Makani aakalembwa aaMakko
10 Jesu wakazwa nkukooko mpawo wakasika kumigaano yaJudiya, mutala aaJodani alubo makamu aabantu akabungana lubo kulinguwe. Mbuli mbaakazibide kuchita, wakasaanguna kubayiisya lubo. 2 Mpawo baFarisi bakasika kabali aamakanze aakumusunka mpawo bakabuzya kuti mulawu wakali kuzumizya na kuti mwaalumi aleke mwanakazi wakwe. 3 Wakabasandula kuti: “Mozesi wakamulayilila kutyeni?” 4 Bakati: “Mozesi wakazumizya kuti mwaalumi alembe lugwalo lwakumutanda mpawo amuleke.” 5 Pesi Jesu wakati kulimbabo: “Mozesi wakamulembela mulawu ooyo nkaambo muli aamyoyo miyumu. 6 Nikuba oobo, kuzwa kumatalikilo aakulengwa kwazintu, ‘Leza wakalenga mwaalumi amwanakazi. 7 Akaambo kakaambo aaka, mwaalumi uzoosiya wisi abanyina 8 alubo aaba babili bazooba mubili uumwi,’ nkukwaamba kuti tabachili babili pe, pesi baba mubili uumwi. 9 Nkinkaako, eezyo Leza nzyaasungaamwi mujokwe, kutabi muntu uuzyaanzaanisya pe.” 10 Nibakaba mung’anda lubo, basikwiiya bakasaanguna kumubuzya mibuzyo atala ankani eeyi. 11 Wakati kulimbabo: “Kufumbwa mwaalumi uuleka mwanakazi wakwe mpawo wakwata uumbi, uchita bumambi alubo ubisizya mwanakazi wakwe, 12 alubo kuti mwanakazi wasiya mulumaakwe* akukwatwa aawumwi mwaalumi, uchita bumambi.”
13 Bantu bakasaanguna kweeta bana baniini kulinguwe kuti abajate pesi basikwiiya bakabakalalila. 14 Jesu wakanyema loko naakabona zintu eezi, mpawo wakati kulimbabo: “Amuleke bana baniini baze kulindime, muteezyi pe kubakasya, nkaambo Bwaami bwaLeza mbwabantu bali boobu. 15 Kwaamba choonzyo, ndimubuzya kuti, kufumbwa muntu uutatambuli Bwaami bwaLeza mbuli mwana muniini, tazoonjili pe mulimbubo.” 16 Mpawo wakabweza bana wababukata, wabalongezya mpawo wakababikka maboko.
17 Naakali kuyabweenda, umwi mwaalumi wakachijaana, wafugama kunembo lyakwe mpawo wakabuzya mubuzyo wakuti: “Muyiisi mubotu, ndeelede kuchitaanzi kuti ndikakone buumi butamani?” 18 Jesu wakati kulinguwe: “Nkamboonzi nundiita kuti mubotu? Taakwe muntu mubotu pe kunze kwaLeza alikke. 19 Uliizi milawu yakuti: ‘Utajayi, utachiti bumambi, utabbi, utapi bukamboni bwakubeja, utasosi bantu, lemeka wuso abanyoko.’” 20 Mwaalumi ooyo wakati kulinguwe: “Muyiisi, milawu yoonse eeyi ndalikwiibamba kuzwa kandichili muniini.” 21 Jesu wakamulanga, wamuyanda mpawo wakati: “Kusyeede chintu chimwi biyo nchweelede kuchita: Yinka ukawuzye zintu nzulaazyo mpawo upe bafwaba, mpawo ulaba aabunoti kujulu alubo nwaamana, uze ube mutobeli wangu.” 22 Pesi mwaalumi ooyo wakachiswa moyo mpawo wakeenda kawuside loko nkaambo wakali aazintu zyiingi.
23 Jesu naakalanga bantu, wakati kuli basikwiiya bakwe: “Chinooli chintu chiyumu loko kuti bantu bali aamali banjile muBwaami bwaLeza!” 24 Pesi basikwiiya bakagamba loko akaambo kamajwi aakwe. Mpawo Jesu wakati: “Nibana, nkuyumu loko kunjila muBwaami bwaLeza! 25 Nkuuba kuti nkamela yiinde muliso lyanaliti, kwiinda kuti muntu uunotede anjile muBwaami bwaLeza.” 26 Bakagamba loko mpawo bakati kulinguwe:* “Ngwani uukonzya kufutulwa?” 27 Jesu naakabalangisisya kumeso, wakati: “Kubantu tazikonzeki pe, pesi teembukubede pe kuli Leza nkaambo zintu zyoonse zilakonzeka kuli Leza.” 28 Petro wakasaanguna kumubuzya kuti: “Bona! Twakasiya zintu zyoonse mpawo twakutobela.” 29 Jesu wakati: “Kwaamba choonzyo, ndimubuzya kuti, taakwe muntu wakasiya ng’anda naakuti bakulana naakuti banike naakuti bachizi naakuti banyina naakuti wisi naakuti bana naakuti myuunda akaambo kangu alubo akaambo kamakani mabotu, 30 uutazoojani maanda, bakulana naakuti banike, bachizi, manyina, bana, amyuunda muchiindi eechino kazyiindulwidwe tuli 100 akupenzegwa alubo mubwiime bwazintu buza,* buumi butamani. 31 Pesi biingi bakusaanguna bazooba bakumamanino alubo bakumamanino bazooba bakusaanguna.”
