Samiyele Wachibili
12 Nkinkaako, Jehova wakatuma Natani kuli Davida. Wakasika kulinguwe, wamubuzya kuti: “Muli umwi muunzi, kwakali baalumi babili, umwi wakalinotede mpawo umwi wakali kufwaba. 2 Mwaalumi wakanotede wakali aambelele ang’ombe zyiingi loko. 3 Pesi mwaalumi wakali kufwaba, taakwe nchaakalaacho pe kunze kwakabelele kamwi kazyazi nkaakawula. Wakali kukabamba kabotu alubo kakakomena kakali aanguwe abana bakwe balombe. Kakali kulya chakulya chiche nchaakalaacho akunywida munkomeki yakwe alubo kakali koona mumaboko aakwe. Kakaba mbuli mwanaakwe musimbi. 4 Mukuya kwachiindi, mwaalumi wakanotede wakasikilwa mweenzu, pesi taakwe naakabweza mbelele yakwe naakuti ng’ombe yakwe kuti ajikile mweenzu wakali wamuswaya. Nikuba oobo, wakabweza kabelele kamwaalumi wakali kufwaba, wakajayila mweenzu ooyo.”
5 Davida naakamvwa oobo, wakamunyemena loko mwaalumi ooyo mpawo wakati kuli Natani: “Kwaamba choonzyo, mbuli Jehova mbali muumi, mwaalumi wakachita oobo weelede kufwa! 6 Alubo weelede kubbadala zimwi mbelele zine akaambo kakabelele aako, nkaambo wakachita zintu eezi akuti taakatondeezya luzyalo pe.”
7 Mpawo Natani wakati kuli Davida: “Mwaalumi ooyo nduwe! Nzezi nzyaamba Jehova Leza wa-Israyeli: ‘Ime lwangu ndakakunanika kuti ube mwaami wa-Israyeli alubo ndakakuvuna mukuboko kwaSawulu. 8 Ndakali kuyanda kukupa ng’anda yasimalelaako akubikka banakazi basimalelaako mumaboko aako alubo ndakakupa ng’anda ya-Israyeli ayaJuda. Kuyungizya aali zeezi, ndakali kuyanda kukuchitila zimwi zyiingi loko. 9 Nkamboonzi nwaakasampawula jwi lyaJehova kwiinda mukuchita chintu chibi mumeso aakwe? Wakajaya Uriya muHeti apanga! Mpawo wakabweza mwanakazi wakwe kuti abe mwanakazi wako nwaakamujaya aapanga lyama-Amoni. 10 Lino panga talikoozwa pe mung’anda yako, nkaambo teewakandilemeka pe kwiinda mukubweza mwanakazi wa-Uriya muHeti kuti abe mwanakazi wako.’ 11 Nzezi nzyaamba Jehova: ‘Ndilakweetela penzi lizwa mung’anda yako alubo ndilabweza banakazi bako ndibape umwi mwaalumi* kawulangide mpawo uloona aabanakazi bako zuba kalibala.* 12 Nikuba kuti wakazichita kusisikizya, ime ndilazichita kunembo lyama-Israyeli boonse zuba kalibala.’”*
13 Mpawo Davida wakati kuli Natani: “Ndabisizya Jehova.” Natani wakasandula Davida kati: “Anguwe Jehova wakulekelela chibi chako.* Tukoofwa pe. 14 Nikuba oobo, akaambo kakuti teewakamulemeka pe Jehova munkani eeyi, kwaamba choonzyo, mwanaako mulombe wazyalwa lino-lino ulafwa.”
