Makani mabotu aakalembwa aaMateyo
11 Jesu naakamaninsya kubapa malayilile basikwiiya bakwe bali 12, wakazwa kundawu eeyo mpawo wakaya kukuyiisya akukambawuka mumyuunzi yabo.
2 Pesi Johane, ooyo wakali mujele naakamvwa atala amilimu yaKkristu, wakatuma basikwiiya bakwe 3 kuti bakamubuzye kuti: “Nduwe Ooyo Ulikuza na, naakuti tweelede kulangilila uumbi?” 4 Mpawo Jesu wakabasandula kuti: “Amwiinke mukabuzye Johane nzimulikumvwa anzimulikubona: 5 Boofu baabubona, bateendi baabweenda, basizipele balikusalazigwa, batamvwi kumatwi balikumvwa, bafwide balikubusigwa alubo bafwaba balikubuzigwa makani mabotu. 6 Ulabotelwa ooyo uutajani kaambo kapa kuti alebwe mulindime.”
7 Nibakali munzila kabalikubweeda, Jesu wakasaanguna kubuzya makamu aabantu atala aJohane kuti: “Nimwakaya munkanda, mwakali kuya kukubonaanzi? Mwakali kuya kukubona tete kalili kutontwa aaluuwo na? 8 Ani mpo mwakali kuya kukubonaanzi? Muntu uuzweete zigogo ziteteete* na? Bantu bazwaata zigogo ziteteete bakkala mumaanda aabaami. 9 Ani mpo mwakali kuya kukuchitaanzi? Mwakali kuya kukubona mupolofita na? Kwaamba choonzyo, ndimubuzya kuti, muntu ooyo mupati kwiinda mupolofita. 10 Ooyo ngunguwe uulembedwe atala anguwe kuti: ‘Bona! Ndilikutuma mutumwa wangu kunembo lyako,* ooyo uutazookubambile nzila kunembo lyako.’ 11 Kwaamba choonzyo, ndimubuzya kuti, aakati kabantu bakazyalwa aabanakazi, taakwe nikwakaboneka muntu mupati kwiinda Johane Mubbabbatizi, pesi muntu muniini muBwaami bwakujulu, mupati kwiinda nguwe. 12 Kuzwa kumazuba aaJohane Mubbabbatizi kusikila lino, Bwaami bwakujulu mbuubulumbu bantu mbubalikulwisya kujana alubo aabo balikweezya changuzu, balikubujana. 13 Nkaambo boonse, Bapolofita aMulawu, bakapolofita kusikila kuchiindi chaJohane 14 alubo kuti kamuyanda kwaazumina makani aaya, ooyu ngunguwe ‘Elija weelede kusika.’ 15 Ooyo uuli aamatwi, amvwe.
16 “Zyalani eeli kujana ndalikozyanisyaani? Lili mbuli bana baniini bakkede kumusika, balikubuzya beenzinyina mbibasanaabo 17 kuti: ‘Twakamusibila nyeele pesi inywe teemwakazyana pe, twakoomoka pesi inywe teemwakalyuuma aatwaango akaambo kakuusa.’ 18 Munzila iikozyenie, Johane wakaza katalyi alubo katanywi, pesi bantu baamba kuti, ‘Ulaadimoni.’ 19 Mwanaamuntu wakaza kalya alubo kanywa, pesi bantu baamba kuti, ‘Amubone! Muntu ooyu mutangazu, uyandisya kunywa wayini, alubo mweenzinyina wabasimutelo abasizibi.’ Nikuba oobo, busongo bulaboneka kuti buliluleme kwiinda mumilimu yabo.”*
20 Mpawo wakasaanguna kusola myuunzi nkwaakachitide milimu iigambya, nkaambo bantu bankuko teebakasanduka pe, kati: 21 “Ulaapenzi Kkorazini! Ulaapenzi Bbetisayida! Nkaambo kaansinga milimu iigambya yakachitwa mulinduwe yakachitilwa muTire aSidoni, nikuli bakasanduka chiindi loko akuzwaata zigogo zyamasaka akulinana dyota. 22 Pesi ndimubuzya kuti, Mubuzuba Bwakubetekwa, chisubulo chanu chinooli chipati kwiinda chaTire* aSidoni. 23 Anduwe Kkapenawume, ubonaanga uzoosumpwidwa kujulu na? Peepe! Uzooselusigwa aansi muKabanda,* nkaambo kaansinga milimu iigambya yakachitwa mulinduwe yakachitilwa muSodoma, nikuli muunzi ooyo mpuuchili ambulisunu. 24 Pesi ndikubuzya kuti, Mubuzuba Bwakubetekwa, chisubulo chako chinooli chipati kwiinda chanyika* yaSodoma.”
25 Aachiindi eecho, Jesu wakati: “Ndilakutembawula aantanganana Taata, Mwaami wajulu anyika, nkaambo zintu eezi wazisisila basongo abayiide mpawo waziyubunwida bana baniini. 26 Iiyi Taata, nkaambo mbubo mbwaakayanda kuti kube. 27 Taata wabikka zintu zyoonse mumaboko aangu, alubo taakwe uumuzi kabotu Mwana kunze kwaTaata, alubo taakwe uumuzi kabotu Taata kunze kwaMwana, ayooyo Mwana ngwayanda kuyubunwida. 28 Amuze kulindime inywe moonse nimukatede animulemenedwe, mpawo ndilamulemununa. 29 Amuligwabike jokwe lyangu, mwiiye kulindime, nkaambo ndili aamoyo uubombede alubo ndilalibombya. Kuti mwachita oobo, muzoolemununwa. 30 Nkaambo jokwe lyangu talikataazyi pe kunyampula alubo mukuli wangu muuba.”