Kulonga
33 Jehova wakayinkilila kunembo kubuzya Mozesi kuti: “Nyampuka, uzwe aano, iwe abantu mbuwakazulwida kuzwa munyika ya-Ijipita. Muye kunyika njindakakonkezya kuli Abbrahamu, Izakka aJakkobo kanditi, ‘Ndizooyipa bana bako.’ 2 Ndilatuma ngilozi kunembo lyanu akutanda maKkenani, ma-Amori, maHeti, maPerezi, maHivi amaJebbusi. 3 Amwiinke kunyika iikunka malili abuchi. Tandikooyenda aandinywe pe nkaambo mulaamitwe miyumu, ulabona ndamunyonyoona munzila.”
4 Bantu nibakamvwa majwi aaya aabukali, bakasaanguna kulila alubo taakwe naaba umwi wabo wakazwaata twakulibotya. 5 Jehova wakati kuli Mozesi: “Buzya ma-Israyeli kuti, ‘Muli aamitwe miyumu. Ndilakonzya kumunjilila ndimunyonyoone muchiindi chifwiifwi. Kwalino, mutatuzwaati pe tuntu twanu twakulibotya kandichiyeeya kuti ndichite biyeni andinywe.’” 6 Kuzwa kuChilundu chaHorebbu kuya kunembo, ma-Israyeli bakaleka kuzwaata* twakulibotya twabo.
7 Mozesi wakabweza tente lyakwe waakulyiimika aanze aakkeempu, kule-kule akkeempu mpawo wakalyuuzika kuti tente lyakuswaanganina. Muntu woonse wakali kuyanda kubuzya makani kuli Jehova, wakali kwiinka kutente lyakuswaanganina lyakali kunze aakkeempu. 8 Mozesi naakali kwiinka kutente, bantu boonse bakali kunyampuka akwiimikila aamilyango yamatente aabo alubo bakali kumulanga Mozesi kusikila wanjila mutente. 9 Mozesi naakali kunjila mutente, musumpuululu wajoba wakali kuseluka akwiimikila aamulyango watente chiindi Leza naakali kwaambuula aaMozesi. 10 Bantu boonse nibakabona joba kalyiimvwi aamulyango watente, umwi awumwi wakanyampuka mpawo wakotama aamulyango watente lyakwe. 11 Jehova wakaambuula aaMozesi kababwenene mbuli mbaambuula muntu amweenzinyina. Mozesi naakali kubweeda kukkeempu, Joshuwa mwana waNuni, mubelesi wakwe taakali kuzwa pe aatente.
12 Mozesi wakati kuli Jehova: “Ulikundibuzya kuti, ‘Zulwida bantu aaba,’ pesi tundibuzide pe kuti ngwani ngutatume kuti ayende aandime. Alubo wakaamba kuti, ‘Ndilikuzi azina* alubo ndakufwida luzyalo.’ 13 Ikaka, kuti kuli wandifwida luzyalo, chita kuti ndizibe nzila zyako kuchitila kuti ndikuzibe akuti ukkale kundifwida luzyalo. Yeeya kuti chisi eechi mbantu bako.” 14 Mpawo wakati: “Ime lwangu ndileenda aandinywe alubo ndizoopa kuti mupumune.” 15 Mpawo Mozesi wakati kulinguwe: “Kuti iwe lwako kutali kweenda aandiswe, utatuzulwidi pe kuti tuzwe mundawu eeyi. 16 Bantu bazooziba biyeni kuti ime abantu bako watufwida luzyalo? Tabeelede kuziba kwiinda mukubona kuti ulikweenda aandiswe na, kuchitila kuti ime abantu bako tukonzye kusiyanisigwa abamwi bantu boonse bali aanyika?”
17 Jehova wakabuzya Mozesi kuti: “Ndilachita chintu nchwaakumbila nkaambo ndakufwida luzyalo alubo ndilikuzi azina.” 18 Mpawo Mozesi wakati: “Ikaka, nditondeezye bulemu bwako.” 19 Pesi Leza wakati: “Ndilapa kuti bubotu bwangu boonse bwiinde kunembo lyako alubo ndilaambilizya zina lyaJehova kunembo lyako. Ndilamufwida luzyalo ooyo ngunditafwide luzyalo akweetelela ooyo ngunditeetelele.” 20 Alubo wakayungizya kuti: “Tukonzyi pe kubona busyu bwangu nkaambo taakwe muntu uukonzya kundibona mpawo asyaale kali muumi.”
21 Alubo Jehova wakati: “Njeyi ndawu iili aafwiifwi andime. Yimikila aabbwe. 22 Bulemu bwangu nibutanooyinde, ndilakubikka mulwaanzi lwabbwe mpawo ndilakujala aakuboko kwangu kusikila ndiinde. 23 Mpawo ndilagwisya kuboko kwangu alubo ulabona sule lyangu, pesi busyu bwangu tabukonzyi kubonwa pe.”