Makani Aakalembwa aaLukka
11 Jesu wakali kuliimwi ndawu kalikukomba mpawo naakamaninsya, umwi sikwiiya wakwe wakamubuzya kuti: “Mwaami, tuyiisye mbutweelede kukomba mbuli Johane mbaakayiisya basikwiiya bakwe kukomba.”
2 Nkinkaako wakati kulimbabo: “Kufumbwa chiindi nimukomba, amwaambe kuti: ‘Taata, alisalazigwe zina lyako. Abuze Bwaami bwako. 3 Buzuba abuzuba tupe chakulya chesu kweendelana anzitubulide buzuba oobo. 4 Alubo utulekelele zibi zyesu nkaambo andiswe tulabalekelela boonse batubisizya alubo utatunjizyi mumasunko pe.’”
5 Mpawo wakati kulimbabo: “Atuteedi umwi wanu ulaamweenzinyina mpawo waya kulinguwe aakati kamansiku mpawo wamubuzya kuti, ‘Mweenzuma, ndikwelete zinkwa zitatu, 6 nkaambo ndaswayigwa aamweenzuma uuli mulweendo, tandikwe chakumupa pe.’ 7 Mpawo kali mung’anda akusandule kuti: ‘Utandikataazyi pe me, ndakkiya kale kumulyango alubo ime abana bangu toona kale. Tazichichiti pe kuti ndibuke ndizookupe nzulikukumbila.’ 8 Ndimubuzya kuti, nikuba kuti taalikuyanda pe kubuka kuti amupe nzyayanda akaambo kakuti mweenzinyina, pesi kumamanino ulabuka kupela amupe nzyayanda akaambo kakuti wamunangatila kwachiindi. 9 Nkinkaako, ndimubuzya kuti, amwiinkilile kunembo kukumbila muzoopegwa, amwiinkilile kunembo kuyanduula muzoojana, amwiinkilile kunembo kukonkomona muzoojulilwa. 10 Nkaambo muntu woonse uukumbila, ulapegwa alubo muntu woonse uuyanduula, ulajana alubo muntu woonse uukonkomona, ulajulilwa. 11 Kwaamba choonzyo, mpali na wisi aakati kanu uunga kuti mwanaakwe wamukumbila muswi, ulamupa nzoka, kutali muswi? 12 Naakuti, kuti wamukumbila ji, ulamupa kabanze na? 13 Nkinkaako, kuti inywe kamuzi kupa bana banu zipo zibotu nikuba kuti muli babi, nkukwaamba kuti Wuso uuli kujulu, uzooyindilila kubapa muuya uusalala aabo bamukumbila!”
14 Nikwakayinda chiindi, wakatanda dimoni lyakapede kuti umwi muntu abe chimuumu. Dimoni eelyo nilyakazwa, mwaalumi ooyo wakasaanguna kwaambuula alubo makamu aabantu akagamba. 15 Pesi bamwi bakati: “Mwaalumi ooyu utanda madimoni kabelesya Bbeluzabbele,* mweendelezi wamadimoni.” 16 Alubo bamwi kabayanda kumusunka, bakasaanguna kumubuzya kuti abachitile chitondeezyo kuzwa kujulu. 17 Kazi nzibakali kuyeeya, wakati kulimbabo: “Bwaami boonse bwaanzeene bulanyonyooka alubo ng’anda yaanzeene iladilika. 18 Munzila iikozyenie, kuti Saatani waanzaana, bwaami bwakwe bulayimikila biyeni? Nkaambo inywe muti nditanda madimoni kandibelesya Bbeluzabbele. 19 Kuti ime kanditanda madimoni kandibelesya Bbeluzabbele, ani bana banu baatanda kababelesyani? Bana banu nchibatazoobe babetesi banu. 20 Pesi kuti kandibelesya munwe waLeza kutanda madimoni, zyaamba kuti Bwaami bwaLeza bwamusikila kamutayeeyeli pe. 21 Kuti mwaalumi uuli aamanguzu alubo uuli aazilwanisyo zikkwene walinda ng’anda yakwe yabwaami, zintu zyakwe zinookwabilidwe. 22 Pesi kuti kwasika muntu uuli aamanguzu kwiinda nguwe mpawo wamulwana akumuzunda, ulamunyanga zilwanisyo zyakwe zyoonse nzyalikusyoma alubo zintu nzyaabweza kulinguwe ulazyaabania. 23 Kufumbwa muntu uutali kubbazu lyangu ulandilwana, alubo kufumbwa muntu uutabunganizyi aamwi andime, ulikutatuula.
24 “Kuti muuya mubi wazwa mumuntu, ulayinda mundawu zitakwe maanzi kawuli kuyanduula ndawu yakupumuna mpawo kuti wayibula, ulaamba kuti, ‘Ndilabweeda kung’anda yangu nkundakazwa.’ 25 Mpawo nwaasika, ulajana ng’anda eeyo kayili yatanyelwa akubambwa kabotu. 26 Mpawo ulazwa kuti ukeete imwi myuuya iili musanu ayibili mibi loko kwiinda nguwo, alubo niyanjila ilakkala mukati. Nkinkaako, muntu ooyo ulajinka kali waba mubi loko kwiinda mbaakabede kumatalikilo.”
