Milimu yaBaapostoli
15 Bamwi baalumi bakakunuka kabazwa kuJudiya mpawo bakasaanguna kuyiisya bakombinyina kuti: “Kuti teemwapalulwa kweendelana aMulawu waMozesi, tamuzoofutulwi pe.” 2 Pesi Pawulu aBbanabbasi teebakazuminana aambabo pe alubo nibakakazyania loko, kwakachitwa mabambe aakuti Pawulu aBbanabbasi abamwi aakati kabo, batole nkani eeyi kubaapostoli akubaalu bakali kuJerusalema.
3 Bamumbungano nibakabasindikila kwakasinzo-sinzo, baalumi aaba bakayinkilila kunembo alweendo lwabo. Bakayinda kuFonikke akuSamariya kabalikwaambuula atala akusanduka kwabantu bazisi. Bakombima nibakamvwa oobo, bakakondwa loko. 4 Nibakasika kuJerusalema, bamumbungano, baapostoli abaalu bakabatambula kabotu mpawo bakababuzya zintu zyiingi Leza nzyaakachitide kwiinda mulimbabo. 5 Pesi bamwi bakabunga kabaFarisi bakali baba basyomi, bakanyampuka aazyuuno zyabo mpawo bakati: “Bantu aabo beelede kupalulwa akulayililwa kuti babambe Mulawu waMozesi.”
6 Nkinkaako, baapostoli abaalu bakabunganaamwi kuti bayilange-lange nkani eeyi. 7 Nibakaambuula kwachiindi chilamfu,* Petro wakanyampuka, mpawo wakababuzya kuti: “Nibaalumi, bakombima, muzizi kabotu kuti, kumazuba aakumasaangunino, Leza wakandisala aakati kanu, kuti kwiinda mulindime, bantu bazisi bamvwe jwi lyamakani mabotu mpawo basyome. 8 Alubo Leza uuzi myoyo yabantu, wakapa bukamboni kwiinda mukubapa muuya uusalala mbuli mbaakachita kulindiswe. 9 Wakapa kuti kutabi musiyano aakati kesu ambabo, pesi wakasalazya myoyo yabo kwiinda mulusyomo. 10 Ani nkamboonzi nimulikusunka Leza, kwiinda mukubagwabika jokwe munsingo basikwiiya, masianene ndibakakachilwa kunyampula andiswe nditulikukachilwa kunyampula? 11 Peepe beenzuma, iswe tuli aalusyomo lwakuti tuzoofutulwa kwiinda muluzyalo lupati lwaMwaami Jesu mbuli mbabo.”
12 Nibakamvwa oobo, bantu boonse bakawumuna, mpawo bakasaanguna kuswiilila Bbanabbasi aPawulu kabalikwaamba zigambyo zyiingi azitondeezyo Leza nzyaakachita kwiinda mulimbabo kubantu bazisi. 13 Nibakamaninsya kwaambuula, Jakkobo wakati: “Nibaalumi, bakombima, amundiswiilile. 14 Sayimoni watupandulwida zizwide Leza mbaakabayeeya kakusaanguna bantu bazisi kuti asale bantu bayitwa aazina lyakwe aakati kabo. 15 Eezi zyeendelana aamajwi aakalembwa aaBapolofita aakuti: 16 ‘Zyaakwiinda zintu eezi, ndizooboola ndizoolibusye lubo tente lyaDavida liwide.* Ndizooyakulula matongo aalyo, libe mbuli mbulyakabede, 17 kuchitila kuti bantu batasyaale, bayanduule Jehova* amoyo woonse kabalaamwi abantu bazisi zyoonse, bantu bayitwa aazina lyangu, mbaamba Jehova* ulikuchita zintu eezi, 18 uuzibinkene kuzwa chiindi.’ 19 Nkinkaako, ime ndasala kuti, tutabakataazyi pe bantu bazisi balikusandukila kuli Leza. 20 Pesi atubalembele kuti batantamuke zintu zitasalali akaambo kakuti zyakapayizigwa kuzibumbwa, kubwaamu,* kuzintu zisinidwe* akuganzi. 21 Nkaambo kuzwa chiindi, eezyo zyakalembwa aaMozesi zilikukambawukwa mumuunzi amuunzi. Alubo zilikubalilwa aajulu muzikombelo Sabata imwi ayimwi.”
