Samiyele Wakusaanguna
21 Nikwakayinda chiindi, Davida wakayinka kuNobbu kuli Ahimelekki mupayizi. Ahimelekki wakasaanguna kuyoowa naakaswaana Davida mpawo wakamubuzya kuti: “Nkamboonzi nuli aawulikke, kutakwe umwi muntu?” 2 Davida wakasandula Ahimelekki mupayizi kati: “Mwaami wandituma kuti ndichite chimwi chintu, pesi wandibuzya kuti: ‘Taakwe muntu weelede kuziba atala amulimu ooyu ngundakutuma kuti uchite alubo atala amalayilile ngindakupa.’ Ndaambuula aabalombe mbindeendaabo kuti tuswaanane kuliimwi ndawu. 3 Kuti kakuli zinkwa zili musanu nzukonzya kundipa, ndikumbila undipe naakuti undipe kufumbwa ziliwo.” 4 Mupayizi wakasandula Davida kati: “Taakwe chimwi chinkwa pe nchindilaacho kunze kwachinkwa chisalala kupela, pesi balombe mbulaabo balakonzya kuchilya kuti teebakoona aabanakazi.” 5 Davida wakasandula mupayizi kati: “Teetwakoona aabanakazi pe mbuli mbutwakachita chiindi nitwakali kwiinka kunkondo. Kuti mibili yabalombe aaba kayisalala nikuba kabachita milimu yabuyo, kweelede kuti sunu mibili yabo isalala loko.” 6 Nkinkaako, mupayizi wakamupa chinkwa chisalala, nkaambo teekwakalikwe chinkwa pe kunze kwachinkwa chachitondeezyo chakali chagwisigwa kunembo lyaJehova mubuzuba nikwakabikkwa chakali kuzwa aakujikwa.
7 Mubuzuba mbuboobo, kwakali umwi wababelesi baSawulu wakateelede kuzwa kunembo lyaJehova. Wakali kutegwa Dowegi, mu-Edomu, mupati wabeembeli baSawulu.
8 Davida wakabuzya Ahimelekki kuti: “Kuli sumu na naakuti panga ndukonzya kundipa? Ndakakachilwa kubweza panga lyangu niziba zilwanisyo zyangu, nkaambo mulimu wamwaami wakali kuyanda kuchitwa chakufwambaana.” 9 Naakamvwa oobo, mupayizi wakati: “Kuli panga lyaGoliyati muFilisiti, ooyo ngwaakajaya muKalonga ka-Ela, liputilidwe aamulembo kusule aakabaki kabupayizi. Kuti kuyanda kulibweza, libweze, nkaambo ndilyo kupela liliwo.” Davida wakati: “Taakwe limbi pe lili mbuli ndilyo. Ndipe ndileelyo.”
10 Mubuzuba mbuboobo, Davida wakanyampuka wayinkilila kunembo alweendo lwakwe kachija Sawulu alubo wakaakusika kuMwaami Akkishi wakuGati. 11 Babelesi ba-Akkishi bakamubuzya kuti: “Teenguwe na Davida ooyu, mwaami wanyika yakwe? Teenguwe na ngubakayimba kabazyana kabati,
‘Sawulu wajaya zyuulu,
Davida wajaya makumi aazyuulu’?”
12 Davida wakaabikka mumoyo majwi aayo alubo wakamuyoowa loko Mwaami Akkishi wakuGati. 13 Nkinkaako, wakachitaanga zilinunsukide kunembo lyabo alubo wakachita mbuli muntu uupengede aakati kabo.* Wakali kweengeenga aamakoma aageedi akuleka nte kazili kulolomoka kusika kumalezu. 14 Kumamanino, Akkishi wakabuzya babelesi bakwe kuti: “Mulibwene kuti mwaalumi ooyu ulipengede! Nkamboonzi nimwamweeta kulindime? 15 Mubonaanga mbache na bantu bapengede mbindilaabo, zyakuti nga mulandeetela mwaalumi ooyu kuti azoopengele kunembo lyangu? Mwaalumi ooyu weelede kunjila mung’anda yangu na?”