Kulonga
34 Mpawo Jehova wakati kuli Mozesi: “Beza* mabwe aapapalete aabili aali mbuli aakusaanguna mpawo aamabwe aayo ndilalemba majwi aakali aamabwe aapapalete aakusaanguna ngwaakapwaya. 2 Ulibambile nkaambo kuseeni ulatanta Chilundu chaSinayi ukayimikile kunembo lyangu aajulu aachilundu. 3 Taakwe weelede kutanta aanduwe alubo takweelede kuboneka muntu pe aachilundu choonse, niziba zivuubwa tazyeelede kuchela kunembo lyachilundu.”
4 Mozesi wakapanga mabwe aapapalete aali mbuli aakusaanguna mpawo wakafuma kuseeni watanta Chilundu chaSinayi mbuli mbaakalayililwa aaJehova, wakanyampwide mabwe aapapalete mukuboko kwakwe. 5 Jehova wakaseluka mujoba wayimikila aanguwe mpawo wakaambilizya zina lyaJehova. 6 Jehova wakayinda kunembo lyakwe kali kwaambilizya kuti: “Jehova, Jehova, Leza silweetelelo asiluzyalo, uutafwambaani kunyema, uuzwide luyando lutamani akasimpe,* 7 uutondeezya luyando lutamani kuzyuulu, uulekelela mulandu, nsotoko achibi, pesi uutaleki kusubula muntu uuli aamulandu alubo uusubula bana abazukulu akaambo kamulandu wamawisi kusikila kuzyalani lyachitatu alyachine.”
8 Mozesi wakakotama akuvuntama mpawaawo. 9 Mpawo wakati: “O Jehova, kuti kuli wandifwida luzyalo Jehova, yenda aandiswe, kazitakwe ndaba pe kuti tuli aamitwe miyumu. Tulekelele mulandu achibi chesu utubweze mbuli bantu bako.” 10 Mpawo Leza wakati: “Ndilikupanga chizuminano: Ndilachita zintu zigambya zitanachitika munyika yoonse kunembo lyabantu bako naakuti aakati kazisi zyoonse alubo bantu mbukkalaabo bazoobona milimu yaJehova nkaambo ndizoochita chintu chigambya kwiinda mulinduwe.”
11 “Amuswiilile nzindili kumulayilila sunu, ndilikutanda ma-Amori, maKkenani, maHeti, maPerezi, maHivi amaJebbusi kunembo lyanu. 12 Amuchenjelele kuti mutapangi chizuminano abantu bakkala munyika nkumuya, nkaambo balakonzya kuba kakole kulindinywe. 13 Mweelede kunyonyoona zipayililo zyabo, mupwayuule mapila aabo aasalala alubo mugonke zisamu zyabo zisalala.* 14 Utakotamini bamwi baleza pe nkaambo Jehova uyanda* kukombwa biyo alikke. NguLeza uuyanda kukombwa biyo alikke. 15 Amuchenjelele kuti mutapangi chizuminano abantu bakkala munyika eeyo, nkaambo nibachita bwaamu abaleza babo akupa zipayizyo kuli baleza babo, umwi muntu uzoomwiita mpawo mulakonzya kuzoolya chipayizyo chakwe. 16 Mpawo muzoobweza bana babo basimbi kuti bakwatwe aabana banu balombe alubo bana babo basimbi bazoochita bwaamu abaleza babo akupa kuti bana banu balombe bachite bwaamu abaleza babo.
17 “Utalipangili baleza bansimbi.
18 “Mweelede kusekelela Pobwe lyaChinkwa Chitakwe Bumena. Muzoolya chinkwa chitakwe bumena mbuli mbundakamulayilila. Mweelede kuchita oobo kwamazuba aali musanu aabili aachiindi chibikkidwe mumweezi wa-Abbibbi,* nkaambo mwakazwa mu-Ijipita mumweezi wa-Abbibbi.
19 “Mwana mulombe woonse uusaanguna kuzyalwa nguwangu kuswaanizya awazivuubwa zyanu zyoonse, kufumbwa kuti ngwang’ombe naakuti ngwambelele. 20 Mwana wadonki wakusaanguna weelede kumunununa aambelele, pesi kuti teewamunununa, umutyole nsingo. Mwanaako mulombe wakusaanguna weelede kumunununa. Taakwe weelede kuza kunembo lyangu katakwe chintu.
21 “Weelede kuchita milimu yako kwamazuba aali musanu alimwi, pesi mubuzuba bwamusanu aabili, weelede kupumuna.* Nikuba muchiindi chakulima amuchiindi chakutebula, weelede kupumuna.
22 “Mweelede kusekelela Pobwe lyaMviki awiiti iisaanguna kubizwa. Kumamanino aamunyaka, mweelede kusekelela Pobwe lyaKubunganizya.*
23 “Baalumi boonse beelede kuza kunembo lyaJehova Mwaami wakasimpe, Leza wama-Israyeli, tutatu amunyaka. 24 Nkaambo ndizoozitanda zisi kunembo lyako alubo ndizoochikomezya chilawu chako, taakwe muntu uutalombozye nyika yako chiindi nuya kukubona busyu bwaJehova Leza wako tutatu amunyaka.
25 “Utapi ganzi lyachipayizyo changu aamwi achintu chili aabumena. Chipayizyo chaPasika tacheelede kubambwa busiku boonse kusika kuseeni.
26 “Michelo mibotu loko iisaanguna kubizwa mumuunda wako, weelede kwiiyeta kung’anda yaJehova Leza wako.
“Utajiki mwana wampongo mumalili aabanyina.”
27 Jehova wakayinkilila kunembo kubuzya Mozesi kuti: “Weelede kwaalemba aansi majwi aaya, nkaambo kwiinda mumajwi aaya ndili kupanga chizuminano anduwe ama-Israyeli. 28 Mozesi wakakkala nkukooko aJehova kwamazuba aali 40 abusiku buli 40. Taakwe nchaakalya pe alubo taakwe nchaakanywa. Leza wakalemba majwi aachizuminano, nkukwaamba Milawu Iili Kkumi aamabwe aapapalete.
29 Mpawo Mozesi wakaseluka muChilundu chaSinayi kajisi mabwe aapapalete aabili aaBukamboni mukuboko kwakwe. Naakasika munsi aachilundu, taakazi pe kuti busyu bwakwe bwakali kumweka, nkaambo wakali waambuula aaLeza. 30 Aroni ama-Israyeli boonse nibakamulanga, bakabona kuti busyu bwakwe bwakali kumweka mpawo bakayoowa kuswena aafwiifwi anguwe.
31 Pesi Mozesi wakabayita. Aroni abasilutwe boonse bambungano bakayinka kulinguwe alubo Mozesi wakaambuula aambabo. 32 Ma-Israyeli boonse bakaswena aafwiifwi anguwe mpawo wakabapa milawu yoonse Jehova njaakamupede muChilundu chaSinayi. 33 Mozesi naakali kumaninsya kwaambuula aambabo, wakali kulivumba kumeso amulembo. 34 Pesi naakali kwiinka kunembo lyaJehova kuti akaambuule aanguwe, wakali kugwisya mulembo do azwe. Mpawo wakazwa waakubuzya ma-Israyeli malayilile ngaakali wapegwa. 35 Ma-Israyeli bakabona kuti busyu bwaMozesi bwakali kumweka mpawo Mozesi wakalivumba lubo kumeso amulembo kusikila naakabweeda kuyoowambuula aaLeza.