15 Kuzwa waawo, Natani wakayinka kung’anda yakwe.
Mpawo Jehova wakapa kuti mwana waDavida wakali wazyalwa aamwanakazi wa-Uriya achiswe. 16 Davida wakakombelezya Leza wakasimpe akaambo kamwana ooyo. Davida wakalyiimya kulya alubo wakali kunoonga wanjila mung’anda yakwe wabuchesya kalede aansi. 17 Nkinkaako, baalu bamung’anda yakwe bakasika mpaakabede mpawo bakeezya kumubusya mpaakalede, pesi wakakaka alubo taakalya aambabo pe. 18 Mubuzuba bwamusanu aabili, mwana wakafwa, pesi babelesi baDavida bakayoowa kumubuzya kuti mwana wafwa. Bakati: “Mwana naakachili muumi, twakaambuulaawe, pesi taakatuswiilila pe. Ani lino nga tulamubuzya biyeni kuti mwana wafwa? Ulakonzya kutuchitila zimbi ooyu.”
19 Davida naakabona babelesi kabali kuvwiya-vwiya, wakaziba kuti mwana wakali wafwa. Davida wakati kubabelesi bakwe: “Mwana wafwa na?” Bakamusandula kuti: “Iiyi, wafwa.” 20 Nkinkaako, Davida wakabuka mpaakalede. Wakasamba, wanana mafuta, wachincha zigogo mpawo wakayinka kung’anda yaJehova waakukomba. Kuzwa waawo, wakayinka kung’anda yakwe* waakukumbila kuti bamweetele chakulya mpawo wakalya. 21 Babelesi bakwe bakamubuzya kuti: “Nkamboonzi nwaachita oobu? Mwana naakachili muumi, wakalyiimya kulya alubo wakali kulila chiindi choonse, pesi mbaafwa biyo mwana, wanyampuka mpawo walya.” 22 Wakasandula kuti: “Mwana naakachili muumi, ndakali kulyiimya kulya alubo ndakali kulila, nkaambo ndakalibuzya kuti, ‘Ngwani uuzi, amwi Jehova ulakonzya kundifwida luzyalo akuleka mwana kali muumi.’ 23 Lino mwana wafwa, nkamboonzi nindeelede kulyiimya kulya? Nga ndilamubusya na? Andime ndizoofwa mbuli nguwe, pesi we takooboola pe kulindime.”
24 Kuzwa waawo, Davida wakawumbulizya mwanakazi wakwe Bbati-shebba. Wakayinka kulinguwe waakoonaawe. Mukuya kwachiindi, wakatumbuka mwana mulombe mpawo wakawuzikwa kuti Solomoni.* Jehova wakamuyanda Solomoni, 25 alubo wakatuma mupolofita Natani amulumbe wakuti mwana ooyo awuzikwe kuti Jededaya,* akaambo kaJehova.
26 Jowabbu wakayinkilila kunembo kulwana Rabba, muunzi wama-Amoni alubo wakabweza muunzi wamwaami.* 27 Mpawo Jowabbu wakatuma batumwa kuli Davida kuti bakaakumubuzye kuti: “Ndawulwana muunzi waRabba mpawo ndabweza muunzi wamaanzi.* 28 Lino, bunganizya masooja woonse aasyaala, mulwane muunzi, muubweze. Kuti teekwaba oobo, ndilaba ndime nditawubweze muunzi ooyo mpawo mpuwo ilaza kulindime.”*
29 Davida wakabunganizya masooja woonse mpawo wakayinka kuRabba waakulwana muunzi ooyo alubo wakawubweza. 30 Kuzwa waawo, wakagwisya ngwaani yabwaami aamutwe waleza uutegwa Malikkamu. Ngwaani eeyo yakali kulema talenta* limwi lyangolida alubo yakali aamabwe aayandikana mpawo yakabikkwa aamutwe waDavida. Alubo bantu bamumuunzi ooyo wakabanyanga zintu zyiingi. 31 Wakagwisya bantu bakali mumuunzi ooyo mpawo wakabapa mulimu wakuti banenge mabwe awakuti babelesye zibelesyo zyansimbi zibosya atuleba twansimbi amulimu wakuuma zitina. Eezi nzizyo nzyaakachita kumyuunzi yoonse yama-Amoni. Kumamanino, Davida ankamu yoonse yamasooja bakabweeda kuJerusalema.