Kulonga
14 Lino Jehova wakati kuli Mozesi: 2 “Buzya ma-Israyeli kuti babweede musule, bakakkale aafwiifwi aPihahiroti iili aakati kaMigidoli alwizi, aaboneka Bbaala-zefoni. Amukkale nkuko kamulangene aanjiyo aafwiifwi alwizi. 3 Mpawo Faro uzoowamba oobu atala ama-Israyeli, ‘Balikweendengana munyika, tabachizi pe kuti baye kuli. Bapatila munkanda.’ 4 Ndilamuleka Faro kuti ayumye moyo alubo uzoobatobela. Ndizoolijanina bulemu kwiinda mukuzunda Faro amasooja aakwe woonse. Ma-Ijipita bazooziba choonzyo kuti ndime Jehova.” Nkinkaako, ma-Israyeli bakachita nzibakabuzigwa.
5 Nikwakayinda chiindi, mwaami wa-Ijipita wakabuzigwa kuti bantu bachija. Mpawo Faro ababelesi bakwe bakachincha muzeezo atala abantu, mpawo bakati: “Twazichitilaanzi eezi? Nkamboonzi nitwaangununa ma-Israyeli bali kutubelekela kabali bazike?” 6 Nkinkaako, wakalibambila ngolo zyakwe zyankondo mpawo wakayinka abantu bakwe. 7 Wakabweza ngolo zisalidwe zili 600 azimwi ngolo zyoonse zyamu-Ijipita alubo zyoonse zyakali aamasooja. 8 Jehova wakamuleka Faro mwaami wa-Ijipita kuti ayumye moyo. Wakabatobela ma-Israyeli nibakali kuzwa kabatayoowi pe.* 9 Chiindi nibakakkede aafwiifwi alwizi luli kuPihahiroti iilangene aBbaala-zefoni, Faro angolo zyakwe zyoonse zyamabbiza abasimabbiza bakwe amasooja aakwe, bakayinkilila kunembo kubatobela alubo bakali baba aafwiifwi kubeenzya.
10 Faro naakaswena aafwiifwi, ma-Israyeli bakalanga mpawo bakabona ma-Ijipita kabali kubaandila. Bakayoowa alubo bakasaanguna kulilila Jehova. 11 Bakati kuli Mozesi: “Ani taakwe ndawu zyakuzikkila na ku-Ijipita, nchwaakatweeta ookuno kuti tuzoofwide munkanda? Wakatugwisizyaanzi biya mu-Ijipita? 12 Teenzizyo na nzitwakakubuzya nitwakali mu-Ijipita kuti, ‘Tusiye tubelekele ma-Ijipita,’ nkaambo kulikabotu kuti tubelekele ma-Ijipita kwiinda kuti tufwide munkanda.” 13 Mpawo Mozesi wakati kubantu: “Mutayoowi pe. Amwiimikile, mubone Jehova mbatamufutule sunu. Ma-Ijipita mbimubwene sunu tamuzoobaboni lubo pe. 14 Jehova lwakwe ulamulwanina, inywe munoowumwine biyo.”
15 Jehova wakati kuli Mozesi: “Nkamboonzi nimulikundililila? Buzya ma-Israyeli kuti bayinkilile kunembo alweendo lwabo. 16 Pesi iwe nyampula mufunko wako wuutandabike aajulu aalwizi ulwaanzaanie kuchitila kuti ma-Israyeli bayinde aakati kalwizi, aanyika njumu. 17 Ime ndilabaleka ma-Ijipita kuti bayumye myoyo yabo kuti babatobele mpawo ndilalijanina bulemu kwiinda mukuzunda Faro, masooja aakwe, ngolo zyakwe zyankondo abasimabbiza bakwe. 18 Ma-Ijipita bazooziba choonzyo kuti ndime Jehova, nindazoolijanina bulemu kwiinda mukuzunda Faro, ngolo zyakwe zyankondo abasimabbiza bakwe.”
19 Mpawo ngilozi yaLeza wakasimpe, yakali kweenda kunembo lyama-Israyeli yakazwa mpawo yakayinka kusule lyabo alubo joba lyakali kunembo lyabo lyakazwa lyaakwiimikila kusule lyabo. 20 Nkinkaako, lyakayimikila aakati kakkeempu yama-Ijipita ayama-Israyeli. Kuli limwi bbazu, joba eelyo lyakali kusiya mpawo kuli limwi bbazu lyakali kumunika mansiku. Nkinkaako, taakwe nkamu yakaswena kuliimwi nkamu busiku boonse.
21 Mozesi wakatandabika kuboko kwakwe aajulu aalwizi. Jehova wakapa kuti kuunge moya wakubuzwezuba uuli aamanguzu busiku boonse kuti apambule lwizi, mpawo kwakaboneka nyika njumu. 22 Ma-Israyeli bakayinda aakati kalwizi, aanyika njumu chiindi maanzi naakaba mbuli muduli kuchilisyo akuchimweensi chabo. 23 Ma-Ijipita bakabaandilila alubo mabbiza woonse aFaro angolo zyakwe zyankondo abasimabbiza bakwe bakabatobela aakati kalwizi. 24 Aachiindi chakulinda kwakuseeni* Jehova wakalanga ma-Ijipita kuzwa mumusumpuululu wamulilo ajoba alubo wakabanyongania. 25 Wakali kugwisya mavili aangolo zyabo zyakuti kwakali kubayumina kuzyeenzya. Ma-Ijipita bakali kwaamba kuti: “Atuchije, tutasweni pe kuma-Israyeli nkaambo Jehova ngulikubalwanina kuma-Ijipita.”
26 Mpawo Jehova wakati kuli Mozesi: “Tandabika kuboko kwako aajulu aalwizi kuchitila kuti maanzi avumbe ma-Ijipita, ngolo zyabo zyankondo abasimabbiza babo.” 27 Mozesi wakatandabika kuboko kwakwe aajulu aalwizi mpawo kubuchedo, lwizi lwakabweeda akuba mbuli mbulwakabede. Ma-Ijipita nibakali kuchija, Jehova wakabakunkumwida aakati kalwizi. 28 Mpawo maanzi aakali kuboola, akavumba ngolo zyankondo, basimabbiza amasooja woonse aaFaro aakali abatobela mulwizi. Taakwe naaba uumwi wakafutuka.
29 Pesi ma-Israyeli bakeenda aanyika njumu mukati kalwizi alubo maanzi akaba mbuli muduli kuchilisyo akuchimweensi chabo. 30 Mubuzuba oobo, Jehova wakafutula ma-Israyeli kuzwa mukuboko kwama-Ijipita alubo ma-Israyeli bakabona ma-Ijipita kabafwide kumbali aalwizi. 31 Ma-Israyeli bakabona manguzu mapati ngaakabelesya* Jehova alubo bantu bakasaanguna kuyoowa Jehova akusyoma Jehova amubelesi wakwe Mozesi.