Makani Aakalembwa aaJohane
6 Mpawo Jesu wakazubuka Lwizi lwaGalili naakuti lwaTibberiya. 2 Alubo nkamu mpati yabantu yakali kumutobela nkaambo yakali kubona zitondeezyo zigambya nzyaakali kuchita naakali kuponia bachiswa. 3 Nkinkaako, Jesu wakatanta aachilundu, mpawo wakakkala aansi abasikwiiya bakwe. 4 Kuchiindi eecho, pobwe lyamaJuda litegwa Pasika lyakali lyaba aafwiifwi. 5 Jesu naakalanga akubona nkamu mpati yabantu yakali kuza kulinguwe, wakabuzya Filipi kuti: “Nkuukuli nkutukonzya kuula zinkwa kuti bantu aaba balye?” 6 Nikuba oobo, wakaamba oobo kuti amusunke nkaambo wakalizizi nzyaakali kuyanda kuchita. 7 Filipi wakamusandula kuti: “Zinkwa zyamadinari aali 200 tazibakkwani pe bantu aaba, nikuba kuti umwi awumwi wapegwa kaniini.” 8 Umwi wabasikwiiya bakwe uutegwa Andreya, mwanike waSimoni Petro wakati kulinguwe: 9 “Nkaka kalombe kali aazinkwa zyabbali zili musanu atuswi tubili. Pesi zilabasisyaali bantu biingi oobu?”
10 Jesu wakati: “Amubuzye bantu kuti bakkale aansi.” Mbukunga kwakali masokwe miingi aandawu eeyo, baalumi basika ku 5 000 bakakkala aansi. 11 Mpawo Jesu wakabweza chinkwa, walumba mpawo wakachipa bantu bakakkede mpawaawo. Wakachita zikozyenie akutuswi alubo bantu bakalya bakkuta. 12 Bantu nibakamaninsya kulya alubo kabali bakkuta, Jesu wakabuzya basikwiiya bakwe kuti: “Amubwezelele chakulya chasyaala kuchitila kuti kutabi chakulya chisowegwa.” 13 Nkinkaako, bakabwezelela chakulya chakasyaala alubo bakazuzya mabbasikiti aali 12 aachakulya chakasiigwa abaabo bakalya zinkwa zili musanu zyabbali.
14 Bantu nibakabona chitondeezyo nchaakachita, bakatalika kwaamba kuti: “Kwaamba choonzyo, ooyu nguuMupolofita wakaambwa kuti uzoosika munyika.” 15 Jesu kazi kuti bantu bakali baba aafwiifwi kusika kuti bazoomujate kuti bamubikke kuba mwaami, wakazwa, wabweeda lubo kuchilundu alikke.
16 Nilyakaba goko, basikwiiya bakwe bakakunuka baya kulwizi, 17 mpawo bakatanta bwaato kuti bazubuke baye kuKkapenawume. Aachiindi eechi, kwakali kwasiya pesi Jesu taakalinasika pe mpubakabede. 18 Mulwizi mwakaba mayuwe aayoosya akaambo kamoya wakali kuunga changuzu. 19 Nikuba oobo, nibakakwalapula kwamakkilomita aasika kumusanu naakuti aali musanu alimwi,* bakabona Jesu kalikweenda aajulu aamaanzi kalikuza kubwaato mpawo bakayoowa. 20 Pesi wakati kulimbabo: “Ndime, mutayoowi pe!” 21 Mpawo bakamubuzya kuti anjile mubwaato mpawo muchiindi chifwiifwi, bwaato bwakasika aanyika njumu, ooko nkubakali kuya.
22 Mubuzuba bwakatobela, bantu bakasyeede mutaleeliya aalwizi bakabona kuti taakwe bwaato bwakaliwo kunze kwabwaato buniini akuti Jesu taakanjila mubwaato abasikwiiya bakwe pesi basikwiiya bakwe bakayinkide aabalikke. 23 Nikuba oobo, maato aazwa kuTibberiya akasika aafwiifwi akundawu bantu nkubakalida chinkwa, Mwaami naakamaninsya kulumba. 24 Bantu nibakabona kuti Jesu abasikwiiya bakwe tabamo pe mumaato aayo, bakatanta maato aabo mpawo bakasika kuKkapenawume kuti bayanduule Jesu.
