Johane Wakusaanguna
5 Muntu woonse uusyoma kuti Jesu nguKkristu, uzyedwe kuli Leza, alubo muntu woonse uumuyanda ooyo wakapa kuti azyalwe, ulamuyanda ooyo uuzyedwe kulinguwe. 2 Eezi nzizyo zipa kuti tuzibe kuti tulabayanda bana baLeza, kuti katumuyanda Leza akutobela milawu yakwe. 3 Nkaambo kuyanda Leza chaamba kubamba milawu yakwe alubo milawu yakwe tayimizyi pe, 4 nkaambo muntu woonse* uuzyedwe kuli Leza ulayizunda nyika. Alubo oolu nduluzundo lwazunda nyika, lusyomo lwesu.
5 Ngwani uukonzya kuzunda nyika? Teeyooyo uusyoma kuti Jesu Mwana waLeza na? 6 Jesu Kkristu nguwe wakaza kwiinda mumaanzi aganzi, kutali amaanzi kupela pesi amaanzi, aganzi. Alubo muuya ulikupa bukamboni nkaambo muuya nkasimpe. 7 Nkaambo kuli bakamboni batatu: 8 muuya, maanzi aganzi alubo eezi zitatu zilazuminana.
9 Kuti twazumina bukamboni bwabantu, bukamboni bwaLeza mbupati. Nkaambo oobu mbuubukamboni Leza mbwapa, bukamboni mbwaakapa atala aMwanaakwe. 10 Muntu uuba aalusyomo muMwana waLeza, ulaabukamboni mumoyo wakwe. Muntu uutakwe lusyomo muli Leza, wapa kuti abe mubeji, nkaambo taaba aalusyomo kubukamboni Leza mbwaakapa atala aMwanaakwe. 11 Alubo oobu mbuubukamboni bwakuti, Leza wakatupa buumi butamani alubo buumi oobu buli muMwanaakwe. 12 Ooyo uulaamwi aMwana, ulaabuumi oobu, pesi muntu uutalaamwi aMwana waLeza, takwaabo pe buumi oobu.
13 Ndilikumulembela zintu eezi, kuchitila kuti muzibe kuti muli aabuumi butamani, inywe nimuli aalusyomo muzina lyaMwana waLeza. 14 Oolu nduulusyomo* ndutulaalo mulinguwe lwakuti, kufumbwa chintu nchitukumbila cheendelana akuyanda kwakwe, ulatumvwa. 15 Alubo kuti katuzi kuti ulatumvwa muzintu zyoonse nzitukumbila, tulizi kuti tuzoozijana zintu nzitukumbila, mbukunga twazikumbila kulinguwe.
16 Kuti umwi muntu wabona mukombinyina kalikuchita chibi chiteeti lufu, uzoomukumbilila mpawo Leza uzoomupa buumi, nkukwaamba aabo batachiti chibi cheeta lufu. Kuli chibi cheeta lufu. Chibi eecho teenchicho pe nchindilikwaamba kuti amukumbilile. 17 Kutalulama koonse nchibi, nikuba oobo, kuli chibi chiteeti lufu pe.
18 Tulizi kuti muntu woonse uuzyedwe kuli Leza, takwe chiimbo chakuchita chibi pe, pesi ooyo uuzyedwe kuli Leza* ulamulanga, alubo mubi takonzyi pe kumujata. 19 Tulizi kuti tuzwa kuli Leza, pesi nyika yoonse ilikweendelezegwa aamubi. 20 Pesi tulizi kuti Mwana waLeza wakasika, akuti wakatupa kumvwisisisya, kuchitila kuti tube aaluzibo lwayooyo wakasimpe. Alubo tulaamwi ayooyo wakasimpe kwiinda muMwanaakwe Jesu Kkristu. Ooyu ngunguwe Leza wakasimpe, abuumi butamani. 21 Nibana, amutantamuke zibumbwa.