KuMahebberu
12 Nkinkaako, mbukunga tuzyungulukidwe aajoba pati oobu lyabakamboni, atuzisowe zintu zyoonse zitulemena achibi chitulambila chakufwambaana, alubo atuchijaane katulisimya mumuzundaano ngutubikkilidwe kunembo, 2 katulangide Muzulwidi Mupati aSikumaninizya lusyomo lwesu, Jesu. Akaambo kakukondwa kwakabikkidwe kunembo lyakwe, wakalisimya aachisamu chakupenzezya,* wakawubaansya masampu alubo ulikkede aansi kukuboko kwachilisyo kwachuuno chabwaami chaLeza. 3 Kwaamba choonzyo, amumulangisisye ooyo wakalisimya kukukazigwa abasizibi bakali kulinyonyoona kwiinda mumajwi aabo, kuchitila kuti mutakatali akuti mutaleki pe.
4 Mukulwana kwanu achibi eechi, taakwe nimwakalwanaacho kusika aakutika kwaganzi lyanu. 5 Alubo mwaalubilaatu malayilile aamwaamba kuti muli bana aakuti: “Mwanaangu, utaluubaansyi pe lulayo luzwa kuli Jehova,* nikuba kutakata chiindi naakululamika, 6 nkaambo aabo mbayanda Jehova* ulabalaya, kwaamba choonzyo, muntu woonse ngwabona kuti mwanaakwe ulamukwibbuula.”*
7 Mweelede kulisimya nkaambo eeyi njiimwi nzila yakulayigwa* kwanu. Leza ulikumuchita mbuli bana bakwe. Nkaambo mwana uulibiyeni uutalayigwi aawisi? 8 Pesi kuti moonse kamutalayidwe, nkukwaamba kuti muli bana bamusokwe kutali bana bamung’anda pe. 9 Mukuyungizya, mandeende aatuzyala akali kutulaya, alubo twakali kwaalemeka. Tatweelede kuyungizya kulibombya na kuli Taata wabuumi bwesu bwakumuuya mpawo tupone? 10 Nkaambo bakatulaya kwachiindi chifwiifwi kweendelana anzibakali kubona kuti zilikabotu, pesi Leza ulatulaya kuti tugwasigwe, kuchitila kuti tutole lubazu mubusalali bwakwe. 11 Kwaamba choonzyo, taakwe lulayo lubonekaanga lulanoneezya chiindi nilupegwa pesi lulachisa, nikuba oobo, kumamanino luzyala muchelo waluumuno abululami kuli baabo bakayiisigwa aandulo.
12 Nkinkaako, amusimye maboko aalengelela amazwi aatakwe manguzu, 13 alubo mwiinkilile kunembo kululamika nzila zyamawulu aanu, kuchitila kuti eecho chilemene chitazwi pe munswaanganino, pesi chiponesegwe. 14 Amubelekele kuba aaluumuno abantu boonse akusalala, nkaambo kuti muntu katasalali tazoomuboni pe Mwaami. 15 Amuchenjelele kuti kutabi muntu uukachilwa kujana luzyalo lupati lwaLeza, kuchitila kuti kutasyuuki muyanda uujaya, weeta mapenzi alubo biingi tabasalali pe akaambo kanguwo, 16 alubo amuchenjelele kuti aakati kanu kutabi sibwaamu* naakuti muntu uutakwe ndaba azintu zisalala mbuli Isawu, ooyo wakasiya zyeelelo zyakwe zyakuba mwana wakusaanguna kwiinda mukuzichinchanisya aachakulya chimwi biyo. 17 Nkaambo mulizi kuti naakazooyanda kukona chilongezyo, wakakakwa, nkaambo nikuba kuti wakeezya amanguzu aakwe woonse kuchincha mizeezo* amisozi, teezyakagwasya pe.*
18 Nkaambo tamunaswena aafwiifwi achintu chikonzya kujatwa, chiyaka mulilo, ajoba lisiya, amudima uusiya mbi, aguwo pati, 19 akulila kwamweembo, ajwi lyaambuula majwi, eelyo bantu ndibakamvwa, bakombelezya kuti batachibuzigwi amwi majwi. 20 Nkaambo teebakachili kukonzya kuswiilila malayilile aaya aakuti: “Naaba munyama uuguma chilundu, weelede kutululwa mabwe.” 21 Alubo, zintu eezi zyakali kuyoosya, zyakuti Mozesi wakati: “Ndilikuyoowa alubo ndilikuzazama.” 22 Pesi inywe mwaswena aaChilundu chaZiyoni amuunzi waLeza uupona, nkukwaamba Jerusalema wakujulu, akunkamu mpati yangilozi* 23 zili aamuswaangano mupati, akumbungano yamwana wakusaanguna yakalembesegwa kujulu, akuli Leza Mubetesi waboonse, akumawumi aakumuuya aabaluleme bakachitwa kuti bamaninine, 24 akuli Jesu simwiimaakati wachizuminano chipya, akuganzi lyakasansiilwa lyaambuula munzila yiinda ganzi lya-Abbelo.
25 Amuchenjelele kuti mutakaki kumuswiilila ooyo* uulikwaambuula. Nkaambo, kuti kakuli kuti aabo bakakaka kuswiilila ooyo wakabapa nchenjezyo yaLeza aanyika teebakafutuka, nkukwaamba kuti andiswe tatukafutuki naaba aaniini kuti twafutatila ooyo uulikwaambuula kuzwa kujulu! 26 Aachiindi eecho, jwi lyakwe lyakazungaania nyika, pesi lino wasyomezya kuti: “Ndizooyizungaania lubo nyika kuswaanizya ajulu.” 27 Bbala lyakuti “lubo” litondeezya kugwisigwa kwazintu zyakazungaanisigwa, nkukwaamba zintu zyakapangwa, kuchitila kuti zintu zitazungaanisidwe zisyaale kaziliwo. 28 Nkinkaako, mbukunga tulibwene kuti tuzootambula Bwaami butakonzyi kuzungaanisigwa, atwiinkilile kunembo kutambula luzyalo lupati, oolo lupa kuti tukonzye kubelekela Leza mulimu uusalala katumuyoowa akumulemeka. 29 Nkaambo Leza wesu mulilo uunyonyoona.