Kulonga
3 Mozesi wakaba mweembeli wambelele zyaJeturo wisizyala, mupayizi wakuMidiyani. Naakali kuzulwida mbelele eezyo kububbila bwankanda, wakasika kuchilundu chaLeza wakasimpe kuHorebbu. 2 Mpawo ngilozi yaJehova yakalibonia kulinguwe mumulilo uuvwilima aakati kachiteyo chamaamvwa. Naakachili kulanga, wakabona kuti chiteyo eecho chakali kuyaka pesi teechakali kupya pe. 3 Nkinkaako, Mozesi wakati: “Leka ndiinke ndikabone chigambyo eechi, ndibone kuti nkamboonzi chiteyo eechi chamaamvwa nichitalikupya.” 4 Jehova naakabona kuti Mozesi ulikuswena kuti abone zilikuchitika, wakamwiita muchiteyo chamaamvwa kati: “Mozesi, Mozesi.” Mpawo we wakati: “Ndime aano.” 5 Mpawo Leza wakati: “Utasweni aafwiifwi pe. Gwisya manyatela aako, nkaambo aandawu mpuyimvwi alasalala.”
6 Wakayinkilila kunembo kati: “Ndime Leza wawuso, Leza wa-Abbrahamu, Leza wa-Izakka aLeza waJakkobo.” Mpawo Mozesi wakasisa busyu bwakwe nkaambo wakali kuyoowa kulanga Leza wakasimpe. 7 Jehova wakayungizya kuti: “Kwaamba choonzyo, ndaabona mapenzi aabantu bangu bali mu-Ijipita alubo ndakumvwa kulila kwabo akaambo kabantu babamanikizya kubeleka. Ndilaazi machise ngibali kumvwa. 8 Ndilaseluka kuti ndikabavune mukuboko kwama-Ijipita akubagwisya munyika eeyo mpawo ndibatole kunyika mbotu alubo mpati, nyika iikunka malili abuchi, chilawu chamaKkenani, chamaHeti, chama-Amori, chamaPerezi, chamaHivi achamaJebbusi. 9 Lino bona! Kulila kwama-Israyeli kwasika kulindime alubo ndalubona lunya ndubali kuchitilwa aama-Ijipita bali kubadyaaminina. 10 Lino kuza ndikutume kuli Faro ukagwisye bantu bangu ma-Israyeli mu-Ijipita.”
11 Pesi Mozesi wakati kuli Leza wakasimpe: “Ani ndimeni biya kuti ndiinke kuli Faro kuti ndikagwisye ma-Israyeli mu-Ijipita?” 12 Mpawo Leza wakati: “Ndiyooba aanduwe alubo eechi nchitondeezyo kulinduwe chakuti ndime ndakakutuma. Nwaazoogwisya bantu kuzwa mu-Ijipita muzoobelekela* Leza wakasimpe aachilundu eechi.”
13 Pesi Mozesi wakati kuli Leza wakasimpe: “Atuteedi ndayinka kuma-Israyeli mpawo ndaakubabuzya kuti, ‘Leza wamasianyookulu wandituma kulindinywe’ mpawo baakundibuzya kuti, ‘Ani ngwani zina lyakwe?’ Ndeelede kuyoobasandula kutyeni?” 14 Leza wakati kuli Mozesi: “Ndiyooba Kufumbwa Mbundasala* Kuba,”* alubo wakayungizya kuti: “Eezi nzizyo nzweelede kuyoobuzya ma-Israyeli: ‘Ndiyooba, wandituma kulindinywe.’” 15 Mpawo Leza wakaambuula lubo aMozesi kati:
“Nzezi nzweelede kubuzya ma-Israyeli, ‘Jehova Leza wamasianyookulu, Leza wa-Abbrahamu, Leza wa-Izakka aLeza waJakkobo wandituma kulindinywe.’ Eeli ndiizina lyangu kukabe kutamani alubo oobu mbundeelede kuyeeyegwa mumazyalani amazyalani. 16 Yinka ukabunganizye baalu bama-Israyeli, ukababuzye kuti, ‘Jehova Leza wamasianyookulu wakalibonia kulindime, Leza wa-Abbrahamu, Izakka aJakkobo alubo wakati: “Choonzyo ndilimubwene alubo ndilizibwene nzimuli kuchitilwa mu-Ijipita. 17 Nkinkaako, ndaamba kuti, ndizoomugwisya mumapenzi ngimulikweetelwa ama-Ijipita mpawo ndimutole kunyika yamaKkenani, yamaHeti, yama-Amori, yamaPerezi, yamaHivi ayamaJebbusi, kunyika iikunka malili abuchi.”’
18 “Kwaamba choonzyo, bazooliswiilila jwi lyako alubo uzooyinkaamwi abaalu bama-Israyeli kumwaami wa-Ijipita alubo mweelede kuyoomubuzya kuti: ‘Jehova Leza wamaHebberu waambuula aandiswe. Nkinkaako, tukumbila kubweza lweendo lwamazuba aatatu tuye munkanda, kuchitila kuti tukape zipayizyo kuli Jehova Leza wesu.’ 19 Pesi ndizizi loko kuti mwaami wa-Ijipita takoozumina pe kuti mwiinke, kunze kwakuti wamanikizigwa aakuboko kuli aamanguzu. 20 Nkinkaako, ndizootandabika kuboko kwangu, nduume Ijipita amilimu yangu iigambya njindizoochita mumo, kuzwa waawo, uzoomuleka kuti mwiinke. 21 Ndizoopa kuti ma-Ijipita bamufwide luzyalo alubo nimutazooyende, tamuzooyendi kamulengelezya maboko pe. 22 Mwanakazi umwi awumwi weelede kukumbila zintu zyansiliva azyangolida azigogo kuli simayakilane wakwe akumwanakazi uukkala mung’anda yakwe alubo muzoozizwaatika bana banu balombe abasimbi alubo muzoobweza bunoti bwama-Ijipita.”