Samiyele Wakusaanguna
20 Mpawo Davida wakachija kazwa kuNayoti muRama. Nikuba oobo, Davida wakasika kuli Jonatani mpawo wakati: “Ndakachitaanzi? Mulandu wangu ngwanzi alubo ndakamubisizyaanzi wuso zyakuti nga ulayanda kundijaya?” 2 Jonatani naakamvwa oobo, wakati kulinguwe: “Tazikoochitika pe eezi. Tukoofwa pe. Ndeende takoochita chintu katandibuzizye pe, kufumbwa kuti nchipati naakuti nchiniini. Niinzi chinga chilapa kuti ndeende andisisile makani aaya? Eezi tazikoochitika pe.” 3 Pesi Davida wakakonka lubo kati: “Wuso uzizi kabotu kuti iwe ulandiyanda mpawo uzoowamba kuti, ‘Mutamubuzyi pe Jonatani makani aaya, nkaambo ulawusa.’ Pesi kwaamba choonzyo, mbuli Jehova mbali muumi anduwe mbuli muumi, kwasyaala ntaamu iimwi kupela kuti ndifwe.”
4 Jonatani wakati kuli Davida: “Kufumbwa nzutaambe ndilakuchitila.” 5 Davida wakati kuli Jonatani: “Juunza mweezi ulakkala alubo ndilangililwa kuti ndikalye aamwaami. Ndileke ndiinke ndikayube musokwe kusika mubuzuba bwachitatu goko. 6 Kuti wuso wandibula, waambe kuti: ‘Davida wakandikumbila kuti ndimuzumizye kuti achijaanine kumuunzi wakwe kuBbetelehema, nkaambo nkukooko kuli chipayizyo chipegwa munyaka amunyaka champuli yoonse.’ 7 Kuti wasandula kuti, ‘Zilikabotu,’ zyaamba kuti mubelesi wako taakwe nchayelede kuyoowa pe. Pesi kuti wanyema, ziba kuti ukanzide kundichisa. 8 Nditondeezye luyando lutamani ndimubelesi wako mbukunga wapangana chizuminano andime ndimubelesi wako kunembo lyaJehova. Kuti kandili aamulandu, iwe lwako ndijaye. Nkamboonzi nuyanda kunditola mumaboko aawuso?”
9 Jonatani naakamvwa oobo, wakati: “Utaambi oobo pe. Nga ndilaleka na kukubuzya kuti ndaziba kuti ndeende ukanzide kukuchisa?” 10 Mpawo Davida wakati kuli Jonatani: “Ngwani uutandibuzye kuti wuso wakusandula aabukali?” 11 Jonatani wakati kuli Davida: “Kuza twiinke musokwe.” Nkinkaako, boonse kabali babili bakayinka musokwe. 12 Jonatani wakati kuli Davida: “Jehova Leza wa-Israyeli abe kamboni kuti juunza ndilaambuula aandeende aachiindi eechino naakuti mubuzuba bwachitatu. Kuti watondeezya kuti ulakuyanda, nga ndilaleka na kukutumina jwi kuti ndikubuzye? 13 Pesi kuti ndeende kakanzide kukuchisa, Jehova achite oobo kapati kulindime kuti teendakubuzya akukuleka kuti wiinke muluumuno. Jehova abe aanduwe mbuli mbaakali aandeende. 14 Alubo tuzoonditondeezyi luyando lutamani lwaJehova na kandichipona anindafwa? 15 Utaleki pe kutondeezya bamung’anda yangu luyando lutamani, nikuba chiindi Jehova nanyonyoona basinkondonyina baDavida boonse aanyika.” 16 Nkinkaako, Jonatani wakapangana chizuminano abamung’anda yaDavida kati: “Jehova uzoobabeteka akubapa chisubulo basinkondonyina baDavida.” 17 Nkinkaako, Jonatani wakapa kuti Davida akonke lubo kuti unoomuyanda, nkaambo Jonatani wakali kumuyanda Davida mbuli mbaakali kuliyanda.
18 Mpawo Jonatani wakati kuli Davida: “Juunza mweezi ulakkala alubo iwe tunooliwo pe. Taakwe muntu uutanookkede aachuuno chako. 19 Mubuzuba bwachitatu, ndeende uzookuyanduula, nkinkaako, weelede kuza aandawu nkwaakayubide mubuzuba oobuya,* ukkale aafwiifwi abbwe eeli. 20 Ndizoowaala twaanta tutatu kulilimwi bbazu lyabbwe kandili kuchitaanga ndilikuyasa chimwi chintu. 21 Ninditazootume mubelesi, ndizoomubuzya kuti: ‘Yinka ukabweze twaanta ootuya.’ Kuti ndazoomubuzya kuti, ‘Bona, twaanta tuli kubbazu lyako, tubweze,’ iwe ulakonzya kuzwa mpuyubide, nkaambo kwaamba choonzyo, mbuli Jehova mbali muumi, eezi nga zyaamba kuti taakwe nchweelede kuyoowa pe akuti taakwe penzi pe. 22 Pesi kuti ndazoomubuzya kuti, ‘Bona, twaanta tuli kunembo biya ookuya,’ iwe weelede kweenda, nkaambo Jehova unooli wati weende. 23 Jehova abe aakati kesu kusikila kukabe kutamani, kunkani yachisyomezyo nchitwakachita ime anduwe.”