22 Mpawo baapostoli, abaalu, aamwi ambungano yoonse, bakasala kutuma bamwi baalumi basalidwe aakati kabo, kuti baye ku-Antiyokkiya aamwi aPawulu aBbanabbasi. Bakatuma baalumi bakali kuzulwida aakati kabakombinyina, nkukwaamba Judasi ooyo wakali kwiitwa kuti Bbasabba aSila. 23 Bakalemba lugwalo mpawo bakabapa kuti bayinkaalo. Lwakali kuti:
“Tubaapostoli abaalu, tubakombinyokwe. Tulikumulembela nibakombima bazimwi zisi, nimuli ku-Antiyokkiya, kuSiriya akuKkilikkiya. Tulikumujuzya! 24 Mbukunga twakamvwa kuti bamwi aakati kesu bakaza kulindinywe kuti bazoomukataazye amajwi aabo kabayanda kuti muleye mulusyomo, nikuba kuti iswe taakwe makani ngitwakababuzizye pe, 25 nkinkaako, toonse twazuminana kuti kusalwe baalumi mbitutatume kulindinywe kuti bazaamwi abakombima bayandwa, Bbanabbasi aPawulu. 26 Baalumi aaba bakapa buumi bwabo akaambo kazina lyaMwaami wesu Jesu Kkristu. 27 Nkinkaako, tulikutuma Judasi aSila kuti ambabo bazoomubuzye zintu nzizeezi mulomo mpande. 28 Nkaambo muuya uusalala andiswe twasala kuti tutamuyungizizyi imwi mikuli iilema kunze kwazintu eezi ziyandikana: 29 amwiinkilile kunembo kutantamuka zintu zyakapayizigwa kuzibumbwa, kuganzi, kuzintu zisinidwe* akubwaamu.* Kuti mwatantamuka zintu eezi, zinoomweendela kabotu. Musyaale kabotu!”
30 Baalumi aaba nibakabuzigwa kuti beende, bakakunuka baya ku-Antiyokkiya mpawo bakaakubungania basikwiiya boonse mpawo bakabapa lugwalo. 31 Nibakalubala, bakabotelwa nkaambo lwakabasungwaazya. 32 Judasi aSila bakasungwaazya bakombinyina akubasimya ankani zyiingi, nkaambo ambabo bakali bapolofita. 33 Nibakakkala kwamazuba, bakombinyina bakababweedezya muluumuno kuli baabo bakabatumide. 34 *—— 35 Pesi Pawulu aBbanabbasi bakakkala mu-Antiyokkiya kabalikuyiisya akwaambilizya makani mabotu aali atala ajwi lyaJehova* kabalaamwi abamwi biingi.
36 Nikwakayinda mazuba, Pawulu wakabuzya Bbanabbasi kuti: “Lino atubweede tukaswaye* bakombima mumyuunzi yoonse njitwakakambawuka jwi lyaJehova,* tukabone mbubali kupona.” 37 Bbanabbasi wakakanzide kuti bayinkaamwi aJohane ooyo uutegwa Makko. 38 Pesi Pawulu taakazuminana aamuzeezo wakuti bayinkaawe nkaambo wakali wabasiya kuPamfiliya alubo taakayinkidaabo pe kumulimu ooyu. 39 Eezi zyakapa kuti banyemezyanie loko, zyakuti bakaanzaana. Nkinkaako, Bbanabbasi wakabweza Makko mpawo bakatanta bwaato baya kuKkupro. 40 Pawulu wakasala Sila mpawo bakombinyina nibakabakombela kuti Jehova* abafwide luzyalo lupati, bakeenda. 41 Wakayinda muSiriya amuKkilikkiya kalikusimya mbungano.