Joshuwa
4 Mbubakamana biyo bantu boonse kuzubuka Jodani, Jehova wakati kuli Joshuwa: 2 “Bweza baalumi bali 12 kuzwa aakati kabantu, muntu uumwi kuzwa kumusyobo umwi awumwi, 3 ubalayilile kuti: ‘Amubweze mabwe aali 12 aakati kaJodani aayimvwi bapayizi mwiinke aawo mukaabikke mpumutakoone sunu mansiku.’”
4 Nkinkaako, Joshuwa wakayita baalumi bali 12 mbaakali wasala aakati kama-Israyeli, mwaalumi uumwi kuzwa kumusyobo umwi awumwi, 5 mpawo wakati kulimbabo: “Amwiinde kunembo aaBbokesi lyaJehova Leza wanu, aakati kaJodani, mpawo umwi awumwi wanu apikule bbwe kweendelana anamba yamisyobo yama-Israyeli, 6 kuti abe chitondeezyo aakati kanu. Kuti mukuya kwachiindi bana banu bazoobuzye kuti, ‘Mabwe aaya nganzi?’ 7 Mweelede kuzoobabuzya kuti, ‘Maanzi aamuli Jodani akayimikila kunembo aabbokesi lyaJehova lyachizuminano. Nilyakazubuka Jodani, maanzi aamuli Jodani akayimikila. Mabwe aaya anooli chiyubulusyo* chitamani kuma-Israyeli.’”
8 Nkinkaako, ma-Israyeli bakachita mbuli mbubakalayililwa aaJoshuwa. Bakabweza mabwe aali 12 kuzwa aakati kaJodani mbuli Jehova mbaakalayilila Joshuwa kweendelana anamba yamisyobo yama-Israyeli. Bakaatola kundawu nkubakali kuyoowona mpawo bakaabikka nkukooko.
9 Joshuwa wakabikka mabwe aali 12 aakati kaJodani, aandawu mpubakayimvwi bapayizi bakanyampwide bbokesi lyachizuminano, mabwe aayo mpaachili kusika sunu.
10 Bapayizi bakanyampwide Bbokesi bakaliimvwi aakati kaJodani kusikila nizyakamana zintu zyoonse Jehova nzyaakalayilila Joshuwa kuti abuzye bantu kuti bachite, kweendelana azintu zyoonse Mozesi nzyaakalayilila Joshuwa. Aachiindi eecho, bantu bakali kuzubuka chakufwambaana. 11 Mbubakamana biyo boonse kuzubuka, andilyo Bbokesi lyaJehova abapayizi bakazubuka bantu kabalangide. 12 Mpawo musyobo waRubbeni amusyobo waGadi ahafu yamusyobo waManase, bakazubuka kabalibambilide nkondo kunembo lyama-Israyeli mbuli mbaakali wabalayilila Mozesi. 13 Masooja aasika ku 40 000 ibakalibambilide nkondo, bakazubuka kunembo lyaJehova baya kunkanda yaJerikko.
14 Mubuzuba oobo, Jehova wakasumpula Joshuwa kunembo lyama-Israyeli boonse, bakali kumulemeka* loko mumazuba woonse aabuumi bwakwe mbuli mbubakali kumulemeka loko Mozesi.
15 Mpawo Jehova wakati kuli Joshuwa: 16 “Layilila bapayizi banyampwide bbokesi lyaBukamboni kuti bazwe muli Jodani.” 17 Nkinkaako, Joshuwa wakalayilila bapayizi kuti: “Amuzwe muli Jodani.” 18 Bapayizi bakanyampwide bbokesi lyachizuminano chaJehova nibakazwa aakati kaJodani amawulu aabo naakalyata aanyika njumu, maanzi aamuli Jodani akasaanguna lubo kukunka akupawula mbuli mbukwakabede kumatalikilo.
19 Bantu bakazwa kuJodani mubuzuba bwakkumi mumweezi wakusaanguna, baakukkempa kuGiligali, kumugaano waJerikko uuli kubuzwezuba.
20 Mabwe aali 12 ngibakabweza muli Jodani, Joshuwa wakaabikka kuGiligali. 21 Mpawo wakabuzya ma-Israyeli kuti: “Mumazuba aali kunembo, bana banu nibaakumubuzya kuti, ‘Mabwe aaya nganzi?’ 22 mweelede kuzoobapandulwida kuti: ‘Ma-Israyeli bakazubuka Jodani aanyika njumu 23 Jehova Leza wanu naakayuminizya maanzi aamuli Jodani kunembo lyabo kusikila bazubuka, mbuli Jehova Leza wanu mbaakachita kuLwizi Lusalala naakaluyuminizya kunembo lyesu kusikila twazubuka. 24 Wakachita zintu eezi kuchitila kuti bantu boonse baanyika bazibe mbukuli aamanguzu kuboko kwaJehova akuti andinywe mukkale kamumuyoowa Jehova Leza wanu.’”