Kulonga
13 Jehova wakayinkilila kunembo kwaambuula aaMozesi kati: 2 “Ndisalazizye* bana balombe boonse bakusaanguna aakati kama-Israyeli. Bana balombe bakusaanguna mbibangu kuswaanizya abeenze bakusaanguna.
3 Mpawo Mozesi wakati kubantu: “Amuyeeye buzuba oobuno mbumwazwa mu-Ijipita mung’anda yabuzike, nkaambo Jehova wamugwisya oomuno akuboko kuli aamanguzu. Nkinkaako, taakwe chintu chilaabumena cheelede kuligwa. 4 Mulikuzwa sunu mumweezi uuno wa-Abbibbi.* 5 Jehova aazoomunjizya munyika yamaKkenani, yamaHeti, yama-Amori, yamaHivi ayamaJebbusi njaakakonkezya masianyookulu kuti uzoomupa, nyika iikunka malili abuchi, mweelede kuzoobamba pobwe eeli mumweezi uuno. 6 Mweelede kulya chinkwa chitakwe bumena kwamazuba aali musanu aabili mpawo mubuzuba bwamusanu aabili, kuzooba pobwe lyaJehova. 7 Mweelede kulya chinkwa chitakwe bumena kwamazuba aali musanu aabili, takweelede kujanika chintu chili aabumena aakati kanu alubo takweelede kujanika fulawa iikandidwe ilaabumena muchilawu chanu choonse.* 8 Mubuzuba oobo, weelede kubuzya mwanaako kuti, ‘Ndachita pobwe eeli akaambo kanzindakachitilwa aaJehova nindakazwa mu-Ijipita.’ 9 Eechi chizooba chitondeezyo aakuboko kwako achiyubulusyo* aankumu yako, kuchitila kuti mulawu waJehova ube aamulomo wako, nkaambo Jehova wakakugwisya mu-Ijipita akuboko kuli aamanguzu. 10 Munyaka amunyaka, mweelede kubamba mulawu ooyu aachiindi chawo.
11 “Jehova naazoomunjizya munyika yamaKkenani njaakakonkezya kuti uzoomupa amasianyookulu, 12 mweelede kuzoopa Jehova bana balombe boonse bakusaanguna, kuswaanizya abana beenze boonse bakusaanguna bazivuubwa zyanu. Bana balombe abeenze mbibaJehova. 13 Mwana wadonki woonse wakusaanguna mweelede kumunununa aambelele, kuti teemwamunununa, mweelede kumutyola nsingo. Bana banu balombe boonse bakusaanguna mweelede kubanununa.
14 “Kuti mwanaako wazookubuzya kuti, ‘Ani eezi uzichitilaanzi?’ Weelede kuzoomubuzya kuti, ‘Jehova wakatugwisya mu-Ijipita mung’anda yabuzike akuboko kuli aamanguzu. 15 Faro naakayumya moyo akutukasya kuti tweende, Jehova wakajaya bana boonse bakusaanguna munyika ya-Ijipita, kuzwa kumwana wakusaanguna wamuntu kusikila kumwana wakusaanguna wamunyama. Nchindili kupa beenze boonse kuti babe chipayizyo kuli Jehova akunununa mwanaangu mulombe wakusaanguna.’ 16 Eechi cheelede kuba chitondeezyo aakuboko kwako achitondeezyo aankumu yako, nkaambo Jehova wakatugwisya mu-Ijipita akuboko kuli aamanguzu.”
17 Faro naakabalekela bantu kuti beende, Leza taakabayinzya aanzila yiinda munyika yamaFilisiti pe nikuba kuti yakali kununswida. Nkaambo Leza wakaamba kuti: “Bantu balakonzya kuchincha mizeezo akubweeda ku-Ijipita kuti baswaana nkondo. 18 Nkinkaako, Leza wakapa kuti babelesye nzila iizyunguluka yamunkanda yakuLwizi Lusalala. Ma-Israyeli bakabambidwe mbuli masooja nibakazwa munyika ya-Ijipita. 19 Mozesi wakabweza mafuwa aaJosefa nkaambo Josefa wakali wakonkezya ma-Israyeli kati: “Leza uzoomucheba alubo mweelede kuzoobweza mafuwa aangu nimwazoozwa oomuno.” 20 Bakazwa kuSukkoti baakukkala ku-Etamu, kumugaano wankanda.
21 Jehova wakali kweenda kunembo lyabo sikati kali mumusumpuululu wajoba kuti abazulwide nzila, mpawo mansiku wakali mumusumpuululu wamulilo kuti abamunikile, kuchitila kuti bakonzye kweenda sikati amansiku. 22 Musumpuululu wajoba teewakali kuzwa pe kunembo lyabantu sikati alubo musumpuululu wamulilo teewakali kuzwa pe mansiku.