27 Naakachili kwaambuula zintu eezi, umwi mwanakazi wakali munkamu eeyo, wakoompolola kulinguwe kati: “Bulabotelwa bula bwakakunyampula ankolo nzwaakanyonka!” 28 Pesi Jesu wakati: “Peepe, babotelwa mbaabo bamvwa jwi lyaLeza akulibamba!”
29 Makamu aabantu naakali kubungana, wakasaanguna kwaamba kuti: “Zyalani eeli, ndizyalani bbi, liyanduula chitondeezyo, pesi taakwe chitondeezyo nchilitazoopegwe pe kunze kwachitondeezyo chaJona. 30 Nkaambo mbuli Jona mbaakaba chitondeezyo kubantu bakuNiniva, anguwe Mwanaamuntu mbatazoobe kuzyalani eeli. 31 Mubuzuba bwakubetekwa, mwaami wachanakazi wakumusanza uzoobusigwaamwi abantu bazyalani eeli alubo uzoobapa mulandu nkaambo wakazwa kumagolelo aanyika kuti azoomvwe busongo bwaSolomoni. Pesi amubone, muntu mupati kwiinda Solomoni mpali aano. 32 Mubuzuba bwakubetekwa, bantu bakuNiniva bazoobusigwaamwi azyalani eeli alubo bazoolipa mulandu nkaambo bakasanduka kuzintu nzyaakakambawuka Jona. Pesi amubone, muntu mupati kwiinda Jona mpali aano. 33 Kuti muntu wayasya lambe, talibikki aandawu iisisikene pe naakuti aansi aabbasikiti,* pesi ulibikka aachibikkilo chalambe, kuchitila kuti aabo banjila mung’anda bamunikilwe. 34 Lambe lyamubili ndiso lyako. Kuti liso lyako kalilangide chintu chimwi,* mubili wako woonse unooli mumuni, pesi kuti kalili aamunyono,* mubili wako unooli mudima. 35 Nkinkaako, chenjelela kuti mumuni uuli mulinduwe teemudima pe. 36 Kuti mubili wako woonse kawuli mumuni alubo kawutakwe mpulaamudima, unoomweka mbuli lambe likumunikila.”
37 Naakaamba zintu eezi, umwi muFarisi wakamutamba kuti bazoolyaamwi.* Nkinkaako, wakanjila wakkala aatebbulu. 38 Nikuba oobo, muFarisi ooyo wakagamba naakabona kuti wakasaanguna kulya* katasambide.* 39 Pesi Mwaami wakati kulinguwe: “NibaFarisi, musanzya aanze aankomeki andido, pesi mukati kanu kamuzwide butangazu abubi. 40 Inywe nibafuba-fuba! Ooyo wakapanga aanze, teenguwe na wakapanga amukati? 41 Pesi amuzipe kazili zipo zyalweetelelo,* zintu zili mumoyo mpawo mulasalala muzintu zyoonse. 42 Pesi muli aapenzi inywe nibaFarisi, nkaambo mupa chakkumi chaminti, cha-ru* achatununkilizyo toonse tulimwa, pesi tamukwe ndaba pe abululami alubo tamumuyandi pe Leza! Nikuba kuti mweelede kuchita zintu eezi, pesi tazyaambi kuti mweelede kuubaansya zimwi zintu eezyo. 43 Muli aapenzi inywe nibaFarisi, nkaambo muyandisya zyuuno zili kunembo* muzikombelo akujuzigwa kumisika! 44 Muli aapenzi nkaambo muli mbuli tubanda* twakazimaana,* bantu ntubalyata kabatazi kuti ntubanda!”
45 Mpawo umwi wabaabo bakazi Mulawu wakati kulinguwe: “Muyiisi, tee ulikututukila andiswe kuzintu eezi nzulikwaamba.” 46 Mpawo wakati: “Muli aapenzi andinywe nimuzi Mulawu, nkaambo mutwikka bantu zibbudu zilema kakuli inywe tamuyandi pe kuziguma nikuba akanwe!
47 “Muli aapenzi nkaambo muyaka tubanda* twabapolofita kakuli masianyookulu mbabo bakabajaya. 48 Kwaamba choonzyo, mulibakamboni bazintu zyakachitwa aamasianyookulu alubo muzuminana aanzizyo nkaambo bakajaya bapolofita pesi inywe mulikuyaka tubanda twabo. 49 Nzizyo zyakapa kuti Leza mubusongo bwakwe anguwe aambe kuti: ‘Ndizoobatumina bapolofita abaapostoli alubo bazoojaya bamwi babo akubapenzya, 50 kuchitila kuti zyalani eeli libe aamulandu waganzi* lyabapolofita boonse lyakatika kuzwa kumatalikilo aanyika, 51 kuzwa kuganzi lya-Abbelo kusikila kuganzi lyaZakkariya, ooyo wakajayilwa aakati kachipayililo atempele.’ Kwaamba choonzyo, ndimubuzya kuti, zyalani eeli lizoopegwa mulandu waganzi* lyabantu aaba.
52 “Muli aapenzi inywe nimuzi Mulawu, nkaambo mwakabweza kkii yaluzibo. Inywe teemwakanjila pe alubo aabo bayanda kunjila mulikubakasya!”
53 Nkinkaako, naakazwa oomo, balembi abaFarisi bakasaanguna kumubunganina kabali kumunjilila ayimwi mibuzyo myiingi, 54 kabamuteede kuchitila kuti bamuche kuzintu nzyataambe.