Makani Aakalembwa aaJohane
15 “Ime ndili musaansa wachoonzyo alubo Taata nguumulimi. 2 Mitabi yoonse iitazyali michelo aalindime ulayigonka, pesi yoonse iizyala michelo ulayisalazya kwiinda mukwiikwezuula, kuchitila kuti izyale michelo myiingi. 3 Inywe musalala kale akaambo kajwi ndindamubuzya. 4 Amwiinkilile kunembo kubaamwi andime, andime ndilayinkilila kunembo kubaamwi andinywe. Mbuli mutabi mbuutakonzyi kuzyala muchelo awulikke kawutajisilidi aamusaansa, andinywe tamukonzyi pe kuzyala michelo kuti teemwayinkilila kunembo kubaamwi andime. 5 Ime ndili musaansa alubo inywe muli mitabi. Kufumbwa muntu wiinkilila kunembo kubaamwi andime, andime kandilaamwi anguwe, ulazyala michelo myiingi, nkaambo taakwe uukonzya kuchita chintu nichiba chimwi, kuti katalaamwi andime. 6 Kufumbwa muntu uutayinkilili kunembo kubaamwi andime, ulasowelwa aanze mbuli mutabi mpawo ulayuma. Alubo bantu balayibunganizya mitabi eeyo mpawo bayiwaalila mumulilo mpawo nga yatentwa. 7 Kuti mwayinkilila kunembo kubaamwi andime alubo kuti majwi aangu akkalilila mulindinywe, amukumbile kufumbwa nchimuyanda mpawo muzoochichitilwa. 8 Taata ulalemekwa kuti mwayinkilila kunembo kuzyala michelo akutondeezya kuti muli basikwiiya bangu. 9 Mbuli mbaakandiyanda Taata, andime ndakamuyanda. Nkinkaako, amwiinkilile kunembo kuba muluyando lwangu. 10 Kuti kamubamba milawu yangu, muzooyinkilila kunembo kamuli muluyando lwangu, mbuli mbundakabamba milawu yaTaata akwiinkilila kunembo muluyando lwakwe.
11 “Ndamubuzya zintu eezi kuchitila kuti kukondwa kwangu kube mulindinywe akuti kukondwa kwanu kuzule. 12 Ooyu nguumulawu wangu wakuti, muyandane mbuli mbundakamuyanda. 13 Taakwe muntu uuli aaluyando lupati lwiinda loolu, lwakuti umwi muntu ape buumi bwakwe akaambo kabeenzinyina. 14 Munooli beenzuma kuti mwachita nzindimubuzya. 15 Tandichimwaambi kuti muli bazike, nkaambo muzike tazizi pe nzyachita simalelaakwe. Pesi ndimwaamba kuti muli beenzuma nkaambo ndamubuzya zintu zyoonse nzindakamvwa kuli Taata. 16 Inywe teendinywe pe nimwakandisala, pesi ndime nindakamusala alubo ndakamutuma kuti mwiinke akuti mwiinkilile kunembo kuzyala michelo iitamani, kuchitila kuti Taata akamupe kufumbwa nchimukumbila muzina lyangu.
17 “Ndilikumubuzya zintu eezi kuchitila kuti muyandane. 18 Kuti nyika yamuzonda, amuzibe kuti yakasaanguna kuzonda ndime kayitanamuzonda. 19 Kaansinga mwali banyika, nyika yalikunoomuyanda. Pesi akaambo kakuti tamuli banyika, mbukunga ndakamusala kuzwa munyika, nyika nchiimuzonda. 20 Amukkale kamwaayeeya majwi ngindakamubuzya aakuti: Muzike teemupati pe kuli simalelaakwe. Kuti kakuli bakandipenzya, andinywe bazoomupenzya alubo kuti kakuli bakaaswiilila majwi aangu, bazoowaswiilila amajwi aanu. 21 Pesi bazoochita zintu zyoonse eezi kuti bamukazye akaambo kazina lyangu, nkaambo tabamuzi pe Ooyo wakandituma. 22 Kaansinga teendakasika kuti ndizoowambuulaabo, nikuli tabakwe chibi pe. Pesi lino tabakonzyi pe kukazya kuti bali aachibi. 23 Kufumbwa uundizonda, ulamuzonda anguwe Taata. 24 Kaansinga teendakachita milimu iitanachitwa aawumwi muntu aakati kabo, nikuli tabakwe chibi pe. Pesi bakandibona alubo bakandizonda, kuswaanizya aTaata. 25 Eezi zyachitika kuchitila kuti azuzikizigwe majwi aalembedwe muMulawu wabo aakuti: ‘Bakandizonda aatakwe kaambo.’ 26 Aasika mugwasilizi, ngunditazoomutumine kuzwa kuli Taata, nkukwaamba muuya wakasimpe uuzwa kuli Taata, uzoopa bukamboni atala andime. 27 Mpawo andinywe mweelede kupa bukamboni atala andime, nkaambo mwakali aandime kuzwa kumatalikilo.