KuBa-efeso
1 Ndime Pawulu, mwaapostoli waKkristu Jesu kwiinda mukuyanda kwaLeza, ndilikumulembela inywe nibasalali bali ku-Efeso, nimusyomeka nimujisini aaKkristu Jesu:
2 Amube aaluzyalo lupati aluumuno kuzwa kuli Leza Taateesu aMwaami Jesu Kkristu.
3 Atembawulwe Leza, Wisi waMwaami wesu Jesu Kkristu, nkaambo watulongezya achilongezyo choonse chamuuya mundawu zyakujulu katujisini aKkristu, 4 mbukunga wakatusala kuti tubaamwi anguwe* nyika kayitanabawo, kuchitila kuti tube bantu basalala alubo batakwe bubi kunembo lyakwe muluyando. 5 Nkaambo wakatusala kakuchili chiindi kuti tube bana bakwe, kwiinda muli Jesu Kkristu kweendelana azyakamubotela ambaakayanda, 6 kuchitila kuti atembawulwe akaambo kaluzyalo lwakwe lupati loko ndwaakatupa kwiinda muli yooyo ngwayandisya. 7 Kwiinda mulinguwe, twakaangununwa aachinunuzyo kakubelesegwa ganzi lyakwe, nkukwaamba, kulekelelwa kwazibi zyesu kweendelana akuvula* kwaluzyalo lwakwe lupati.
8 Wakapa kuti luzyalo oolu lupati luvule kulindiswe mubusongo boonse amukumvwisisisya koonse, 9 kwiinda mukutuzibya nsiswa yakwe iisalala, iili atala akuyanda kwakwe. Kweendelana ambaakayanda, we lwakwe wakakanza 10 kuti kube bweendelezi* zyaakukkwana ziindi zibikkidwe, kuchitila kuti abunganizye zintu zyoonse muli Kkristu, zintu zili kujulu azintu zili aanyika. Nisimpe kuti zintu zyoonse zizoobunganizigwa mulinguwe, 11 ooyo ngutujisini aamwi anguwe alubo ngutwakasalwa kuti tube basikukonaamwi anguwe, mbukunga twakasalwa kakuchili chiindi kweendelana amakanze aayooyo uuchita zintu zyoonse mbuli mbasala, kweendelana akuyanda kwakwe, 12 kuchitila kuti iswe nitwaba bakusaanguna kulangilila muli Kkristu, tuchite mulimu uutape kuti Leza atembawulwe akaambo kabulemu bwakwe. 13 Pesi andinywe mwakaba aabulangilizi mulinguwe nimwakamvwa jwi lyakasimpe, nkukwaamba makani mabotu aali atala alufutuko lwanu. Nimwakasyoma, mwakabikkwa chitondeezyo kwiinda mulinguwe, chamuuya uusalala wakasyomezedwe. 14 Muuya ooyu nchijatisyo nchitwakapegwa kakuchili chiindi, chakuti* tuzoojana lukono lwesu, kuchitila kuti bantu baLeza baangununwe kwiinda muchinunuzyo akupa kuti Leza atembawulwe mubulemu bwakwe.
15 Nkinkaako, kuzwa nindakamvwa atala alusyomo ndumulaalo muMwaami Jesu, aluyando ndumubatondeezya basalali boonse, 16 tandileki pe kulumba Leza akaambo kandinywe. Chiindi choonse ndilamwaamba munkombyo zyangu, 17 kuchitila kuti Leza waMwaami wesu Jesu Kkristu, Taata wabulemu, amupe muuya wabusongo awakumvwisisisya zintu nzyayubununa, muluzibo lwachoonzyo luli atala anguwe. 18 Wamunika meso aamyoyo yanu, kuchitila kuti muzibe bulangilizi mbwaakamwiitila, akuti muzibe mbubuli bupati bunoti mbwabambilide kuzoopa basalali kabuli lukono, 19 akuti muzibe mbaali mapati loko manguzu aakwe kulindiswe tubasyomi. Bupati bwamanguzu aakwe, bulaboneka munzila njaakaabelesyaayo 20 kuli Kkristu naakamubusya kuzwa kubafu akumukkazika kukuboko kwakwe kwachilisyo mundawu zyakujulu, 21 aajulu loko, kwiinda mfulumende zyoonse, abweendelezi, amanguzu, abwaami, amazina woonse aayitwa, kutali mubwiime bwazintu oobuno* kupela, pesi amuli oobo buza. 22 Alubo Leza wakabombya zintu zyoonse kunsi aamawulu aakwe akupa kuti abe mutwe wazintu zyoonse zyambungano. 23 Mbungano eeyo, mubili wakwe uuzwide yooyo uuzuzya zintu zyoonse muzintu zyoonse.