Makani mabotu aakalembwa aaMateyo
3 Mumazuba aayo, Johane Mubbabbatizi wakasika kalikukambawuka munkanda yakuJudiya, 2 kati: “Amusanduke, nkaambo Bwaami bwakujulu bwaswena aafwiifwi.” 3 Kwaamba choonzyo, ooyu ngunguwe wakaambwa kwiinda muli Isaya mupolofita, mumajwi aaya: “Ijwi lyayooyo uulikoompolola munkanda kaliti: ‘Amubambe nzila yaJehova!* Amululamike migwagwa yakwe.’” 4 Johane wakazweete chigogo chakapangidwe aaboya bwankamela alubo wakaangide bbanti lyachikumba muchibuno. Chakulya chakwe chakali nsozi abuchi bwamulusaka. 5 Mpawo bantu bamuJerusalema abamuJudiya yoonse abamwi boonse bakali kukkala kumbali aamulonga waJodani, bakali kwiinka kulinguwe, 6 alubo bakali kubbabbatizigwa* aanguwe muMulonga waJodani, kabalyaambilila zibi zyabo aantanganana.
7 Johane naakabona baFarisi biingi abaSadusi kabaza nkwaakali kubbabbatizizya, wakati kulimbabo: “Inywe nibana babachipile, ngwani wamuchenjezya kuti muchije bukali bulikuza? 8 Nkinkaako, amuzyale michelo iitondeezya kuti mwasanduka. 9 Mutalyeeni pe kamulibuzya kuti, ‘Ndeende ngu-Abbrahamu.’ Nkaambo ndimubuzya kuti, Leza ulakonzya kupa kuti mabwe aaya abe bana ba-Abbrahamu. 10 Kaleba* kabikkwa kale aamiyanda yaminsamu. Nkinkaako, munsamu woonse uutazyali michelo mibotu, uzoogonkwa uwaalilwe mumulilo. 11 Ime ndimubbabbatizya aamaanzi akaambo kakuti mwasanduka, pesi ooyo uulikuza musule lyangu ulaamanguzu kwiinda ndime, alubo tandeeleli pe kugwisya manyatela aakwe. Muntu ooyo, uzoomubbabbatizya aamuuya uusalala amulilo. 12 Fosholo lyakwe lyakupupuluzya lili mumaboko aakwe alubo lubuwa lwakwe lwakupolela uzoolusalazya chakumaninina mpawo abikke wiiti yakwe mubutala, pesi buungu uzoobutenta mumulilo uutazimiki.”
13 Mpawo Jesu wakazwa kuGalili waya kuJodani kuli Johane kuti akabbabbatizigwe aanguwe. 14 Pesi Johane wakeezya kumukasya kati: “Ime ndime ndeelede kubbabbatizigwa aanduwe, nkamboonzi nulikuza kulindime?” 15 Jesu wakamusandula kuti: “Kuchiindi eechino akube oobo, nkaambo kuleelela kuti tuchite zintu zyoonse ziluleme munzila eeyi.” Mpawo wakaleka kumukasya. 16 Jesu mbaakazwa biyo mumaanzi kali wamana kubbabbatizigwa, majulu akajulika alubo wakabona muuya waLeza kawuseluka mbuli nziba kawuza aalinguwe. 17 Alubo kwakamvwigwa jwi kuzwa kujulu kaliti: “Ooyu Mwanaangu, uuyandwa, uundibotezya.”