KuMahebberu

6 Nkinkaako, mbukunga lino twayiinda njiisyo yakusaanguna iili atala aKkristu, atubeleke changuzu kuti tukomene, tutabikki imwi ntalisyo lubo, nkukwaamba, kusanduka kumilimu iifwide akuba aalusyomo muli Leza, 2 njiisyo iili atala akubbabbatizigwa akubikka maboko, kubusigwa kwabafwide alubeta lutamani. 3 Eezi nzizyo nzitutachite kuti Leza wazumizya choonzyo.

4 Nkaambo aabo bakamunikilwa aali chimwi chiindi, alubo bakalabila chipo chitabbadalwi chakujulu alubo bakatambula muuya uusalala 5 abakalabila jwi bbotu lyaLeza amanguzu aamubwiime bwazintu buza,* 6 pesi bazooleya, takuchikonzeki pe kuti babusilizigwe lubo kuti basanduke, nkaambo bakamugankamina lubo aachisamu Mwana waLeza akumufwisya bweeme kunembo lyabantu. 7 Nkaambo nyika itambula chilongezyo kuzwa kuli Leza, chiindi niinywa maanzi aamvula iikkala kayiwa aalinjiyo akupa kuti kube zimena zigwasya aabo bayilima. 8 Pesi kuti yapa kuti kumene maamvwa amasokwe aayasa, ilakakwa alubo nga yaba aafwiifwi kutukwa, mpawo kumamanino izootentwa.

9 Pesi kumakani aali atala andinywe nibayandwa, tuli aachoonzyo chakuti mulikuchita zintu zibotu, zintu zili atala alufutuko, nikuba kuti tulikwaambuula munzila eeyi. 10 Nkaambo Leza, teeLeza uutaluleme pe, zyakuti nga ulaluba mulimu wanu aluyando ndumwakatondeezya akaambo kazina lyakwe, kwiinda mukubelekela basalali akwiinkilila kunembo kubabelekela. 11 Pesi tuli aachiyandisyo chakuti umwi awumwi wanu abeleke changuzu mbuli mbaakali kuchita, kuchitila kuti abe aachoonzyo chimaninide chabulangilizi kusikila kumamanino, 12 kuchitila kuti mutabi bakandu* pe, pesi mutobelezye aabo bakona zisyomezyo kwiinda mukuba aalusyomo amoyo mulamfu.

13 Nkaambo Leza naakaamba chisyomezyo chakwe kuli Abbrahamu, mbukunga taakwe mupati ngwaakali kunookonkaawe pe, wakalikonkezya lwakwe, 14 kati: “Kwaamba choonzyo, ndizookulongezya alubo kwaamba choonzyo, ndizookuvuzya.” 15 Nkinkaako, Abbrahamu naakatondeezya moyo mulamfu, wakajana chisyomezyo eechi. 16 Nkaambo bantu bakonka aamuntu mupati kwiinda mbabo, alubo chikonke chabo chimaninsya kukazyania koonse, mbukunga nchisyomezyo chili mumulawu kulimbabo. 17 Munzila iikozyenie, chiindi Leza naakasala kubatondeezya aantanganana basikukona chisyomezyo kuti makanze aakwe taachinchi pe, wakatondeezya kuti ngachoonzyo* kwiinda muchikonke, 18 kuchitila kuti kwiinda muzintu zibili zitachinchi, zitondeezya kuti tazichiti pe kuti Leza abeje, iswe nitwakachijila kundawu yakuyubila tusungwaazigwe loko kuti tujatisisye kubulangilizi bubikkidwe kunembo lyesu. 19 Bulangilizi oobu mbutulaabo ningobyo* yabuumi bwesu, njachoonzyo alubo tayizungaani pe, alubo ilanjila mukketeni, 20 ooko Jesu sikusaanguna kunjila nkwaakanjila akaambo kandiswe, ooyo wakaba mupayizi mupati kukabe kutamani mbuli Melikkizedekki.