KuMahebberu

5 Nkaambo mupayizi mupati woonse uubwezegwa aakati kabantu, ulasalwa kuti abayiminine kuzintu zili atala aLeza, kuchitila kuti ape zipo azipayizyo zyazibi. 2 Ulakonzya kubeetelela aabo batazi alubo babisya,* nkaambo anguwe takwe manguzu, 3 alubo akaambo kazeezi, weelede kupa zipayizyo akaambo kazibi zyakwe mbuli mbachita akuzibi zyabantu.

4 Muntu talipi bulemu oobu akaambo kakuliyandila pe, pesi ubupegwa biyo kuti wayitwa aaLeza mbuli zyakachitwa kuli Aroni. 5 Munzila iikozyenie, Kkristu taakaliyandwiida bulemu kwiinda mukuba mupayizi mupati, pesi wakalemekwa aaYooyo wakamubuzya kuti: “Iwe ulimwanaangu, sunu ndaba wuso.” 6 Mbuli mbaamba lubo muli lumwi lugwalo kuti: “Uli mupayizi kukabe kutamani mbuli Melikkizedekki.”

7 Naakachili kupona aanyika,* Kkristu wakakomba nkombyo zyakukombelezya azyakukumbila, kalila loko amisozi kuli Yooyo wakali kukonzya kumufutula kulufu, alubo wakamvwigwa akaambo kakuti wakali kuyoowa Leza. 8 Nikuba kuti wakali mwana, wakayiya kuswiilila kuzwa kumapenzi ngaakaswaana. 9 Alubo naakachitwa kuti amaninine, wakaba aamulimu wakuti bantu boonse bamuswiilila, bazoojane lufutuko lutamani, 10 nkaambo wasalwa aaLeza kuti abe mupayizi mupati mbuli Melikkizedekki.

11 Tuli aazintu zyiingi zyakwaamba atala anguwe, alubo nziyumu kuzipandulula, nkaambo mwatindibala mukumvwa kwanu. 12 Nkaambo nikuba kuti lino* mweelede kuba bayiisi, pesi muchiyanda umwi muntu lubo kuti amuyiisye kuzwa kumasaangunino, zintu zyakusaanguna zili atala amakani aasalala aaLeza, alubo mwabweeda lubo kukuyanda malili, kutali chakulya chisimide. 13 Nkaambo muntu woonse wiinkilila kunembo kunywa malili, talizi pe jwi lyabululami, nkaambo mwana muniini. 14 Pesi chakulya chisimide nchabantu bakakomena, aabo bakayiisigwa kusiyanisya chibotu achibi kwiinda mukubelesya maanu aabo aakuyeeya.