32 Nibakali munzila kabali kutanta kabaya kuJerusalema, Jesu wakali kunembo lyabo mpawo bakagamba loko, pesi aabo bakali kutobela, bakasaanguna kuyoowa. Mpawo wakabatola lubo kumbali bali Kkumi Ababili, mpawo wakasaanguna kubabuzya atala azintu eezi zyakali zyaamba kuchitika kulinguwe, kati: 33 “Amubone! Tulikutanta katuya kuJerusalema alubo Mwanaamuntu uzootolwa kubapati babapayizi abalembi. Bazoomupa mulandu wakuti ajayigwe alubo bazoomutola kubantu bazisi, 34 alubo bantu aaba bazoomufubaazya, bamuswide mate, bamukwibbuule mpawo bamujaye pesi nikwayinda mazuba aatatu, uzoobuka.”
35 Jakkobo aJohane, bana baZebbediya bakasika kulinguwe mpawo bakati: “Muyiisi, tuyanda kuti utuchitile kufumbwa chintu nchitutaambe.” 36 Wakati kulimbabo: “Muyanda kuti ndimuchitileenzi?” 37 Mpawo bakati: “Tuyanda kuti waakuba mubulemu bwako, umwi akakkale kukuboko kwako kwachilisyo, umwi kwachimweensi.” 38 Pesi Jesu wakati kulimbabo: “Tamuzizi pe nzimulikukumbila. Mulakonzya na kunywa nkomeki njindilikunywa naakuti kubbabbatizigwa akubbabbatizigwa nkundili kubbabbatizigwaako?” 39 Bakati kulinguwe: “Iiyi tulakonzya.” Mpawo Jesu wakati kulimbabo: “Nkomeki njindilikunywa, muzooyinywa alubo nzila njindili kubbabbatizigwaayo njinzila njimutazoobbabbatizigwaayo. 40 Nikuba oobo, kukkala aansi kukuboko kwangu kwachilisyo naakuti kwachimweensi teendime pe ndipa, pesi nkukwabaabo bakabambilwa.”
41 Bamwi bali kkumi nibakamvwa makani aaya, bakabanyemena loko baJakkobo aJohane. 42 Pesi Jesu wakabayita boonse kuti baze kulinguwe mpawo wakati kulimbabo: “Mulizi kuti aabo babonwa kuti mbeendelezi bazisi bachita mbuli mbubayanda kubantu akuti balupati-pati beendelezya bantu chalunya. 43 Teembukweelede kuba pe aakati kanu, pesi kufumbwa muntu uuyanda kuba mupati aakati kanu, weelede kuba mubelesi wanu, 44 alubo kufumbwa muntu uuyanda kuba wakusaanguna aakati kanu, weelede kuba muzike waboonse. 45 Nkaambo naaba Mwanaamuntu wakaza kutali kuti azoobelekelwe pe, pesi kuti azoobeleke akupa buumi bwakwe kuti bube chinunuzyo chakunununa biingi.”
46 Mpawo bakasika kuJerikko. Pesi Jesu abasikwiiya bakwe ankamu mpati yabantu nibakali kuzwa muJerikko, Bbatimeyu (mwana waTimeyu), moofu uukumbilila, wakalikkede kumbali aanzila. 47 Naakamvwa kuti nguJesu wakuNazareta, wakasaanguna koompolola kati: “Mwana waDavida, Jesu, ndifwide luzyalo!” 48 Mpawo bantu biingi bakasaanguna kumukalalila kabamubuzya kuti awumune pesi wakayinkilila kunembo koompolola kati: “Mwana waDavida, ndifwide luzyalo!” 49 Nkinkaako, Jesu wakayimikila mpawo wakati: “Amumwiite azookuno.” Bakayita mwaalumi ooyo moofu kabati kulinguwe: “Utayoowi pe! Nyampuka, ulikukwiita.” 50 Mwaalumi ooyo wakasowa chigogo chakwe chaajulu, wasotoka kaya kuli Jesu. 51 Mpawo Jesu wakamubuzya kuti: “Uyanda kuti ndikuchitileenzi?” Moofu ooyo wakati kulinguwe: “Rabboni,* chita kuti ndibone lubo.” 52 Mpawo Jesu wakati kulinguwe: “Yinka. Lusyomo lwako lwakuponia.” Aachiindi nchicheecho, meso aakwe akabona lubo alubo wakasaanguna kumutobela munzila.