25 Nibakamujana mutaleeliya aalwizi, bakamubuzya kuti: “Rabbi, ani wasika lili ookuno?” 26 Jesu wakabasandula kuti: “Kwaamba choonzyo, ndimubuzya simpe kuti, tamulikundiyanduula akaambo kakuti mwakabona zitondeezyo pe, pesi akaambo kakuti mwakalya zinkwa mwakkuta. 27 Mutabelekeli chakulya chibola pe, pesi amubelekele chakulya chitaboli chipa buumi butamani, eecho nchatazoomupe Mwanaamuntu, nkaambo Taata Leza lwakwe, wakabikka chitondeezyo aalinguwe chakuti ulamuyanda.”
28 Nkinkaako, bakamubuzya kuti: “Tweelede kuchitaanzi kuti tubeleke milimu yaLeza?” 29 Mpawo Jesu wakabasandula kuti: “Kubeleka mulimu waLeza chaamba kuba aalusyomo muli yooyo ngwaakatuma.” 30 Mpawo bakamubuzya kuti: “Nchiichili chitondeezyo nchulikuchita, kuchitila kuti tuchibone mpawo tukusyome? Nguuli mulimu ngulikuchita? 31 Masianene akalya mana munkanda, mbuli mbukulembedwe kuti: ‘Wakabalosezya chinkwa kuzwa kujulu kuti balye.’” 32 Mpawo Jesu wakati kulimbabo: “Kwaamba choonzyo, ndimubuzya simpe kuti, Mozesi taakamupa chinkwa kuzwa kujulu pe, pesi Taata nguwe uumupa chinkwa chachoonzyo kuzwa kujulu. 33 Nkaambo chinkwa chaLeza, ngooyo uuseluka kuzwa kujulu alubo uupa buumi kunyika.” 34 Nkinkaako, bakati kulinguwe: “Mwaami, tupe chinkwa eechi chiindi choonse.”
35 Jesu wakati kulimbabo: “Ime ndili chinkwa chabuumi. Kufumbwa muntu uuza kulindime, tazoobi aanzala pe alubo kufumbwa muntu uundisyoma, tazoobi aanyota pe. 36 Pesi mbuli mbundakamubuzya kale, tamusyomi pe nikuba kuti mwakandibona. 37 Bantu boonse Taata mbandipa, bazoosika kulindime alubo ooyo uuza kulindime, tandizoomutandi pe, 38 nkaambo ndakaseluka kuzwa kujulu kuti ndizoochite kuyanda kwayooyo wakandituma, kutali kuyanda kwangu pe. 39 Ooku nkukuyanda kwayooyo wakandituma, kuti nditasweekelwi aawumwi wabaabo boonse mbaakandipa pesi uyanda kuti ndizoobabusye mubuzuba bwamamanino. 40 Nkaambo kuyanda kwaTaata nkwakuti, muntu woonse uuziba Mwana akuba alusyomo mulinguwe, abe aabuumi butamani alubo ndizoomubusya mubuzuba bwamamanino.”
41 Mpawo maJuda bakasaanguna kung’ung’una nkaambo wakali waamba kuti: “Ndili chinkwa chakazwa kujulu.” 42 Mpawo bakatalika kwaamba kuti: “Ani ooyu teeJesu na mwana waJosefa, wisi abanyina mbituzi? Nkamboonzi lino nalikwaamba kuti, ‘Ndakaseluka kuzwa kujulu’?” 43 Mpawo Jesu wakabasandula kuti: “Amuleke kungu’ung’una aakati kanu. 44 Taakwe muntu uukonzya kuza kulindime, kunze kwakuti Taata ooyo wakandituma wamukwela alubo ndizoomubusya mubuzuba bwamamanino. 45 Bapolofita bakalemba kuti: ‘Bantu boonse bazooyiisigwa aaJehova.’* Muntu woonse uuswiilila alubo uuzumina kuyiisigwa aaTaata, ulaza kulindime. 46 Taakwe muntu wakabwene Taata, kunze kwayooyo wakazwa kuli Leza, muntu ooyo nguwe wakabona Taata. 47 Kwaamba choonzyo, ndimubuzya simpe kuti, muntu woonse uusyoma, ulaabuumi butamani.
