Makani mabotu aakalembwa aaMateyo
12 Kuchiindi eecho, Jesu wakayinda mumyuunda yakali aazilyo muSabata. Basikwiiya bakwe nibakaba aanzala, bakasaanguna kupulula zilyo kabalikulya. 2 BaFarisi nibakabona zintu eezi, bakati kulinguwe: “Bona! Basikwiiya bako balikuchita zintu zitazumizigwi aamulawu muSabata.” 3 Wakati kulimbabo: “Ani teemwakabala na nzyaakachita Davida abaalumi mbaakalaabo nibakaba aanzala? 4 Taakanjila na mung’anda yaLeza akulya zinkwa zyachitondeezyo, nzyaakatali kuzumizigwa amulawu kuti we abaalumi mbaakalaabo bazilye, kunze kwabapayizi kupela? 5 Alubo teemwakabala na muMulawu kuti, mumaSabata bapayizi batyola mulawu waSabata aatempele, nikuba oobo, bayinkilila kunembo kabatakwe mulandu? 6 Pesi ndimubuzya kuti, muntu mupati kwiinda tempele mpali aano. 7 Nikuba oobo, kaansinga mwakaamvwisisisya kuti aambaanzi majwi aakuti: ‘Ndiyanda lweetelelo kutali chipayizyo pe,’ teemwali kunoobajanina mulandu pe aabo batakwe mulandu. 8 Nkaambo Mwanaamuntu Mwaami waSabata.”
9 Naakazwa aandawu eeyo, wakanjila muchikombelo chabo, 10 lino bona, mwakali umwi mwaalumi wakakokonyene kuboko.* Nkinkaako, kabayanda kumujanina kaambo, bakamubuzya kuti: “Zilazumizigwa na amulawu kusilika muSabata?” 11 Wakati kulimbabo: “Kuti kuli aambelele iimwi, mpawo mbelele eeyo yawida mudindi muSabata, mpali na aakati kanu uunga ulaleka kwiijata mpawo ayigwisye? 12 Muntu uyandikana loko kwiinda mbelele! Nkinkaako, zilazumizigwa amulawu kuchita chintu chibotu muSabata.” 13 Mpawo wakati kumwaalumi ooyo: “Tandabika kuboko kwako.” Mpawo wakakutandabika alubo kwakaba kabotu mbuli kumwi kuboko. 14 Pesi baFarisi bakazwa aanze, mpawo bakazwa aamuzeezo wakuti bamujaye. 15 Jesu naakaziziba eezi, wakazwa nkukooko. Bantu biingi bakamutobela alubo wakabasilika boonse, 16 pesi wakabachenjezya kuti batamuzibyi kubantu, 17 kuchitila kuti kuzuzikizigwe eezyo zyakaambwa kwiinda muli Isaya mupolofita, ooyo wakati:
18 “Bona! Mubelesi wangu ngundakasala, uuyandwa, uundibotezya! Ndizoobikka muuya wangu aalinguwe alubo uzoopa kuti zisi zizibe kuti bululami niinzi. 19 Tazookazyanyi aamuntu pe, nikuba koompolola alubo taakwe uutazoomvwe jwi lyakwe mumigwagwa mipati. 20 Tazootyoli tete litifukide alubo tazoozimi kantambo kalambe kasuka busi, kusikila azwidilile kweeta bululami. 21 Kwaamba choonzyo, zisi zizoolangilila muzina lyakwe.”
22 Mpawo bakamweetela mwaalumi wakali aadimoni, moofu alubo wakali chimuumu. Wakamusilika mwaalumi ooyo wakali chimuumu mpawo wakasaanguna kwaambuula akubona. 23 Makamu woonse akagamba mpawo akasaanguna kwaamba kuti: “Kuti ooyu teeMwana waDavida na?” 24 BaFarisi nibakamvwa zintu eezi bakati: “Mwaalumi ooyu utanda madimoni kabelesya Bbeluzabbele* mweendelezi wamadimoni.” 25 Kazi nzibakali kuyeeya, wakati kulimbabo: “Bwaami boonse bwaanzeene bulanyonyooka, alubo kufumbwa muunzi naakuti ng’anda yaanzeene ilamwayika. 26 Munzila iikozyenie, kuti Saatani watanda Saatani, nkukwaamba kuti waanzaana, ani mpo bwaami bwakwe bulayimikila biyeni? 27 Mukuyungizya, kuti ime kanditanda madimoni kandibelesya Bbeluzabbele, ani bana banu baatanda kababelesyani? Bana banu nchibatazoobe babetesi banu. 28 Pesi kuti kandibelesya muuya waLeza kutanda madimoni, zyaamba kuti Bwaami bwaLeza bwamusikila kamutayeeyeli pe. 29 Muntu kujana wanjila biyeni mung’anda yamuntu uuli aamanguzu kuti abweze zintu zyakwe, kunze kwakuti wasaanguna kumusunga? Kuti wamusunga mpimpawo mpakonzya kubweza zintu zili mung’anda yakwe. 30 Kufumbwa muntu uutali kubbazu lyangu ulandilwana, alubo kufumbwa muntu uutabunganizyi aamwi andime, ulikutatuula.
