bapya bakasika lino-lino,
Masianyinakulu mbibakatazi pe.
18 Wakaliluba Bbwe lyakakuzyala,
Teewakamuyeeya pe Leza ooyo wakakuzyala.
19 Jehova naakazibona, wakabakaka
Nkaambo bana babo balombe abasimbi bakamunyemya.
20 Nkinkaako, wakati, ‘Ndizoobasisila busyu bwangu;
Ndibone kuti zilabeendela biyeni.
Nkaambo ndizyalani lileya-leya,
Mbana batasyomeki.
21 Bandilutizya* achintu chitali leza;
Bandinyemya akaambo kazibumbwa zyabo zitagwasyi.
Ndizoopa kuti babe aabbivwe akaambo kabaabo babonwa kuti teebantu;
Ndizoobanyemya achisi chifuba-fuba.
22 Nkaambo bukali bwangu bwasaanguna mulilo
Uutatente kusika kunsi aaKabanda,*
Uzoolotya nyika amichelo yayo
Akuumpa ntalisyo zyazilundu.
23 Ndizoobavuzizya mapenzi;
Ndizoomaninsizya twaanta twangu aali mbabo.
24 Bazoowongelwa anzala
Bazooligwa aakupya mubili akusikilwa lunyonyooko lupati.
Ndizoobatumina banyama baluma
Anzoka zili aabuyoka zyeenda aanyika.
25 Aanze bazoowusa akaambo kapanga;
Mukati bazooyoowa loko
Mulombe anakalindu,*
Kacheche amudaala uuli aamvwi.
26 Nikuli ndakaamba kuti: “Ndizoobamwaya;
Ndizoopa kuti batayeeyegwi aakati kabantu,”
27 Pesi ndakayoowa zyakali kuzoochitwa aabasinkondoma,
Nkaambo bakali kukonzya kuzibweza bumbi.
Balikukonzya kwaamba kuti: “Twakazunda munguzu zyesu;
TeeJehova pe wakachita zintu zyoonse eezi.”
28 Nkaambo nchisi chitakwe maanu,*
Taakwe uumvwisisisya pe aakati kabo.
29 Nikuli mbasongo! Balikunooyeeyesesya atala azintu eezi.
Balikunooyeeya zyalikunoobachitikila kunembo.
30 Muntu uumwi nga ulabatandaania biyeni bantu bali 1 000,
Bantu babili nga balapa biyeni kuti bantu bali 10 000 babachije?
Tazichiti pe kunze kwakuti Bbwe lyabo libawuzye kulimbabo
Akuti Jehova ababikke mumaboko aabo.
31 Ibbwe lyabo talili mbuli Bbwe lyesu pe,
Nibaba basinkondoma balizizi.
32 Nkaambo musaansa wabo ngwakuSodoma,
Akumyuunda yaGomora.
Masaansa aabo alajaya,
Zikama zyawo zilalula.
33 Wayini yabo mbuyoka bwanzoka
Mbuyoka bubi bwabachisasa.
34 Tazibambidwe na kulindime,
Kazijalilidwe mung’anda yangu yakubikkila zintu?
35 Kubweedezya nkukwangu, akukkwichizya,
Aachiindi chibikkidwe mawulu aabo azootezemuka,
Nkaambo buzuba bwamapenzi aabo buli aafwiifwi,
Zibalindide zizoosika mukulaba kwaliso.’
36 Nkaambo Jehova uzoobeteka bantu bakwe,
Akubafwida nsoni babelesi bakwe
Naazoobona kuti manguzu aabo amana,
Akuti kwachaala bafwaba aboongedwe.
37 Mpawo uzoowamba kuti, ‘Bali kuli baleza babo,
Ibbwe ndibakali kuchita mayubilo aabo,
38 Aabo bakali kulya mafuta aazipayizyo zyabo,*
Akunywa wayini yazipo zyabo zinywigwa?
Abanyampuke bamugwasye.
Ababe mayubilo aanu.
39 Amubone! Ime—ndindime,
Taakwe bamwi baleza kunze kwangu.
Ndilajaya alubo ndilapa buumi.
Ndilayasa, alubo ndilaponia,
Taakwe uukonzya kuvuna muntu mukuboko kwangu.
40 Nkaambo ndatambika kuboko kwangu kujulu,
Akukonka kanditi: “Mbuli mbundili muumi do kukabe kutamani,”
41 Kuti ndanona panga lyangu limweka
Akubambila kuboko kwangu kuti kubeteke,
Ndizoobakkwichizya basinkondoma
Akusubula bandizonda.
42 Ndizoopa kuti twaanta twangu tukolwe aaganzi,
Panga lyangu lizoolya nyama,
Aganzi lyabajayidwe alyabasungwa,
Amitwe yabazulwidi basinkondoma.’
43 Amubotelwe nizisi, aamwi abantu bakwe,
Nkaambo uzookkwichizya akaambo kaganzi lyababelesi bakwe,
Uzookkwichizya basinkondonyina
Akumaninsya* milandu yanyika yabantu bakwe.”
44 Mozesi wakasika kali aamwi aHoshiya* mwana waNuni mpawo wakaamba majwi woonse aalwiimbo oolu bantu kabamvwide. 45 Mozesi naakamaninsya kwaamba majwi woonse aaya kuma-Israyeli boonse, 46 wakati kulimbabo: “Amwaabambe mumoyo majwi woonse ngindili kumuchenjezya sunu, kuchitila kuti mwaalayilile bana banu, kutegwa batobelezye majwi woonse aaMulawu ooyu. 47 Majwi aaya taali aabuyo pe, pesi aamba buumi bwanu, alubo kwiinda mujwi eeli mulapona mazuba miingi munyika njimuyaakubweza nimwazubuka Jodani.”
48 Jehova wakaambuula aaMozesi mubuzuba mbuboobo kati: 49 “Tanta chilundu eechi cha-Abbarimu, Chilundu chaNebbo chili munyika yaMowabbu chilangene aaJerikko, ubone nyika yaKkenani njindilikupa ma-Israyeli kuti ibe yabo. 50 Ulafwida muchilundu nchuwaba aafwiifwi kutanta akutolwa kubantu bako* mbuli mukulanaako Aroni wakafwida aaChilundu cha-Hori akutolwa kubantu bakwe, 51 nkaambo inywe kamuli babili teemwakasyomeka pe kulindime aakati kama-Israyeli kumaanzi aakuMeribba yakuKkadeshi, munkanda yaZini, nkaambo teemwakandisalazya pe kunembo lyama-Israyeli. 52 Nyika njindiyanda kupa ma-Israyeli ulayibonena kule, pesi tuzoonjili pe mulinjiyo.”