48 “Ime ndili chinkwa chabuumi. 49 Masianyookulu bakalya mana munkanda pesi bakafwa. 50 Eechi nchiichinkwa chizwa kujulu kuchitila kuti muntu woonse achilye mpawo atafwi pe. 51 Ime ndili chinkwa chuumi chakazwa kujulu. Kufumbwa muntu uulya chinkwa eechi, uzoopona kukabe kutamani. Kwaamba choonzyo, chinkwa nchindipa, mubili wangu* akaambo kabuumi bwanyika.”
52 Mpawo maJuda bakasaanguna kukazyania muli chabo-chabo kabati: “Mwaalumi ooyu kujana watupa biyeni mubili wakwe kuti tuulye?” 53 Nkinkaako, Jesu wakati kulimbabo: “Kwaamba choonzyo, ndimubuzya simpe kuti, kuti teemwalya mubili waMwanaamuntu akunywa ganzi lyakwe, tamukooba aabuumi pe mulindinywe. 54 Kufumbwa muntu uulya mubili wangu akunywa ganzi lyangu, ulaabuumi butamani alubo ndizoomubusya mubuzuba bwamamanino, 55 nkaambo mubili wangu nchakulya chachoonzyo alubo ganzi lyangu nchakunywa chachoonzyo. 56 Kufumbwa muntu uulya mubili wangu akunywa ganzi lyangu unoolaamwi andime alubo andime ndinoolaamwi anguwe. 57 Mbuli mbaakandituma Taata muumi, andime ndili muumi akaambo kaTaata alubo ooyo uundilya uzooba muumi akaambo kangu. 58 Eechi nchiichinkwa chakazwa kujulu. Tachili mbuli chinkwa nchibakalya masianyookulu mpawo bafwa. Kufumbwa muntu uulya chinkwa eechi, uzoopona kukabe kutamani.” 59 Wakaamba zintu eezi naakali kuyiisya muchikombelo* muKkapenawume.
60 Nibakamvwa oobo, basikwiiya bakwe biingi bakati: “Makani aaya alayoosya, ngwani uukonzya kwaaswiilila?” 61 Pesi Jesu kazi kuti basikwiiya bakwe bakali kung’ung’una, wakati kulimbabo: “Makani aaya amulebya na? 62 Kuti mwazoobona Mwanaamuntu katanta kaya nkwaakabede chiindi muzoochita biyeni? 63 Muuya uusalala nguwo uupa buumi, mubili taakwe ambuubede pe. Makani ngindamubuzya, muuya alubo mbuumi. 64 Pesi kuli bamwi aakati kanu batasyomi pe.” Nkaambo kuzwa kumasaangunino, Jesu wakalibazi aabo bakatali kusyoma, ayooyo wakali kuzoomuuzya. 65 Wakayinkilila kunembo kati: “Nchindamubuzya kuti, taakwe muntu uukonzya kuza kulindime kunze kwakuti wazumizigwa aaTaata.”
66 Akaambo kamakani aaya, basikwiiya bakwe biingi bakabweeda kuzintu nzibakasiide musule alubo teebakachili kweendaawe pe. 67 Nkinkaako, Jesu wakabuzya bali Kkumi Ababili kuti: “Andinywe muyanda kwiinka na?” 68 Simoni Petro wakamusandula kuti: “Mwaami, tulaya kulini? Nduwe nulaamakani aabuumi butamani. 69 Twakasyoma kale alubo twaziba kuti nduwe Uusalala waLeza.” 70 Jesu wakabasandula kuti: “Ndime ndakamusala inywe nibali kkumi ababili, teembubo na? Pesi umwi wanu ngusikubejelezya.”* 71 Kwiinda mumajwi aaya, wakali kwaamba Judasi mwana waSimoni Isikkariyoti, nkaambo nguwe wakali kuzoomuuzya, nikuba kuti wakali umwi wabali Kkumi Ababili.