24 Nkinkaako, Davida wakayuba musokwe. Mweezi nwaakakkala, mwaami wakakkala aachuuno chakwe kuti alye. 25 Mwaami wakakkede aachuuno chakwe nchaakali kukkala mazuba woonse kumuduli. Jonatani wakakkede kalangenaawe alubo Abbineri wakakkede kumbali aaSawulu, pesi aachuuno chaDavida teekwakalikwe muntu pe. 26 Pesi mubuzuba oobo, Sawulu taakwe nchaakaamba pe, nkaambo wakalibuzya kuti: ‘Kweelede kuli chachitika chapa kuti Davida atasalali pe. Kweelede kuti tasalali pe.’ 27 Buzuba bwakatobela kuzwa mweezi nwaakakkala, mubuzuba bwachibili, chuuno chaDavida chakayinkilila kunembo kachitakwe muntu pe. Nkinkaako, Sawulu wakabuzya Jonatani mwanaakwe kuti: “Nkamboonzi mwana waJese natasikide jilo asunu kuti tuzoolye?” 28 Jonatani wakasandula Sawulu kati: “Davida wakandikombelezya kuti ndimuzumizye kuti ayinke kuBbetelehema. 29 Wakati, ‘Inche kaka ndizumizye ndiinke, nkaambo tweelede kupa chipayizyo kulindiswe katuli mpuli alubo mukulanaangu wandiita. Kuti kazikubotezya, ndizumizye ndiinke ndikabone bakulana bangu.’ Eezi nzizyo zyapa kuti Davida atasiki kuzoolya aamwaami.” 30 Kuzwa waawo, Sawulu wakamunyemena loko Jonatani alubo wakamubuzya kuti: “Iwe numwana wamwanakazi uubukila, ubonaanga tandizizi na kuti ulikusala kuba kubbazu lyamwana waJese? Kuchita oobo kupa kuti ube aabweeme iwe abanyoko.* 31 Kufumbwa kuti mwana waJese kachipona aano aanyika, iwe abwaami bwako tamukakkalilili pe. Nkinkaako, tuma muntu kuti akamweete, nkaambo weelede kufwa.”
32 Nikuba oobo, Jonatani wakati kuli wisi: “Nkamboonzi nayelede kujayigwa? Wakachitaanzi?” 33 Aachiindi nchicheecho, Sawulu wakawaala sumu kuti ayase Jonatani. Nkinkaako, Jonatani wakaziba kuti wisi wakakanzide kujaya Davida. 34 Chakufwambaana, Jonatani wakanyampuka kanyemede loko alubo taakalya pe mubuzuba bwachibili kuzwa mweezi nwaakakkala, nkaambo wakali wawusa akaambo kaDavida alubo wisi wakali wamusampawula.
35 Kuseeni, Jonatani wakayinka musokwe kuti akabonane aaDavida alubo mubelesi wachiniini wakali aanguwe. 36 Jonatani wakabuzya mubelesi wakwe kuti: “Ndikumbila kuti uchijaane ukabweze twaanta ntunditawaale.” Mubelesi wakachijaana mpawo Jonatani wakawaala kaanta kunembo lyakwe. 37 Mubelesi naakasika aawo aakawida kaanta nkaakawaala Jonatani, Jonatani wakoompolola kumubelesi kati: “Kaanta takali kunembo lyako na?” 38 Jonatani wakoompolola kumubelesi kati: “Fwambaana! Chijaana! Utanonoki!” Mpawo mubelesi waJonatani wakabweza twaanta, wabweeda kuli simalelaakwe. 39 Mubelesi taakamvwisisisya pe kuti eezi zyakali kwaambaanzi, pesi Jonatani aDavida mbabo kupela bakazi kuti zyakali kwaambaanzi. 40 Mpawo Jonatani wakapa mubelesi wakwe zilwanisyo akumubuzya kuti: “Zitole kumuunzi.”
41 Mubelesi naakayinka, Davida wakazwa aandawu yakali aafwiifwi kubbazu lyakumusanza mpawo Davida wakavuntama aansi wakotama kwaziindi zitatu alubo bakamyontana balila, pesi Davida nguwe wakalila loko. 42 Jonatani wakabuzya Davida kuti: “Yinka biyo muluumuno mbukunga toonse twakakonka muzina lyaJehova katwaamba kuti, ‘Jehova abe aakati kangu anduwe alubo abe aakati kabana bangu abana bako kukabe kutamani.’”
Davida wakanyampuka weenda mpawo Jonatani wakabweeda mumuunzi.