Lwakusaanguna Luya Kuli Timoti
5 Utamukalalili pe munene. Pesi ambuulaawe munzila iilikabotu mbuli kuti nguwuso, baalumi bachiniini mbuli kuti mbakulana abanike bako, 2 machembele mbuli kuti manyoko, banakazi bachiniini mbuli kuti mbachizi bako, akusalala koonse.
3 Babikkile maanu* bamukabafu babonwa kuti mbaamukabafu bachoonzyo.* 4 Pesi kuti mukamufu kali aabana naakuti bazukulu, aaba abayiye saansi kutondeezya kuti balamuyoowa Leza mumaanda aabo alubo ababweedezye bazyali babo, masianyinakulu amanyinakulu nzibeelede, nkaambo eezi zilatambulika mumeso aaLeza. 5 Mwanakazi uubonwa kuti ngumukamufu wachoonzyo alubo uutakwe nchalaacho, wabikka bulangilizi bwakwe kuli Leza, alubo ulayinkilila kunembo kukomba nkombyo zyakukombelezya azimwi nkombyo sikati amansiku. 6 Pesi ooyo uuyanda kukkutya ziyandwa aamubili wakwe, ulifwide nikuba kuti muumi. 7 Nkinkaako, yinkilila kunembo kubapa malayilile aaya, kuchitila kuti kutabi chintu nchibasolwaacho pe. 8 Kwaamba choonzyo, kuti muntu katababambi pe bakwe, kapati bamung’anda yakwe, nkukwaamba kuti walukaka lusyomo alubo mubi loko kwiinda muntu uutakwe lusyomo.
9 Mukamufu weelede kulembwa aakati kabaabo bayanda kugwasigwa kuti wasisya minyaka iili 60, kuti kakuli wakali aamulumi uumwi, 10 kuti kazibinkene aakuchita milimu mibotu, kuti kakuli wakakomezya bana bakwe munzila iilikabotu, kuti kakuli wakali kutambula beenzu, kuti kakuli wakasanzya mawulu aabasalali, kuti kakuli wakagwasilizya bakali mumapenzi, kuti kakuli wakali kulipeda kuchita milimu mibotu yoonse.
11 Nikuba oobo, utabalembi pe bamukabafu bachili baniini kuti bagwasigwe, nkaambo kuti chiyandisyo chabo chakoonana chasaanguna kubaanzaanisya aaKkristu, nga bayanda kukwatwa. 12 Alubo nga balyeetela lubeta nkaambo basiya lusyomo ndubakalaalo kumasaangunino.* 13 Alubo aachiindi nchicheecho, nga babula zyakuchita kabalikuzunga mumaanda aabantu, kutali kubula zyakuchita biyo, pesi nga balikuvwiya akunjilila makani aabamwi bantu, kabalikwaambuula zintu nzibateelede kwaambuula atala anzizyo. 14 Nkinkaako, chiyandisyo changu nchakuti, bamukabafu bachili baniini bakwatwe, bazyale bana, babambe maanda aabo, kuchitila kuti batamupi mweenya sikukazya wakuti atwaambe zintu zibi. 15 Kwaamba choonzyo, bamwi bakaleya kale kuti batobele Saatani. 16 Kuti kakuli mwanakazi uusyoma kali aababbululu bamukabafu, abagwasye, kuchitila kuti mbungano itaminwi. Mpawo mbungano ilagwasya aabo babonwa kuti mbaamukabafu bachoonzyo.*
17 Baalu bazulwida munzila iilikabotu, ababonwe kuti baleelela kupegwa bulemu bupati, kapati aabo babeleka changuzu mukwaambuula amukuyiisya. 18 Nkaambo lugwalo lwaamba kuti: “Toyelede kwaanga pule wang’ombe kumulomo chiindi napola zilyo,” akuti “Mubelesi uleelela kupegwa mbadalo yakwe.” 19 Utawuzumini pe mulandu wapegwa munene,* kunze kwakuti kwaba bukamboni bwabakamboni babili naakuti batatu. 20 Muntu uuli aachiimbo chakuchita chibi, mululamike kunembo lyabantu boonse, kuchitila kuti ibe nchenjezyo kubantu boonse.* 21 Ndilikukulayilila changuzu kunembo lyaLeza aKkristu Jesu angilozi zisalidwe, kuti ubambe malayilile aaya, kutalangi mbaboneka muntu alubo kutasaluuli pe.
22 Utafwambaanini kubikka maboko aako aamuntu woonse,* nikuba kuliswaanizya muzibi zyabamwi. Kkala kusalala.
23 Utachinoonywi maanzi kupela,* pesi konywa atuwayini tuche akaambo kamwida mwako akuchiswa-chiswa kwako.
24 Zibi zyabamwi zilazibinkana abantu boonse mpawo zipe kuti babetekwe, pesi zyabamwi nga zyazooboneka mukuya kwachiindi. 25 Munzila iikozyenie, milimu mibotu ilazibinkana abantu boonse alubo eeyo iitali mibotu, tayikooyinkilila kunembo kayisisidwe pe.