31 “Akaambo kakaambo aaka, ndimubuzya kuti, bantu bazoolekelelwa zibi zyoonse akusampula koonse, pesi ooyo uusampula muuya, tazoolekelelwi pe. 32 Muchikozyano, kufumbwa muntu waambuula majwi mabi atala aMwanaamuntu, uzoolekelelwa, pesi kufumbwa muntu uusampula muuya uusalala, tazoolekelelwi pe mubwiime bwazintu oobuno* nikuba muli oobo buza.
33 “Inywe ndinywe mukonzya kupa kuti munsamu ubote kuswaanizya amichelo yawo naakuti ubije kuswaanizya amichelo yawo, nkaambo munsamu uzibwa aamichelo yawo. 34 Nibana babachipile, nga mulakonzya biyeni kwaambuula zintu zibotu kakuli muli babi? Nkaambo mulomo waambuula zintu zizwide mumoyo. 35 Muntu mubotu ugwisya zintu zibotu kuzwa mubunoti bwakwe bubotu, pesi muntu mubi ugwisya zintu zibi kuzwa mubunoti bwakwe bubi. 36 Ndimubuzya kuti, bantu bazoolyaambilila muBuzuba Bwakubetekwa akaambo kamajwi woonse aatagwasyi ngibaambuula, 37 nkaambo kwiinda mumajwi aako uzoowambwa kuti uliluleme alubo kwiinda mumajwi aako uzoowambwa kuti ulaamulandu.”
38 Mpawo bamwi balembi abaFarisi kabalikumusandula, bakati: “Muyiisi, tuyanda kubona chitondeezyo kuzwa kulinduwe.” 39 Mpawo wakati kulimbabo: “Zyalani bbi alubo lichita bumambi,* liliswini kuyanduula chitondeezyo, pesi taakwe chitondeezyo nchilitazoopegwe pe kunze kwachitondeezyo chaJona mupolofita. 40 Nkaambo mbukunga Jona wakali mwida lyamuswi mupati kwamazuba aatatu amansiku aatatu, aMwanaamuntu uzooba mumoyo wanyika kwamazuba aatatu amansiku aatatu. 41 Mubuzuba bwakubetekwa, bantu bakuNiniva bazoobusigwaamwi azyalani eeli alubo bazoolipa mulandu nkaambo bakasanduka kuzintu nzyaakakambawuka Jona. Pesi amubone, muntu mupati kwiinda Jona mpali aano. 42 Mubuzuba bwakubetekwa, mwaami wachanakazi wakumusanza uzoobusigwaamwi azyalani eeli alubo uzoolipa mulandu nkaambo wakazwa kumagolelo aanyika kuti azoomvwe busongo bwaSolomoni. Pesi amubone, muntu mupati kwiinda Solomoni mpali aano.
43 “Kuti muuya mubi wazwa mumuntu, ulayinda mundawu zitakwe maanzi kawuli kuyanduula ndawu yakupumuna mpawo ulayibula. 44 Mpawo ulaamba kuti, ‘Ndilabweeda kung’anda yangu nkundakazwa.’ Mpawo nwaasika, ulajana ng’anda eeyo kayitakwe uukkala pesi kayili yatanyelwa akubambwa kabotu. 45 Mpawo ulayinka kuti ukeete imwi myuuya iili musanu ayibili mibi loko kwiinda nguwo, alubo niyanjila ilakkala mukati. Mpawo muntu ooyo ulajinka kali waba mubi loko kwiinda mbaakabede kumatalikilo. Mbukuzooba kuzyalani eeli bbi.”
46 Naakachili kwaambuula aamakamu aabantu, banyina abanike bakwe bakaliimvwi aanze, kabayanda kwaambuulaawe. 47 Mpawo umwi muntu wakati kulinguwe: “Bona! Banyoko abanike bako baliimvwi aanze, bayanda kwaambuula anduwe.” 48 Kalikusandula muntu ooyo wakaambuula aanguwe, wakati: “Baama mbaani alubo banike bangu mbaani?” 49 Mpawo wakatandabika kuboko kwakwe, watondeka basikwiiya bakwe mpawo wakati: “Bona! Aaba mbiibaama abanike bangu! 50 Nkaambo kufumbwa muntu uuchita kuyanda kwaTaata uuli kujulu, nguumwanike wangu, mbiibachizi alubo mbiibaama.”