Lwabili kuBakkorinte
13 Aaka kaba kachitatu kandiyanda kuza kulindinywe. “Kubukamboni bwabakamboni* babili naakuti batatu, kaambo koonse keelede kubetekwa.” 2 Nikuba kuti tandili aandinywe lino, pesi kuli mbuli kuti ndili aandinywe kachibili alubo ndiyanda kubachenjezya kakuchili chiindi aabo bakabisya abamwi boonse, kuchitila kuti, nindazoosika kumamanino, nditabaleki pe aabo bakabisya, 3 mbukunga mulikuyanduula bukamboni bwakuti Kkristu, ooyo uuli aamanguzu kulindinywe alubo uuli aamanguzu aakati kanu, nguwe na choonzyo waambuula mulindime. 4 Nkaambo, kwaamba choonzyo, wakagankaminwa aachisamu akaambo kakubula manguzu, pesi lino muumi akaambo kamanguzu aaLeza. Nisimpe, andiswe tatukwe manguzu pe mbuli mbaakabede, pesi tuzooponaamwi anguwe akaambo kamanguzu aaLeza aalikubeleka mulindinywe.
5 Amwiinkilile kunembo kulilanga-langa kuti mubone kuti muli mulusyomo na. Amwiinkilile kunembo kulilanga-langa kuti mubone mbumubede choonzyo. Tamubwene na kuti Jesu Kkristu ulaamwi andinywe? Kunze kwakuti kamutatambuliki pe kuli Leza. 6 Ndili aalusyomo lwakuti muzoobona kuti tulatambulika.
7 Lino tulakomba kuli Leza kuchitila kuti mutabisyi. Makanze eesu taali aakuti tubonwe mbuli bantu batambulika pe, pesi ngakuti muchite zintu zilikabotu, nikuba kuti tulakonzya kubonwa mbuli bantu batatambuliki pe. 8 Nkaambo taakwe chintu nchituchita chikazyania aakasimpe pe, pesi tuchita zintu zisumpula kasimpe kupela. 9 Kwaamba choonzyo, tulabotelwa chiindi nitutakwe manguzu pesi inywe kamuli aamanguzu. Eezi nzizyo nzitukombela, kuti mululamikwe. 10 Nchindilikumulembela zintu eezi kanditali aandinywe, kuchitila kuti ndaakuba aandinywe, nditayinzilizyi kubelesya manguzu ngindakapegwa aaMwaami, kuti ndimuyake, kutali kuti ndimumwaye.
11 Chamamanino bakombima, amwiinkilile kunembo kubotelwa, kululamikwa, kuumbulizigwa, kuba aamuzeezo uumwi, kukkala muluumuno mpawo Leza siluyando alubo siluumuno unooli aandinywe. 12 Amujuzyanie amyonto iisalala. 13 Basalali boonse balikumujuzya.
14 Luzyalo lupati lwaMwaami Jesu Kkristu aluyando lwaLeza, amuuya uusalala ngutupedwe, azibe aandinywe moonse.